ចិនលើកពេលប្រារព្ធខួប៤០ឆ្នាំនៃការភ្ជាប់ទំនាក់ទំនងការទូតចិន-ជប៉ុន
ក្នុងពេលដែលជម្លោះដណ្តើមដែនកោះសេនកាគូ ឬ ទាវយូ បាននិងកំពុងធ្វើឱ្យទំនាក់ទំនងចិនជប៉ុន តានតឹងខ្លាំងនិងមើលមុខគ្នាមិនចំ នៅថ្ងៃអាទិត្យនេះ ក្រុងប៉េកាំងបានប្រកាសលើកពេលប្រារព្ធពិធីបុណ្យរំលឹកខួប៤០ឆ្នាំនៃទំនាក់ទំនងការទូតចិន-ជប៉ុន។ នេះបើតាមទីភ្នាក់ងារសារព័ត៌មានផ្លូវការចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
ប៉េកាំងគ្រោងរៀបចំពិធីបុណ្យ ឧទ្ទិសដល់ខួប៤០ឆ្នាំនៃការភ្ជាប់ទំនាក់ទំនងគ្នាឡើងវិញរវាងចិននិងជប៉ុន នៅថ្ងៃទី ២៧ កញ្ញា សប្តាហ៍ក្រោយនេះ ប៉ុន្តែដោយហេតុតែស្ថានភាពនាពេលបច្ចុប្បន្នតានតឹងខ្លាំង ភាគីចិនបានសម្រេចចិត្តថា ពិធីជាផ្លូវការនេះ ត្រូវតែលើកពេលទៅធ្វើនៅពេលក្រោយវិញ រហូតដល់មានបទបញ្ជាថ្មី ! នេះបើតាមសេចក្តីប្រកាសរបស់ទីភ្នាក់ងារសារព័ត៌មានចិនថ្មី ដែលបានព័ត៌មានពីអ្នកទទួលខុសត្រូវចិនទទួលបន្ទុកកិច្ចការមិត្តភាពជាមួយបរទេស តែសុំមិនបញ្ចេញឈ្មោះ។
នៅមុននេះបន្តិច ទីភ្នាក់ងារសារព័ត៌មានផ្លូវការជប៉ុន Jiji ក៏បានជូនព័ត៌មានដូចគ្នា និងបានបញ្ជាក់បន្ថែមថា អតីតរដ្ឋមន្ត្រីក្រសួងការបរទេសចិន នៅតែត្រៀមខ្លួនជានិច្ចនឹងជួបពិភាក្សាជាមួយតំណាងរបស់ជប៉ុន ប្រសិនបើតូក្យូនៅតែចង់រក្សាទំនាក់ទំនងរវាងគ្នា និងនៅតែបញ្ជូនប្រតិភូមកកាន់ប៉េកាំង។
ពីមុនមក ចិននិងជប៉ុន តែងសង្ឃឹមថា ពិធីបុណ្យរលឹកខួប៤០ឆ្នាំនេះ នឹងអាចនាំ ប្រទេសទាំងពីរឱ្យមានទំនាក់ទំនងល្អគ្នាកាន់តែខ្លាំងឡើង ប៉ុន្តែបើតាមប្រសាសន៍របស់អ្នកនាំពាក្យរបស់ក្រសួងការបរទេសចិន ទំនាក់ទំនងប្រទេសទាំងពីរធ្លាក់ដុបដាបខ្លាំងក្នុងពេលនេះ កំហុសទាំងស្រុងគឺមកបណ្តាលមកពីជប៉ុន។ រដ្ឋាភិបាលជប៉ុនប្រមូលទិញកោះសេនកាគូ ឬទាវយូជាភាសាចិន ក្នុងសមុទ្ទចិនខាងកើតមកធ្វើជាសម្បត្តិរដ្ឋ។
ការប្រមូលទិញកោះជាប់ជម្លោះ ដែលបានរាលដាលជាជម្លោះការទូត និងប៉ះពាល់យ៉ាងខ្លាំងដល់ផលប្រយោជន៍សេដ្ឋកិច្ចប្រទេសទាំងពីរ។ បាតុកម្មធំៗប្រឆាំងជប៉ុន និងពេលខ្លះហិង្សាផងបានផ្ទុះឡើងនៅតាមក្រុងជាច្រើនក្នុងប្រទេសចិន កាលពីចុងសប្តាហ៍មុនបានជំរុញឱ្យក្រុមហ៊ុន និងរោងចក្រជប៉ុននៅចិនបិទទ្វារជាបណ្តោះអាសន្ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ