សភាបដិសេធសំណើដកអភ័យឯកសិទ្ធិតំណាងរាស្ត្របក្សប្រឆាំង
គណៈអចិន្ត្រៃយ៍រដ្ឋសភានៅព្រឹកថ្ងៃទី២៨ កញ្ញានេះ បានបើកកិច្ចប្រជុំពិភាក្សាលើរបៀបវារៈចំនួន១៥ ដែលរួមមានការវិសោធនកម្មលើច្បាប់តុលាការទាំងបី សេចក្តីព្រាងច្បាប់ស្តីពីការគ្រប់គ្រងអ្នកប្រកបវិជ្ជាជីវៈវិស័យសុខាភិបាល និងសំណើរពិភាក្សាស្តីពីការស្នើដកអភ័យឯកសិទ្ធិតំណាងរាស្ត្រសភាគណបក្សប្រឆាំងផងដែរ។ ក្រៅពីនេះ គណៈអចិន្ត្រៃយ៍ក៏បានសម្រេចលើកិច្ចការមួយចំនួនទៀត ប៉ុន្តែមិនបានលើករបៀបវារៈដំណោះស្រាយនយោបាយដាក់លើតុនោះទេ។
ចុះផ្សាយនៅថ្ងៃ៖
ស្តាប់ - ០២:២៩
គណៈអចិន្ត្រៃយ៍រដ្ឋសភា បានសម្រេចទាត់ចោលសំណើសុំដកអភ័យឯកសិទ្ធិសមាជិកគណបក្សសង្គ្រោះជាតិចំនួន ២រូប ដែលជាជនជាប់ចោទក្នុងបណ្តឹងសញ្ចារកម្ម។ គណៈអចិន្ត្រៃយ៍ ដែលមានសមាសភាព ១២មកដឹកនាំដោយលោក ហេង សំរិន ប្រធានរដ្ឋសភា និងមានការចូលរួមពីប្រធានគណៈកម្មការទាំង ៥រូប របស់គណបក្សសង្គ្រោះជាតិដែរនោះ បានបោះឆ្នោតលើកដៃបដិសេធលើសំណើ ដែលស្នើឡើងដោយក្រសួងយុត្តិធម៌។ ជាការបដិសេធ ព្រោះតែសំណុំរឿងនេះ មិនមែនជាបទល្មើសជាក់ស្តែង។ ជនជាប់ចោទទាំងពីរ គឺលោក តុវ៉ាន់ចាន់តំណាងរាស្ត្រមណ្ឌលកណ្តាល និងលោក ពិន រតនា តំណាងរាស្ត្រមណ្ឌលបាត់ដំបង។
ក្រៅពីនេះ គណៈអចិន្ត្រៃយ៍សភា បានសម្រេចបញ្ជូនសំណើសុំវិសោធនកម្មច្បាប់ ដែលស្នើឡើងដោយគណបក្សសង្គ្រោះជាតិទាំងបីចំណុចទៅកាន់គណៈកម្មការជំនាញ ដើម្បីយកទៅពិភាក្សាក្នុងសម័យសភាពេញអង្គ ដែលនឹងចូលកងវិញនៅខែតុលាខាងមុខ។ ចំណុចនេះ គណបក្សសង្គ្រោះជាតិនៅមិនទាន់បានបញ្ជាក់ថា តើលោកកឹម សុខា ប្រធានស្តីទីគណបក្សសង្គ្រោះជាតិនឹងបង្ហាញវត្តមានដែរឬយ៉ាងណានោះទេ។
គួរកត់សម្គាល់ថា ការចូលប្រជុំសភាក្រោយការអាក់ខានជាច្រើនខែរបស់គណបក្សប្រឆាំងនេះ បន្ទាប់ពីលោកនាយករដ្ឋមន្ត្រីហ៊ុន សែន បានមានប្រសាសន៍បង្ហើរឱ្យបក្សប្រឆាំងចូលសភាហើយនឹងអាចជជែកពីបញ្ហាជម្លោះនយោបាយ ដែលកំពុងប្រឈមរវាងគណបក្សទាំងពីរ។ យ៉ាងណាក៏ដោយ លោកយ៉ែម បុញ្ញាឫទ្ធិ អ្នកនាំពាក្យសភាខាងគណបក្សសង្គ្រោះជាតិ បានបដិសេធថាមិនមែនចូលតាមការអំពាវនាវពីមេបក្សកាន់អំណាចនោះឡើយ។ បន្ថែមពីនេះ គណៈអចិន្ត្រៃយ៍ ដែលបើកកិច្ចប្រជុំខណៈជម្លោះនយោបាយតានតឹង បានបដិសេធថា មិនបានលើកយករបៀបវារៈស្តីពីដំណោះស្រាយនយោបាយមកជជែកគ្នានោះទេ។ តែយ៉ាងណាក៏ដោយ លោកយ៉ែម បុញ្ញាឫទ្ធិ បានអះអាង ចំណុចនឹងអាចជជែកគ្នាដើម្បីដោះស្រាយតាមយន្តការវប្បធម៌សន្ទនា ខណៈដែលបក្សប្រជាជនបញ្ជាក់ថា គ្មានការចរចា ដើម្បីដោះលែងអ្នកទោសនោះឡើយ។
សូមបញ្ជាក់ថា ជម្លោះនយោបាយរវាងគណបក្សទាំងពីរ ដែលមានរហូតមកដល់សព្វថ្ងៃ បានហូរចេញពីរឿងបុគ្គលប្រធានបក្ស និងប្រធានបក្ស និងបញ្ហាព្រំដែនរវាងកម្ពុជាវៀតណាម រួមទាំងក្តីក្តាំស្នេហាក្រៅចំណងផងដែរ។ បក្សទាំងពីរ ដែលមានកម្លាំងអ្នកគាំទ្ររៀងៗខ្លួនបានគំរាមប្រើកម្លាំងធ្វើមហាបាតុកម្ម និងកម្លាំងបង្ក្រាបទៅវិញទៅមក។ បើទោះបីជាបែបណាក៏ដោយ អ្នកវិភាគនយោបាយនៅកម្ពុជា បានមើលឃើញថា កិច្ចប្រជុំគណៈអចិន្ត្រៃយ៍នៅព្រឹកថ្ងៃទី២៨ កញ្ញានេះ គឺជាការបើកផ្លូវសម្រាប់ការចរចានៅថ្ងៃក្រោយ បន្ទាប់ពីការមើលមុខគ្នាមិនចំអស់រយៈពេលជាងមួយឆ្នាំមកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ