ការបើកស្ថានទូតកាណាដាជាថ្មីនៅភូមា
ប្រទេសកាណាដា បើកស្ថានទូតរបស់ខ្លួនសាជាថ្មីនៅប្រទេសភូមា ២ខែក្រោយពី សហរដ្ឋអាមេរិកបានតែងតាំងឯកអគ្គរដ្ឋទូតនៅភូមារួចមក-នេះជាសេចក្តីជូនដំណឹងរបស់លោក John Baird រដ្ឋមន្ត្រីការបរទេសកាណាដានៅថ្ងៃសុក្រ១៣កក្កដាម្សិលមិញ។ មូលហេតុដែលជំរុញកាណាដាឲ្យចាប់បើកស្ថានទូតជាថ្មីនៅភូមានោះ គឺដោយសារតែរដ្ឋាភិបាលថ្មីភូមា ខិតខំប្រឹងប្រែងធ្វើកំណែទម្រង់ជាច្រើនបន្តបន្ទាប់គ្នាជាពិសេសនៅលើវិស័យសិទ្ធិមនុស្សនិង លទ្ធិប្រជាធិបតេយ្យដែលកំពុងដំណើរការនៅក្នុងប្រទេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
“យើងមានការចាប់អារម្មណ៍យ៉ាងខ្លាំងចំពោះការរីកចម្រើនជាបណ្តើរៗនៅក្នុងប្រទេសភូមា ក៏ប៉ុន្តែ ភូមាត្រូវតែបន្តការខិតខំប្រឹងប្រែងធ្វើកំណែទម្រង់របស់ខ្លួនតទៅមុខទៀត”-នេះជាការថ្លែងបញ្ជាក់របស់លោក John Baird រដ្ឋមន្ត្រីការបរទេសកាណាដានៅឱកាសសន្និសីទសារព័ត៌មានមួយតាមទូរស័ព្ទដែលលោកធ្វើឡើងនៅក្រៅក្របខណ្ឌនៃអង្គប្រជុំអាស៊ាន។
ជាមួយសម្ព័ន្ធមិត្តរបស់ខ្លួន ប្រទេសកាណាដា បានចាប់ផ្តើមខិតចូលជិតប្រទេសភូមាវិញចាប់តាំងពីឆ្នាំមុនក្រោយពី របបសឹកភូមា បានរំលាយខ្លួនឯងនិងបានផ្តល់ការគ្រប់គ្រងអំណាចឲ្យដល់របបថ្មីភូមាដែលដឹកនាំដោយអតីតសមាជិកម្នាក់របស់របបសឹក។
ស្របគ្នានេះសហគមន៍អន្តរជាតិ ចាប់តំាងពីដើមឆ្នាំមក បានសម្រេចចិត្តសម្រាលទណ្ឌកម្មសេដ្ឋកិច្ចដែលខ្លួនបានដាក់ទៅលើភូមា។ នេះជាសារថ្មីមួយរបស់សហគមន៍អន្តរជាតិ បញ្ជាក់ពីការលើកទឹកចិត្តដល់ភូមានេះ ក្នុងកិច្ចប្រឹងប្រែងធ្វើកំណែទម្រង់នៅក្នុងប្រទេសខ្លួន ជាអាទិ៍ការដោះលែងប្រធានបក្សប្រឆាំងភូមាលោកស្រី អ៊ុងសាន់ស៊ូជី។លោកស្រីស៊ូជី ដែលត្រូវបានរបបសឹកភូមា បានដាក់ឃុំឃាំងក្នុងលំនៅឋានរបស់លោកស្រី អស់១៥ឆ្នាំ នារយៈពេល២២ឆ្នាំចុងក្រោយនេះ។
ទោះបីជាភូមា បានធ្វើការវិវឌ្ឍន៍ច្រើនជាអាទិ៍នៅលើវិស័យសិទ្ធិមនុស្សក្តី ប្រទេសកាណាដា នៅតែសម្តែងការព្រួយបារម្ភជានិច្ចចំពោះអំពើហិង្សាជាច្រើនដែលកើតមាននៅតាមតំបន់នានានៅក្នុងប្រទេសនិងដែលប្រឆាំងសហគមន៍អ្នកកាន់សាសនាអ៊ីស្លាម។ ក្នុងន័យនេះហើយដែលរដ្ឋមន្ត្រីការបរទេសកាណាដា តឿនរំលឹកដល់របបភូមា សូមឲ្យដោះស្រាយបញ្ហាទាំងនេះដោយសន្តិវិធី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ