ការផ្ទុះអាវុធនៅតែបន្តក្នុងតំបន់ព្រំដែនប្រាសាទព្រះវិហារ
ការផ្ទុះអាវុធរវាងកងទ័ពកម្ពុជា និងកងទ័ពថៃ បានបន្តម្តងហើយម្តងទៀត នៅតំបន់ព្រំដែនប្រាសាទព្រះវិហារ កាលពីយប់ថ្ងៃអាទិត្យ។ ការ វាយប្រហារដោយកាំភ្លើងធំផងនោះ ក៏បានកើតឡើងជាថ្មីម្តងទៀត នៅព្រឹកថ្ងៃចន្ទនេះ នៅចំណុចច្រកតាថាវ ជិតប្រាសាទព្រះវិហារ។ ចំណែក ប្រជាជន កម្ពុជា នៅ ព្រំដែន បាន រត់ ភៀសខ្លួន ខណៈដែលកងទ័ពកម្ពុជា និងថៃ នៅតែត្រៀមប្រយុទ្ធជាប់ជានិច្ច។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លី ម៉េងហូរពីភ្នំពេញ
ការផ្ទុះអាវុធរវាងកងទ័ពកម្ពុជា និងកងទ័ពថៃ នៅព្រំដែនប្រាសាទព្រះវិហារ នៅតែបន្តជាប់ៗគ្នា ចាប់តាំងពីយប់ថ្ងៃអាទិត្យ និងម្តងទៀត នៅព្រឹកថ្ងៃចន្ទ ទី៧កុម្ភៈ ឆ្នាំ២០១១។
នៅយប់ម៉ោង ៦ និង ២០ នាទី ថ្ងៃអាទិត្យ ទី៦កុម្ភៈ ឆ្នាំ២០១១ កងទ័ពថៃ បានបើកការវាយប្រហារលើកងទ័ពកម្ពុជា នៅចំណុចភ្នំទ្រព្យ។ ការប្រយុទ្ធគ្នា ក៏បានរាលដាលរហូតដល់តំបន់យុទ្ធសាស្ត្រជាច្រើនទៀត នៅព្រំដែនប្រាសាទព្រះវិហារ រួមមាន៖ តំបន់សំបុកឃ្មុំ វាលឥន្ទ្រីយ៍ តាសឹម និងច្រកតាថាវ ជាដើម។
ការប៉ះទង្គិចនោះ មានលក្ខណៈជាទ្រង់ទ្រាយធំ ដោយទាហានថៃ បានបាញ់ចូលទឹកដីកម្ពុជា នូវកាំភ្លើងធុនធ្ងន់ ប្រភេទ ១០៥ ម.ម. ១៣០ ម.ម. ១៥៥ ម.ម. ជាច្រើនគ្រាប់។ ចំណែកខាងភាគីកម្ពុជា បានតបត ដោយបាញ់កាំភ្លើងធំចំគោលដៅជាច្រើនគ្រាប់ រួមទាំងប្រើប្រាស់កាំជ្រួចប្រតិកម្ម BM 21 ប្រភេទ ៤០ កាណុង។
ការប៉ះទង្គិចដោយអាវុធលើកទី៣ នៅយប់ថ្ងៃទី៦កុម្ភៈ ឆ្នាំ២០១១ កងទ័ពទាំងពីរបានព្រមព្រៀងឈប់បាញ់ នៅម៉ោង ១០ យប់។ ក៏ប៉ុន្តែសំឡេងផ្ទុះអាវុធរប៉េះរប៉ោះ រួមទាំងការផ្លោងកាំភ្លើងធំ ចូលដែនទីកម្ពុជា បន្តរហូតដល់ម៉ោង ៤ ទៀបភ្លឺ។
រហូតដល់ម៉ោង ៨ និង ២០ នាទីព្រឹកថ្ងៃទី៧កុម្ភៈ ឆ្នាំ២០១១ នៅច្រកតាសឹម កងទ័ពថៃក៏បានផ្ទុះអាវុធជាថ្មីលើកងទ័ពកម្ពុជារយៈពេលប្រហែល ២០ នាទី។ តាមលោកនាយករដ្ឋមន្ត្រី ហ៊ុន សែន ការផ្ទុះអាវុធជាលើកទី៤ កាលពីព្រឹកមិញ ដោយសារតែកងទ័ពថៃបានចូលមកយកខ្មោចកងទ័ពថៃ ដែលបានស្លាប់ ក្នុងការវាយប្រហារ កាលពីយប់មិញ។
ការផ្ទុះអាវុធលើកចុងក្រោយនេះ ត្រូវបានគេរាយការណ៍ថា បណ្តាលឲ្យទាហានថៃ ស្លាប់ ៤ នាក់ និងរបួសជាច្រើនទៀត។ ចំណែកកម្ពុជា ចាប់តាំងពីការផ្ទុះអាវុធ កាលពីថ្ងៃទី៤កុម្ភៈ កងទ័ពកម្ពុជាបានពលី ២ នាក់ និងរបួសមួយចំនួន។ ក្នុងនោះ ក៏មានជនស៊ីវិលកម្ពុជាម្នាក់ស្លាប់ផងដែរ។ យុទ្ធជនកម្ពុជាពលីម្នាក់ ត្រូវបានលោកនាយករដ្ឋមន្ត្រី ផ្តល់ប្រាក់ឧបត្ថម្ភ មួយម៉ឺនដុល្លារ។ ចំណែកអ្នករងរបួស ចំនួន ១.៥០០ ដុល្លារ។
ក្រោយការផ្ទុះអាវុធលើកទី៤ រហូតដល់ល្ងាចថ្ងៃទី៧កុម្ភៈ ឆ្នាំ២០១១ លោកនាយឧត្តមសេនីយ៍ ជា តារា ទទួលបន្ទុកសមរភូមិជួរមុខបានថ្លែងថា សភាពការណ៍នៅព្រំដែនប្រាសាទព្រះវិហារស្ងប់ស្ងាត់ធម្មតា។ ក៏ប៉ុន្តែកងទ័ពកម្ពុជា នៅតែស្ថិតក្នុងលក្ខណៈត្រៀមប្រយុទ្ធ និងប្រើសិទ្ធិស្វ័យការពារទឹកដីរបស់ខ្លួន។
ចំណែកប្រជាជនកម្ពុជារាប់រយនាក់ នៅតំបន់ព្រំដែនប្រាសាទព្រះវិហារ និងនៅខេត្តឧត្តរមានជ័យ បានរត់ភៀសខ្លួន ចាប់តាំងពីយប់ថ្ងៃអាទិត្យ និងបន្តរហូតដល់ព្រឹកថ្ងៃច័ន្ទនេះ ដើម្បីគេចចេញពីការប៉ះទង្គិចរវាងកងទ័ពកម្ពុជា និងថៃ។
រីឯប្រជាជនកម្ពុជាមួយចំនួនទៀត ដែលមិនចាកចេញពីផ្ទះសម្បែង នៅតំបន់ព្រំដែន ក៏បានជីកលេណដ្ឋាន ដើម្បីលាក់ខ្លួនផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ