កម្ពុជាបញ្ចូនកងកម្លំាងពាក់មួកខៀវ ១៩៣នាក់ទៅលីបង់បន្ថែមទៀត
កម្ពុជា បានបញ្ជូនកងកម្លំាង១៩៣នាក់ទៀត ទៅកាន់ប្រទេសលីបង់ នៅថ្ងៃពុធនេះក្នុងក្របខ័ណ្ឌ កងរក្សាសន្តិភាពរបស់អង្គការសហប្រជាជាតិ។ ចាប់ពីឆ្នាំ ២០០៦មក កងកម្លំាងកម្ពុជា ចំនួន៨៤៤នាក់ហើយ បានពាក់មួកខៀវ របស់អង្គការសហប្រជាជាតិ។ កងកម្លំាងមួកខៀវមិនត្រឹមនាំកិត្តិយសមកអោយកម្ពុជាប៉ុណ្ណោះទេ ប៉ុន្តែក្នុងក្របខ័ណ្ឌកងកំលាំងមនុស្សធម៌ដ៏ធំនេះ កងទ័ពកម្ពុជាបានទទួលប្រាក់បៀវត្សរ៍មួយខ្ពស់សម្រាប់លើកកម្ពស់ជីវភាព ក្នុងពេលប្រាក់ខែកងទ័ពក្នុងស្រុកមានកំរិតទាប។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អ៊ឹម ណាវិន
ជាថ្មីម្តងទៀត កងកម្លំាងវិស្វកម្ម ចំនួន ១៩៣នាក់ របស់ប្រទេសកម្ពុជា បានចេញដំណើរទៅបំពេញបេសកកម្មមនុស្សធម៌នៅឯប្រទេសលីបង់ បន្ថែមទៀតនៅរសៀលថ្ងៃពុធទី១៧វិច្ឆិកានេះ ក្នុងក្របខ័ណ្ឌកងកម្លំាងរក្សាសន្តិភាពរបស់អង្គការសហប្រជាជាតិ។
កាលពីថ្ងៃ ចន្ទសបា្តហ៍មុន កម្ពុជាបានបញ្ជូនកងកម្លំាង២១នាក់រួចហើយទៅកាន់ប្រទេស លីបង់ ដើម្បីរក្សាសន្តិភាពក្នុងប្រទេសនេះ។
លោក ណឹម សុវ៉ាទ្ឋិ ប្រធានអគ្គនាយក គោលនយោបាយកិច្ចការបរទេស នៃក្រសួងការពារជាតិមានប្រសាសន៍ថា កងកម្លំាង វិស្វកម្ម កម្ពុជាទំាង១៩៣រូបក្នុងនោះមានស្រ្តី៤រូបផងដែរ មានភារកិច្ចទទួលការសាងសង់អគារសាងសង់ស្ពានថ្នល់ និងបោសសម្អាតមីន។
គួរបញ្ជាក់ថា នេះជាលើកទី១ហើយ ដែលមានស្ត្រីចូលរួមក្នុងកងកម្លំាងប្រទេសកម្ពុជា ពាក់មួកខៀវរបស់អង្គការសហប្រជាជាតិ។ ចាប់ពីឆ្នាំ២០០៦ កងកម្លំាងកម្ពុជា បានចូលរួមថែរក្សាសន្តិភាពក្នុងក្របខ័ណ្ឌអង្គការសហប្រជាជាតិ នៅប្រទេសស៊ូដង់ ប្រទេសឆាដសាធារណរដ្ឋអាហ្វ្រិចកណ្តាល និងប្រទេសលីបង់នេះ។
ជាសរុប មកដល់ពេលនេះ កម្ពុជា បានបញ្ជូនកំលាំង ចូលរួមថែរក្សាសន្តិភាពក្នុងក្របខ័ណ្ឌអង្គការសហប្រជាជាតិ បានចំនួន ៨៤៤ នាក់។
លោក ណឹម សុវ៉ាទ្ឋិ បានអោយដឹងថា កម្ពុជា កំពុងបណ្តុះបណ្តាល កងកម្លំាងរក្សាសន្តិភាព ជាច្រើនជំនាញទៀត ដើម្បីចូលរួមការងារ ជាមួយអង្គការសហប្រជាជាតិ ក្នុងបេសកកម្ម រក្សាសន្តិភាព ក្នុងពិភពលោក។
ទៅថ្ងៃមុខ កម្ពុជា មិនត្រឹមបញ្ជូន តែកម្លំាងជាកងពលនោះទេ។ កម្ពុជា បានត្រៀមធនធានមនុស្សជាលក្ខណៈបុគ្គល ដើម្បីទៅធ្វើការក្នុងការិយាល័យក្នុងក្របខ័ណ្ឌអង្គការសហប្រជាជាតិផងដែរ។
នាយករដ្ឋមន្រ្តី កម្ពុជា លោក ហ៊ុន សែន ធ្លាប់បាន ប្រកាសរួចហើយថា កម្ពុជា ស្វាគមន៍ ជានិច្ច ក្នុងការបញ្ជូនកងកម្លំាងតាមសំណើ របស់អង្គការសហប្រជាជាតិដើម្បីរក្សាសន្តិភាពប៉ុន្តែមិនមែនដើម្បីសង្រ្គាមជាមួយប្រទេសណាមួយនោះទេ។
ក្នុងបេសកកម្ម អង្គការសហប្រជាជាតិ កងកម្លំាងកម្ពុជា មិនត្រឹមនាំមកនូវ កេរ្តិ៍ឈ្មោះ អោយប្រទេសជាតិនោះទេ។ ការងារក្របខ័ណ្ឌមួកខៀវបានផ្តល់ ប្រាក់បៀវត្សរ៍ជាង ១ ០០០ដុល្លារ ក្នុងមួយខែដល់កងទ័ពកម្ពុជា។ ប្រាក់បៀវត្សរ៍ខ្ពស់នេះ បានជួយលើកស្ទួយជីវភាពកងទ័ពកម្ពុជា មួយផ្នែក ក្នុងខណៈប្រាក់ខែក្នុងស្រុក នៅមានកំរិតទាប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ