ក្រសួងការពារជាតិនឹងរឹតត្បិតការផ្សាយព័ត៌មានយោធា ក្នុងសមរភូមិ
រដ្ឋាភិបាលកម្ពុជា ពិសេសក្រសួងការពារជាតិ កំពុងពិចារណាអំពីការគ្រប់គ្រងការបញ្ចេញព័ត៌មានពីសមរភូមិជួរមុខ ទៅប្រព័ន្ធផ្សព្វផ្សាយ ដើម្បីចៀសផុតពីការទំលាយការសម្ងាត់យោធា។ អ្នកនាំពាក្យរដ្ឋាភិបាលកម្ពុជា លោកខៀវ កាញារីទ្ធបានអត្ថាធិប្បាយ នៅព្រឹកថ្ងៃទី១១មីនានេះថា កន្លងទៅការផ្តល់បញ្ចេញព័ត៌មានពីសមរភូមិមានលក្ខណៈទូលំទូលាយពេក។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់លាង ដឺលុចពីទីក្រុងភ្នំពេញ
ក្រសួងការពារជាតិនឹងចេញផ្សាយសេចក្តីណែនាំមួយ ស្តីពីការផ្តល់ និងការយកព័ត៌មាននៅក្នុងសមរភូមិជួរមុខ ដែលកំពុងមានការប្រឈមជាមួយកងទ័ពថៃ។ នេះជាការអះអាងរបស់លោកខៀវ កាញារីទ្ធ អ្នកនាំពាក្យរដ្ឋាភិបាល និងជារដ្ឋមន្ត្រីក្រសួងព័ត៌មាន។ លោកខៀវ កាញារីទ្ធថ្លែងយ៉ាងនេះ កាលពីព្រឹកថ្ងៃសុក្រទី១១មីនានេះ ក្នុងឱកាសដែលលោកនាំយកជំនួយទៅអោយកងវរៈសេនាតូចការពារព្រំដែនក្នុងទឹកដីខេត្តបន្ទាយមានជ័យ។
បើតាមការបញ្ជាក់របស់អ្នកនាំពាក្យរដ្ឋាភិបាលរូបនេះ ការផ្តល់ និងការយកព័ត៌មានពីសំណាក់អ្នកកាសែត នៅក្នុងសមរភូមិកម្ពុជាកន្លងទៅនេះ មានលក្ខណៈទូលំទូលាយខ្លាំងពេក។ ពិសេសការផ្តិតយករូបភាពនានា ហើយដែលត្រូវបានផ្សព្វផ្សាយយ៉ាងទូលាយនោះ បានធ្វើអោយប៉ះពាល់ដល់ការសម្ងាត់យោធាខ្លះៗដែរ។
ប្រភពមួយពីក្រសួងការពារជាតិបានអះអាងដោយដឹងថា ក្រុមអ្នកផ្តល់ព័ត៌មានអំពីបញ្ហានៅក្នុងសមរភូមិកំពុងត្រូវបានរៀបចំបង្កើតឡើង។ ប្រភពដដែលបានបញ្ជាក់ថា ការរៀបចំក្រុមផ្តល់ព័ត៌មានអំពីសមរភូមិ ធ្វើឡើងដើម្បីគ្រប់គ្រងការផ្តល់ព័ត៌មានអោយត្រឹមត្រូវ ពីព្រោះកន្លងមកនេះ ព័ត៌មានខ្លះត្រូវបានបញ្ចេញទៅអ្នកកាសែតលឿនពេក។ គេបានបង្ហើបដែរថា នៅពេលខាងមុខ ក៏នឹងមានការកំណត់មណ្ឌល ឬតំបន់ដែលត្រូវអនុញ្ញាតសម្រាប់អ្នកយកព័ត៌មានផងដែរ។
គួររម្លឹកថា ក្នុងពេលកន្លងមកនេះ នៅក្នុងសមរភូមិព្រំដែនកម្ពុជាថៃ ជាពិសេសនៅព្រំដែនប្រាសាទព្រះវិហារ អ្នកកាសែតត្រូវបានអនុញ្ញាតអោយចូលជ្រៅទៅដល់សមរភូមិជួរមុខដោយសេរី ទៅតាមបណ្តាទីបញ្ជាការមួយចំនួនទៀតផង។ ការផ្តិតរូបភាពនានាក៏មិនមានការហាមប្រាមអ្វីដែរ។ ហើយថា អ្នកកាសែតអាចសម្ភាសទាហានដែលឈរជើងនៅតាមគោលដៅនីមួយៗផង។ គេកម្របានឃើញសកម្មភាពទាំងនេះ នៅខាងភាគីថៃណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ