ស្ត្រីខ្មែរកំពុងរំដោះខ្លួនចេញពីស្ថានភាព«បង្វិលចង្ក្រានមិនជុំ»
ចុះផ្សាយនៅថ្ងៃ៖
ស្តាប់ - ០៤:២៧
មានព្រឹត្តិការណ៍ជាច្រើនត្រូវបានគេរៀបចំឡើងឬគ្រោងនឹងរៀបចំសម្រាប់ឧទ្ទិសដល់ទិវាសិទ្ធិនារីអន្តរជាតិ ៨ មីនា ដែលនឹងឈានមកដល់នៅចុងសប្តាហ៍នេះ។ នេះសបញ្ជាក់ថា ការលើកស្ទួយសិទ្ធិស្ត្រីកំពុងក្លាយជាប្រធានបទសំខាន់មួយសម្រាប់ប្រទេសកម្ពុជា ពោលគឺ ស្ត្រីខ្មែរកំពុងរំដោះខ្លួនពីស្ថានភាពបង្វិលចង្ក្រានមិនជុំ ហើយបានលេចមុខមាត់ច្រើនជាងមុនក្នុងគ្រប់សកម្មភាពរាប់ទាំងនយោបាយ សេដ្ឋកិច្ច និងសង្គមកិច្ច។ យ៉ាងណាក៏ដោយ ស្ត្រីនៅតែមានចំនួនតិចតួចនៅក្នុងឆាកនយោបាយ។ ក្នុងសង្គមមួយដែលមានប្រពៃណីតឹងរ៉ឹងចំពោះកូនស្រី ការលើកស្ទួយសិទ្ធិស្ត្រីខ្មែរទាមទារការផ្លាស់ប្តូរដ៏ជ្រាលជ្រៅមួយនូវផ្នត់គំនិតសង្គមចំពោះស្ត្រី។
ពីសង្គមមួយដែលកូនស្រីរស់ក្នុងគំនាបប្រពៃណីយ៉ាងតឹងរ៉ឹង ស្ត្រីខ្មែរបច្ចុប្បន្នបានស្គាល់ការផ្លាស់ប្តូរមួយគួរឲ្យកត់សម្គាល់។ ស្ត្រីខ្មែរដែលកាលពីមុនធ្លាប់តែតោងកន្ទុយក្បិនឪពុកម្តាយ និងរស់ក្រោមឥទ្ធិពលរបស់ស្វាមី ឥឡូវនេះបានបង្ហាញវត្តមាននៅគ្រប់សកម្មភាពសង្គម និងនយោបាយចាប់តាំងពីថ្នាក់កំពូលរហូតដល់ថ្នាក់មូលដ្ឋាន។
ស្ត្រីខ្មែរមានវត្តមាននៅក្នុងស្ថាប័នកំពូលៗទាំងបីរបស់ជាតិ ទាំងស្ថាប័នព្រឹទ្ធសភា រដ្ឋសភា និងក្នុងរដ្ឋាភិបាល។ ស្ត្រីមានតួនាទីរហូតដល់ថ្នាក់ឧបនាយករដ្ឋមន្ត្រី ថ្នាក់រដ្ឋមន្ត្រី រដ្ឋលេខាធិការ អនុរដ្ឋលេខាធិការ និងជាអ្នកកាន់កិច្ចការសំខាន់ៗនៅឯថ្នាក់មូលដ្ឋានជាច្រើនទៀត។ ជាពិសេសវត្តមានស្ត្រីកាន់តែច្រើនឡើងនៅក្នុងវិស័យសារព័ត៌មានដែលកាលពីមុននេះគេចាត់ទុកជាអាជីពរបស់បុរស។ បើទោះបីជាស្ត្រីក្នុងឆាកនយោបាយនៅមានចំនួនតិចតួចក៏ដោយ ក៏ប៉ុន្តែ នៅក្នុងសកម្មភាពសង្គមផ្សេងទៀត ស្ត្រីបែរជាលេចមុខមាត់គួរឲ្យកត់សម្គាល់ ជាពិសេសគឺស្ត្រីខ្មែរកាន់តែច្រើនឡើងបានក្លាយជាសកម្មជនជួរមុខក្នុងការតស៊ូទាមទារសិទ្ធិសេរីភាពនិងការពារប្រយោជន៍របស់ខ្លួន។
ជាក់ស្តែង ស្ត្រីសកម្មជនដីធ្លី ស្ត្រីជាកម្មការិនីក្នុងវិស័យកាត់ដេរ និង ស្ត្រីដែលចូលរួមក្នុងសកម្មភាពសហគមន៍ការពារព្រៃឈើ សហគមន៍នេសាទ ជាដើម។ វត្តមានរបស់ស្ត្រីក្នុងសកម្មភាពក្តៅគគុកទាំងនោះសបញ្ជាក់ឲ្យឃើញថា ស្ត្រីខ្មែរហាក់ទទួលការវិវឌ្ឍលឿនក្នុងវិស័យសង្គមជាងក្នុងវិស័យនយោបាយ។ ពីអ្នកចូលចិត្តនៅពីក្រោយបុរសទៅជាសកម្មជនជួរមុខ ហ៊ានប្រឈមជាមួយកម្លាំងសមត្ថកិច្ច គឺជាការវិវឌ្ឍដ៏ជ្រាលជ្រៅមួយសម្រាប់ស្ត្រីខ្មែរ។
ជាការពិតណាស់ ទាំងនេះគឺជាលទ្ធផលនៃសកម្មភាពលើកស្ទួយស្ត្រីរយៈពេលជាច្រើនឆ្នាំកន្លងទៅនេះពីសំណាក់រដ្ឋាភិបាល បក្សនយោបាយ និងអង្គការសង្គមស៊ីវិល ព្រមទាំងពីសំណាក់ស្ត្រីខ្លួនឯងផងដែរ។ ទន្ទឹមគ្នានោះ សារព័ត៌មានក៏បានចូលរួមចំណែកយ៉ាងសំខាន់ណាស់ដែរក្នុងការបញ្ជ្រាបព័ត៌មានទៅដល់ស្រទាប់មហាជនគ្រប់ទិសទី។ រំហូរព័ត៌មាននេះហើយដែលធ្វើឲ្យស្ត្រីផ្លាស់ប្តូរផ្នត់គំនិតយ៉ាងឆាប់រហ័សរហូតដល់អ្នកនយោបាយខ្លះគិតមិនដល់។ ដូច្នេះ រដ្ឋាភិបាលនិងអាជ្ញាធរមានសមត្ថកិច្ចគួរតែឆ្លើយតបនឹងបញ្ហាដែលស្ត្រីកំពុងប្រឈមឲ្យបានសមស្របនិងលឿនជាងនេះពីព្រោះគេមិនអាចនិយាយពីការលើកស្ទួយស្ត្រីដោយទុកឲ្យស្ត្រីជាច្រើនស្រែកតវ៉ាដោយគ្មានអ្នកស្តាប់លឺនោះឡើយ។
យ៉ាងណាក៏ដោយ នៅក្នុងប្រទេសមួយដែលស្ត្រីតំណាងឲ្យ ៥២ ភាគរយនៃចំនួនប្រជាជនសរុប ប៉ុន្តែ ស្ត្រីខ្មែរនៅតែមានតួនាទីក្នុងសង្គមតិចតួចនៅឡើយបើធៀបទៅនឹងតួនាទីបុរស។ មានមូលហេតុសំខាន់មួយចំនួនដែលធ្វើឱ្យចលនាលើកស្ទួយស្ត្រីខ្មែរមិនទាន់ទទួលបានលទ្ធផលជាទីគាប់ចិត្តនៅឡើយ។ ទី១ គឺកត្តាបុរសមានន័យថា បុរសខ្មែរជាច្រើននៅមិនទាន់លះបង់ចោលទស្សនៈចាស់គំរឹលដែលចូលចិត្តមើលស្រាលស្ត្រីថាជាមនុស្សមិនសូវសំខាន់។ ទី២ គឺកត្តាស្ត្រីខ្លួនឯង មានន័យថា ស្ត្រីខ្មែរមួយចំនួននៅមិនទាន់ចេះផ្តល់តម្លៃដល់តួនាទីរបស់ខ្លួននៅឡើយដោយសុខចិត្តផ្តល់សារសំខាន់ដល់បុសរដដែល។ និងទី៣ មកពីគំនាបសង្គមដែលធ្វើឲ្យស្ត្រីខ្មែរជាច្រើនបានទទួលការអប់រំតិចជាងបុរសក៏ជាមូលហេតុធ្វើឲ្យស្ត្រីខ្វះសមត្ថភាពក្នុងការឡើងទៅកាន់តួនាទីសំខាន់ដូចបុរស។
សរុបមកវិញ ការលើកស្ទួយសិទ្ធិស្ត្រីក្នុងសង្គមខ្មែរអាស្រ័យទៅលើភាពបត់បែននៃផ្នត់គំនិតសង្គមទៅលើស្ត្រីនេះឯង។ ក្នុងន័យនេះ ការលើកស្ទួយតម្លៃស្ត្រីខ្មែរត្រូវចាប់ផ្តើមជាបឋមពីគ្រួសារនីមួយៗពោលគឺស្វាមី និង បងប្រុសទាំងឡាយត្រូវកាត់បន្ថយឥទ្ធិពលរបស់ខ្លួនទៅលើស្ត្រី ហើយផ្តល់តម្លៃនិងសិទ្ធិសេរីភាពដល់ភរិយានិងប្អូនស្ត្រីរបស់ខ្លួនឲ្យស្មើភាពជាមួយខ្លួន។ ចំណែករដ្ឋាភិបាលវិញក៏មានកាតព្វកិច្ចដោះស្រាយបញ្ហាប្រឈមរបស់ស្ត្រីឲ្យបានរួសរាន់ដើម្បីបង្កលក្ខណៈឲ្យស្ត្រីខ្មែររំដោះខ្លួនឲ្យបានឆាប់ចេញពីស្ថានភាព«បង្វិលចង្ក្រានមិនជុំ»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ