កាណាដានឹងចាត់វិធានការណ៍ចាប់បញ្ជូនមន្រ្តីពុករលួយចិន
ចុះផ្សាយនៅថ្ងៃ៖
ស្តាប់ - ០៤:៤៣
ក្រុមមន្រ្តីចិនប្រព្រិត្តអំពើរពុករលួយកំពុងសំងំលាក់ខ្លួននៅប្រទេសកាណាដាអាចភ័យខ្លួន ព្រោះ រដ្ឋាភិបាលកាណាដា និងរដ្ឋាភិបាលចិនកំពុងរៀបចំសេចក្តីព្រមព្រៀងយោគយល់គ្នាមួយក្នុងគោលបំណងចាប់បញ្ជូនមន្ត្រីពុករលួយទាំងនោះ ព្រមទាំងទ្រព្យសម្បត្តិខុសច្បាប់របស់ពួកគេត្រលប់មកប្រទេសចិនវិញ។ វិធានការណ៍នេះអាចអនុវត្តបាន ប្រសិនបើប្រទេសទាំងពីរឈានដល់ការចុះហត្ថលេខាលើសេចក្តីព្រមព្រៀងពិសេសនេះ។
រដ្ឋាភិបាលទាំងពីរកំពុងរៀបចំកិច្ចព្រមព្រៀង
នៅក្នុងកិច្ចសំភាសន៍មួយជាមួយកាសែត China Daily កាលពីចុងឆ្នាំ ២០១៤ កន្លងមកនេះ លោក Guy St-Jacqaues ឯកអគ្គរាជទូតកាទូតកាណាដា ប្រចាំទីក្រុងប៉េកាំងបានបង្ហើបអោយដឹងថា ប្រទេសទាំងពីរគឺ កាណាដា និងចិនបានរៀបចំពង្រាងមួយស្តីពីកិច្ចយោគយល់គ្នា ក្នុងការចាប់បញ្ជូនមន្រ្តីពុករលួយចិន ដែលបានលួចលុយរដ្ឋាភិបាលចិន ហើយកំពុងរស់នៅយ៉ាងស្របច្បាប់នៅលើទឹកដីកាណាដា។
អស់រយៈពេលជាច្រើនខែមកហើយ ដែលរដ្ឋាភិបាលទាំងពីរបានធ្វើការរួមគ្នាលើសំណុំរឿងនេះ ហើយគេសង្ឃឹមថា ភាគីទាំងពីរនឹងឯកភាពគ្នាឈានទៅដល់ការចុះហត្ថលេខាលើសេចក្តីព្រមព្រៀងពិសេសនេះនាពេលឆាប់ៗខាងមុខ។ លោកឯកអគ្គរាជទូតក៏បានបញ្ជាក់ផងដែរថា កិច្ចព្រមព្រៀងកាណាដា-ចិននេះអាចក្លាយជាគំរូមួយសំរាប់ប្រទេសដ៏ទៃទៀតក្នុងការប្រយុទ្ធប្រឆាំងអំពើរពុករលួយ និងការលាងលុយឆ្លងទ្វីប។
ខ្លឹមសារនៃកិច្ចព្រមព្រៀងចិន-កាណាដានេះគឺ ផ្តោតសំខាន់លើទ្រព្យសម្បត្តិរបស់បុគ្គលណាដែលធ្លាប់ជាមន្រ្តីរដ្ឋការបំរើការអោយរដ្ឋាភិបាលចិន ដោយធ្លាប់មានការពាក់ព័ន្ធនឹងអំពើរពុករលួយ ហើយបានលាងសំអាតលុយពុករលួយនោះចេញពីប្រទេសចិន។ ប្រសិនបើកាណាដា និងចិនអាចឈានចាប់បានមន្រ្តីពុករលួយទាំងនោះ យើងអាចចាត់ទុកថា នេះជាយោគជ័យមួយយ៉ាងធំធេងសំរាប់លោកប្រធានាធិបតីចិន ស៊ី ជិនពីង ដែលបានចាត់ទុកការប្រយុទ្ធប្រឆាំងនឹងអំពើរពុករលួយ ជាអាទិភាពក្នុងគោលនយោបាយរបស់លោក ពេលឡើងកាន់តំណែងកាលពីខែមិនា ឆ្នាំ ២១០៣។ បើតាមធនាគារកណ្តាលចិនបានអោយដឹងថា អស់
យៈពេលជាច្រើនឆ្នាំមកហើយ សហរដ្ឋអាមេរិក និងប្រទេសកាណាដាបានក្លាយជាគោលដៅដ៏មានប្រជាប្រិយភាពបំផុតសំរាប់ពួកមន្ត្រីពុករលួយចិន។
អ្វីដែលកាណាដាកំពុងពិចារណានោះគឺការពាក់ព័ន្ធនឹងច្បាប់មួយចំនួនរបស់ប្រទេសខ្លួន។ ផ្ទុយពីប្រទេសចំនួន ៣៩ ផ្សេងទៀតដូចជាប្រទេសបារាំង និងអូស្ត្រាលីជាដើម ប្រទេសកាណាដាមិនអនុញ្ញាតិអោយមានការធ្វើបច្ចាប័នពលរដ្ឋរបស់ខ្លួនឡើយ។ បើតាមក្រុមអង្គការសិទ្ធិមនុស្សជាច្រើនបានអោយដឹងថា គេមានការព្រួយបារម្ភ ពីព្រោះប្រទេសចិននៅអនុវត្តការធ្វើទារុណកម្មក្នុងការស៊ើបអង្កេតលើរឿងពុករលួយ ហើយការផ្តន្ទាទោសអាចឈានដល់ការប្រហារជីវិត។ គិតមកដល់ពេលនេះ មានមន្រ្តីរដ្ឋការ និងអ្នកជំនួញចិនប្រមាណ ៤២៨ នាក់ត្រូវបានចាប់ខ្លួនក្នុងក្របខ័ណ្ឌនៃយុទ្ធនាការដែលត្រូវបានប្រសិទ្ធិនាមថា «ការតាមប្រមាញ់ចាប់កញ្ជ្រោងឆ្នាំ ២០១៤» ។ យុទ្ធនាការនេះត្រូវបានបង្កើតឡើងដោយរបបក្រុមប៉េងកាំងកាលពីខែកក្កដាឆ្នាំ២០១៤កន្លងទៅនេះ ក្នុងគោលបំណងតាមចាប់មន្រ្តីពុករលួយចិនដែលសម្ងំលាក់ខ្លួននៅបរទេស។
ទឹកប្រាក់ប្រមាណ ១សែន ២ម៉ឺន ៥ពាន់ កោដិដុល្លារត្រូវបានលួច
ប្រទេសចិនត្រូវបានគេចាត់ទុកថាជាប្រទេស ដែលមានចរន្តទឹកបា្រក់ខុសច្បាប់ធ្វើចរចារណ៍ច្រើនជាងគេនៅលើពិភពលោក។ របាយការណ៍របស់ក្រុមហ៊ុន Global Financial Integrity (GFI) បានបញ្ជាក់អោយដឹងថា មានទឹកប្រាក់ប្រមាណ១សែន ២ម៉ឺន ៥ពាន់ កោដិដុល្លារត្រូវបានលួចពីរដ្ឋាភិបាលចិនចន្លោះពីឆ្នាំ ២០០៣ ដល់ឆ្នាំ ២០១៣។ គ្រាន់តែក្នុងឆ្នាំ ២០១២ប៉ុណ្ណោះ មានទឹកប្រាក់រហូតដល់ ២៥០ពាន់លានដុល្លារត្រូវបានធ្លាក់ចូលទៅក្នុងដៃជនពុករលួយ។ បើតាមលោក Huang Weiding អ្នកនិពន្ធសៀវភៅជំនាញផែ្នកការលាងលុយកខ្វក់នៅប្រទេសចិនបានអោយដឹងថា តួលេខដែលបង្ហាញខាងលើនេះមើលទៅហាក់ដូចជាសំបើមណាស់ ប៉ុន្តែ តួលេខទឹកប្រាក់ពិតប្រាកដអាចមានខ្ពស់ជាងនេះទៅទៀត។ បើតាមអ្នកជំនាញរូបនេះ ឧក្រិដ្ឋជនប្រព្រិត្តអំពើរពុករលួយព្យាយាមស្វះស្វែងរកគ្រប់វិធីសាស្រ្ត ដើម្បីគេចខ្លួនទៅរស់នៅសហរដ្ឋអាមេរិក កាណាដា អ៊ឺរ៉ុប និងអូស្ត្រាលី ជាដើម។ មូលហេតុដោយសារតែសង្គមក្នុងប្រទេសទាំងនោះមានស្ថេរភាពសន្តិសុខ និងសេដ្ឋកិច្ច។ គេបានប៉ាន់ប្រមាណថា ជាមធ្យម មានមន្រ្តីរដ្ឋការចិនម្នាក់គេចទៅរស់នៅបរទេសជាមួយទឹកប្រាក់ប្រមាណ ៦ លានដុល្លារ។
យុទ្ធសាស្រ្តដ៏ប៉ិនប្រសព្វ
ដោយសារតែមន្រ្តីពុករលួយទាំងនោះមានល្បិចជ្រៅជ្រះក្នុងការបង្វិលលុយទៅបរទេស វាជាការលំបាកសំរាប់អាជ្ញាធរចិនក្នុងការតាមចាប់ឧក្រិដ្ឋជនទាំងនោះ។ អ្នកនិពន្ធ Huang Weiding ក៏បានពន្យល់ផងដែរថា ពួកមន្រ្តីពុករលួយចិនចេះប្រើប្រាស់យុទ្ធសាស្រ្តដ៏ប៉ិនប្រសព្វតាមរយៈធនាគារ និងក្រុមហ៊ុនបរទេស។ អ្នកខ្លះធ្វើដំណើរទៅបរទេសជាញឹកញ៉ាប់ដោយហ៊ានដាក់លុយសន្ធឹកសន្ធាប់នៅក្នុងវ៉ាលីស។ កាលពីឆ្នាំ២០១១ អាជ្ញាធរប៉ូលីសកាណាដានៅតាមព្រលានយន្តហោះក្រុងតូរុនតូ និងវេនខូវ័របានចាប់ឃាត់ខ្លួនជនជាតិចិនជាច្រើននាក់ជាមួយនឹងទឹកប្រាក់ ចំនួន១៣លានដុល្លារ។ មកដល់ពេលនេះ គេមិនទាន់ដឹងថាតើមានចំនួនជនជាតិចិនប៉ុន្មាននាក់នៅក្នុងប្រទេសកាណាដា ដែលរដ្ឋាភិបាលចិនកំពុងតាមចាប់។ ប៉ុន្តែ បើតាមសំដីមន្រ្តីជាន់ខ្ពស់អាមេរិកម្នាក់ដែលសុំមិនបញ្ចេញឈ្មោះបានអោយដឹងថា រដ្ឋាភិបាលក្រុងប៉េកាំងបានផ្ញើរបញ្ជីឈ្មោះមនុស្សចំនួនជាង ១០០ នាក់មកអោយរដ្ឋាភិបាលក្រុងវ៉ាស៊ីនតោនតាមស្វែងរក។
សំរាប់ប្រទេសកាណាដា លោក Mikael Charette មេធាវីជំនាញផែ្នកអន្តោរប្រវេសន៍យល់ថា ចំនួនមន្រ្តីពុករលួយអាចមានតិចតួចជាងអាមេរិក។
ទំនាក់ទំនងអាចខិតជិតគ្នាវិញរវាងកាណាដា និងចិន
កិច្ចព្រមព្រៀងកាណាដា-ចិនអាចត្រូវចុះហត្ថលេខាក្នុងរយៈពេលប៉ុន្មានខែខាងមុខនេះ។ ប្រសិនបើប្រទេសទាំងពីរសំរេចបានកិច្ចព្រមព្រៀងនេះ គេសង្ឃឹមថាទំនាក់ទំនងកាណាដា-ចិនអាចខិតជិតគ្នាវិញ ព្រោះប្រទេសទាំងពីរនេះបានបែរខ្នងដាក់គ្នា ចាប់តាំងពីកាណាដាបានចោទប្រកាន់ចិនថា នៅពីក្រោយការវាយប្រហារតាមអ៊ិនធ័រណេត កាលពីខែកក្កដា ឆ្នាំ២០១៤ចូលលួចយកទិន្នន័យរបស់ក្រុមប្រឹក្សាស្រាវជ្រាវជាតិកាណាដា។ ប៉ុន្មានថ្ងៃក្រោយការចោទប្រកាន់នេះ រដ្ឋាភិបាលចិនបានចាប់ខ្លួនប្តីប្រពន្ធកាណាដាមួយគូ ដោយចោទថាពួកគេកំពុងធ្វើចារកម្មនៅក្នុងប្រទេសចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ