សហព្រះរាជអាជ្ញាអន្តរជាតិ ស្នើឲ្យបើកការស៊ើបអង្កេតបន្ថែមលើសំណុំរឿង០០៤
សហព្រះរាជអាជ្ញាអន្តរជាតិ លោក អាន់ឌ្រូ ឃេលី ( Andrew Cayley ) បានជំរុញឲ្យសហចៅក្រមស៊ើបអង្កេត បើកការស៊ើបសួរបន្ថែមលើសំណុំរឿងលេខ ០០៤។ ក្នុងសេចក្តីថ្លែងការណ៍នៅថ្ងៃព្រហស្បតិ៍នេះ សហព្រះរាជអាជ្ញាអន្តរជាតិ បានលើកឡើងថា ដីកាសន្និដ្ឋានបញ្ជូនរឿងឲ្យស៊ើបសួរបន្ថែម មានបន្ថែមនូវឧក្រិដ្ឋកម្មនានា ក្នុងសំណុំរឿងលេខ ០០៤ ដោយរួមទាំងឧក្រិដ្ឋកម្ម ដែលត្រូវបានប្រព្រឹត្តចំពោះប្រជាជនខ្មែរក្រោម នៅខេត្តតាកែវ និងខេត្តពោធិ៍សាត់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៦
បន្ទាប់ពីសំណុំរឿង ០០៣ ដ៏ចម្រូងចម្រាស នៅសាលាក្តីខ្មែរក្រហម ឥឡូវនេះចូលដល់ករណី ០០៤។ នោះគឺសហព្រះរាជអាជ្ញាអន្តរជាតិ បានជំរុញឲ្យសហចៅក្រមស៊ើបអង្កេត បើកការស៊ើបសួរបន្ថែមលើសំណុំរឿងលេខ ០០៤។
សេចក្តីថ្លែងការណ៍ ចេញផ្សាយនៅរសៀលថ្ងៃទី១៦មិថុនា ឆ្នាំ២០១១ របស់សហព្រះរាជអាជ្ញាអន្តរជាតិ លោក អាន់ឌ្រូ ឃេលី បានបង្ហាញថា សំណើថ្មីរបស់ខ្លួននេះ ដើម្បីឲ្យប្រាកដថា សាធារណជនបានជ្រួតជ្រាបត្រឹមត្រូវអំពីកិច្ចការដំណើរការនីតិវិធីរបស់សាលាក្តីខ្មែរក្រហម ដែលកំពុងតែប្រព្រឹត្តទៅក្នុងសំណុំរឿងលេខ ០០៤ និងដើម្បីជាផលប្រយោជន៍របស់ជនរងគ្រោះ សាក្សី សិទ្ធិរបស់ជនសង្ស័យ និងលក្ខខណ្ឌតម្រូវនានានៃកិច្ចស៊ើបសួរ។
ជាមួយនឹងការលើកឡើងដូច្នេះ សហព្រះរាជអាជ្ញាអន្តរជាតិ បានប្រកាសថា ខ្លួនបានដាក់សំណើសុំឲ្យបំពេញការស៊ើបសួរ និងដីកាសន្និដ្ឋានបញ្ជូនរឿងឲ្យស៊ើបសួរបន្ថែមនៅក្នុងសំណុំរឿងលេខ ០០៤ ទៅកាន់ការិយាល័យសហចៅក្រមស៊ើបអង្កេត កាលពីថ្ងៃ១៥មិថុនាម្សិលមិញ។ ដីកាសន្និដ្ឋានបញ្ជូនរឿងឲ្យស៊ើបសួរបន្ថែមនេះ មានបន្ថែមនូវឧក្រិដ្ឋកម្មនានា ទៅក្នុងសំណុំរឿងលេខ ០០៤ ដោយរួមទាំងឧក្រិដ្ឋកម្មផ្សេងៗ ដែលត្រូវបានប្រព្រឹត្តចំពោះប្រជាជនខ្មែរក្រោម នៅខេត្តតាកែវ និងខេត្តពោធិ៍សាត់ ដោយមានមូលដ្ឋានជាបឋមនៅលើពាក្យសុំតាំងខ្លួនជាដើមបណ្តឹងរដ្ឋប្បវេណី និងភស្តុតាងថ្មីៗដទៃទៀត។
សហព្រះរាជអាជ្ញាអន្តរជាតិ ក៏បានស្នើសុំឲ្យសហចៅក្រមស៊ើបអង្កេតធ្វើការជូនដំណឹងដល់សាធារណជន និងដើមបណ្តឹងរដ្ឋប្បវេណីសក្តានុពលនានា អំពីទីតាំងឧក្រិដ្ឋកម្មជាក់លាក់ទាំងឡាយ ដែលមានបញ្ចូលនៅក្នុងដីកាសន្និដ្ឋានបញ្ជូនរឿងឲ្យស៊ើបសួរ និងទាំងនៅក្នុងដីកាសន្និដ្ឋានបញ្ជូនរឿងឲ្យស៊ើបសួរបន្ថែមនៃសំណុំរឿងលេខ ០០៤។
រហូតមកដល់ពេលនេះ សំណុំរឿងលេខ ០០៤ មិនត្រូវបានគេបង្ហាញព័ត៌មានឲ្យដឹងសោះឡើយ។ ក៏ប៉ុន្តែតាមសេចក្តីរាយការណ៍កន្លងមក សំណុំរឿង០០៣ និង០០៤ មានអតីតមេដឹកនាំខ្មែរក្រហម ៥ រូប ផ្សេងទៀត ដែលប្រឈមនឹងការចោទប្រកាន់ និងនាំមកកាត់ទោសក្នុងរឿងសម្លាប់មនុស្សនៅសម័យខ្មែរក្រហម។
យ៉ាងណាក៏ដោយ លោក ឌឹម សុវណ្ណារុំ មន្ត្រីទទួលបន្ទុកផ្នែកកិច្ចការសាធារណៈ របស់សាលាក្តីខ្មែរក្រហម បានលើកឡើងថា សហចៅក្រមស៊ើបអង្កេត បានទទួលរួចហើយនូវសំណើរបស់សហព្រះរាជអាជ្ញាអន្តរជាតិ។ សហចៅក្រមស៊ើបអង្កេត នៅពេលនេះ ក៏កំពុងធ្វើការលើសំណុំរឿង០០៤។ ម្យ៉ាងទៀត ដំណើរស៊ើបអង្កេតលើរឿងនេះ សហចៅក្រម ធ្វើការដោយឯករាជ្យ និងជាការសម្ងាត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ