ប៉េកាំងពង្រាយកម្លាំងប៉ូលិសនៅតំបន់ស្វយ័តម៉ុងហ្គោលី
កងកម្លាំងរក្សាសុវត្ថិភាព យ៉ាងច្រើនសន្ធឹកសន្ធាប់ ត្រូវបានយកទៅដាក់ពង្រាយនៅតំបន់ស្វយ័តម៉ុងហ្គោលីខាងក្នុង ដែលស្ថិតនៅភាគខាងជើងប្រទេសចិន ដើម្បីទប់ទល់នឹងកម្លាំងបាតុកម្មរបស់ក្រុមជនជាតិភាគតិចម៉ុងហ្គោលី។ ជនជាតិភាគតិចម៉ុងហ្គោលី ដែលបានងើបបះបោរតាំងពីសប្តាហ៍មុនមក កំពុងបន្តប្រកូកប្រកាសប្រមូលផ្តុំបន្តទៀត ដើម្បីការពារសិទ្ធិ និងទឹកដីរបស់ពួកគេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៧
ម៉ុងហ្គោលីខាងក្នុង ឬខេត្តម៉ុងហ្គោលី (ខេត្តស្វយ័តមួយក្នុងចំណោមខេត្តស្វយ័តទាំង៥របស់សាធារណរដ្ឋប្រជាមានិតចិន) ស្ថិតក្នុងសភាពតានតឹងបំផុត ព្រោះជនជាតិភាគតិចម៉ុងហ្គោលីបានទទួលការអំពាវនាវ ឲ្យប្រមូលផ្តុំគ្នាជាថ្មីនៅក្នុងថ្ងៃចន្ទនេះ។ ប៉ូលិសក្នុងឯកសណ្ឋាន ប៉ូលិសប្រយុទ្ធប្រឆាំងនឹងអំពើហិង្សា បានចេញយាមល្បាត និងឈរជើងស្ទើរគ្រប់ទីតាំងសំខាន់ៗរបស់ខេត្ត។ កាលពីថ្ងៃសុក្រទី២៧ឧសភា មានការប៉ះទង្គិចគ្នាបន្តិចបន្តួចរួចមកហើយរវាងក្រុមប៉ូលិស ជាមួយក្រុមនិស្សិត និងអ្នកចិញ្ចឹមសត្វចៀម។
សាកលវិទ្យាល័យ ទីលានសាធារណៈ ត្រូវបានហាមឃាត់មិនឲ្យចេញចូលឡើយ អ្នកយកព័ត៌មានក៏មិនត្រូវអនុញ្ញាតឲ្យចូលទៅកាន់តំបន់រសើបនេះ ព្រោះអាជ្ញាធរក្រុងប៉េកាំងខ្លាចរអាខ្លាំង ក្រែងបាតុកម្មទាមទារសិទ្ធិ និងស្វ័យភាព ក្នុងនាមជាជនជាតិភាគតិចនេះ រាលដាលទៅជាចលនាបះបោរ ប្រឆាំងនឹងរដ្ឋាភិបាល ដោយយកគំរូតាមបដិវត្តន៍នៅក្នុងពិភពអារ៉ាប់។
សូមបញ្ជាក់ថា មិនធ្លាប់មានឡើយ ដែលជនជាតិភាគតិចម៉ុងហ្គោលីនៅប្រទេសចិន ងើបធ្វើចលនាបាតុកម្មបះបោរ ក្នុងទ្រង់ទ្រាយធំដូច្នេះ ! បាតុកម្មដែលបានផ្ទុះឡើង ដោយហេតុតែអ្នកបើកបររថយន្តដឹករ៉ែ ជាជនជាតិហាន (ជនជាតិភាគច្រើនរបស់ចិន) បានបុកកសិករអ្នកចិញ្ចឹមសត្វម្នាក់ស្លាប់។ ដើម្បីបុព្វហេតុការពារសិទ្ធិ និងទឹកដី តាំងពីថ្ងៃចន្ទទី ២៣ឧសភាមក ជនជាតិភាគតិចម៉ុងហ្គោលី បាននាំគ្នាធ្វើបាតុកម្ម នៅតាមចំណុចជាច្រើនរបស់ខេត្ត ហើយទំហំនៃបាតុកម្មនេះហាក់រីកធំឡើងៗ។ នេះបើយោងតាមអង្គការការពារសិទ្ធិមនុស្សម៉ុងហ្គោលីខាងត្បូងដែលមានទីស្នាក់ការនៅសហរដ្ឋអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ