អំពើហិង្សាថ្មី នៅតំបន់ស៊ីនជាំង ប្រទេសចិន
មានមនុស្សយ៉ាងហោចណាស់ ២១នាក់ ក្នុងនោះច្រើននាក់ប៉ូលិសផង បានស្លាប់នៅថ្ងៃអង្គារម្សិលមិញ ក្នុងការប៉ះទង្គិចហិង្សា នៅតំបន់ស្វយ័តស៊ីនជាំង ភាគខាងលិចបំផុតនៃប្រទេស។ នេះតាមប្រភពព័ត៌មានរបស់អាជ្ញាធរ។ ជាជនជាតិភាគតិច កាន់សាសនាអ៊ីស្លាម ក្រុមអ៊ុយហ្គួរ នៃតំបន់ស៊ីនជាំង តែងជាប់ចោទជាញឹកញាប់ ពីបទភេរវនិយម ពីសំណាក់ក្រុងប៉េកាំង បណ្តាជន តែងបរិហារតបវិញ ការគាបសង្កត់ និងបំបិទសេរីភាពវប្បធម៌និងសាសនារបស់អាជ្ញាធរចិន និងការឈ្លានពានរាតត្បាតកាន់តែខ្លាំងឡើងៗពីសំណាក់បណ្តាជនចិនដើមកំណើត “ហាន”។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
ចំនួនមនុស្សស្លាប់សរុប មានទាំងអស់ ២១នាក់ ! ក្នុងពេលផ្ទុះអំពើហិង្សាដំបូង មានអ្នកស្លាប់១៥នាក់ ខ្លះជាប៉ូលិស ខ្លះជាភ្នាក់ងាររដ្ឋការឃុំ បន្ទាប់មកទើបមានការប្រយុទ្ធគ្នា ដែលនៅខណៈនោះកងកម្លាំងប៉ូលិសបានបាញ់សម្លាប់ភេរវជន៦នាក់។ នេះបើតាមការប្រកាសរបស់អ្នកទទួលខុសត្រូវឃុំ Barchu នៃតំបន់ស៊ីនជាំង ដោយបានគូសបញ្ជាក់ថា ក្នុងចំណោមជនរងគ្រោះបាត់បង់ជីវិតភាគច្រើនជាជនជាតិវួយហ្គួរ (១៧នាក់)ប៉ុន្តែគ្មានតួលេខទាក់ទងនឹងចំនួនប៉ូលិសស្លាប់ទេ។
នៅលើប្រព័ន្ធអ៊ីនធឺណែត សារព័ត៌មាន Tianshan ដែលគ្រប់គ្រងដោយអាជ្ញាធរស៊ីនជាំង បានអះអាងថា អំពើហិង្សានេះបានផ្ទុះឡើង នៅពេលប៉ូលិសបើកប្រតិបត្តិការរុករកការលាក់អាវុធខុសច្បាប់ ទៅជួបនឹងក្រុងអ៊ុយហ្គួរកំពុង “ត្រៀមធ្វើសកម្មភាពភេរវកម្ម”។
តំបន់ស៊ីនជាំង បានជួបនឹងអំពើហិង្សាជាច្រើនលើកច្រើនសា ដោយហេតុតែភាពតានតឹងមិនចុះសម្រុងគ្នារវាង ជនជាតិដើម កាន់សាសនាអ៊ីស្លាម ជាជនជាតិភាគតិច អ៊ុយហ្គួរ និងពួក “ហាន” ជនជាតិភាគច្រើនរបស់ចិន។ ស្ទើរតែជាស្វ័យប្រវត្តិ អាជ្ញាធរ តែងចោទប្រកាន់ក្រុមជនជាតិភាគតិចអ៊ុយហ្គួរ ពីបទ “ភេរវនិយម”។ ឯចំណែកសហគមន៍ជនជាតិភាគតិចអ៊ុយហ្គួរ ដែលមានចំនួនសរុបប្រមាណជាង ៩លាននាក់ តែងតែប៉ះបោរ និងបរិហាររបបដឹកនាំក្រុងប៉េកាំង ថាបានប្រើនយោបាយគាបសង្កត់ និងបំបិទសេរីភាពសាសនា វប្បធម៌ និងបណ្តោយឱ្យពួកហាន ចូលលុកលុយរស់នៅកាន់តែច្រើនឡើងៗ ក្រោមរូបភាពអភិវឌ្ឍន៍សេដ្ឋកិច្ច តំបន់ក្រីក្រស៊ីនជាំង តែសម្បូរទៅធនធានធម្មជាតិក្រោមដី។
កាលពីខែកុម្ភៈឆ្នាំ២០១២ អំពើហិង្សាក្នុងតំបន់នេះ បានផ្តាច់ជីវិតមនុស្សអស់២០នាក់ និងជាង២០នាក់នៅឆ្នាំ២០១១ ហើយធ្ងន់ធ្ងរខ្លាំងនៅខែកក្កដាឆ្នាំ២០០៩ កណ្តាលរដ្ឋធានីស៊ីនជាំង ដែលកាលណោះមានស្លាប់ជិត២០០នាក់ និងរបួសជាង១៦០០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ