សំណុំរឿងព្រះវិហារនៅតុលាការអន្តរជាតិ៖ សវនាការថ្ងៃទី១
នៅថ្ងៃចន្ទ ៣០ ឧសភា ២០១១នេះ តុលាការយុត្តិធម៌អន្តរជាតិ (តុលាការក្រុងឡាអេ) បើកសវនាការសាធារណៈ ដើម្បីជំនុំជម្រះបណ្តឹងរបស់កម្ពុជា ដែលបានប្តឹងសុំឲ្យតុលាការបកស្រាយសាលក្រម ឆ្នាំ១៩៦២ ស្តីពីបញ្ហាព្រះវិហារ។ ភ្ជាប់ជាមួយបណ្តឹងសុំបកស្រាយនេះ កម្ពុជាក៏បានស្នើសុំផងដែរឲ្យតុលាការចាត់វិធានការបន្ទាន់ ដើម្បីការពារប្រាសាទព្រះវិហារ និងការពារសិទ្ធិរបស់កម្ពុជា ក្នុងពេលរង់ចាំតុលាការចេញសេចក្តីសម្រេច ស្តីពីការបកស្រាយសាលក្រម។ ដោយបណ្តឹងសុំចាត់វិធានការបន្ទាន់ គឺជាសំណុំរឿងមានអាទិភាពខ្ពស់ជាងគេ នៅក្នុងសវនាការថ្ងៃ៣០ និងថ្ងៃ៣១ ឧសភា ២០១១នេះ តុលាការក្រុងឡាអេ នឹងជំនុំជម្រះតែទៅលើបណ្តឹងសុំចាត់វិធានការបន្ទាន់នេះតែប៉ុណ្ណោះ ដោយមិនទាន់ពិនិត្យលើបណ្តឹងសុំបកស្រាយសាលក្រមនោះទេ។នៅក្នុងសវនាការពេញមួយថ្ងៃទី៣០ ឧសភានេះ តុលាការបានទុកពេលឲ្យកម្ពុជា និងថៃ ម្នាក់ ២ម៉ោង ដើម្បីឡើងឆ្លើយការពារខ្លួនចំពោះមុខអង្គជំនុំជម្រះ។ កម្ពុជាបានឡើងឆ្លើយនៅពេលព្រឹក ហើយថៃបានឡើងឆ្លើយនៅពេលរសៀល។ នៅថ្ងៃទី៣១ ឧសភា តុលាការនឹងទុកពេលឲ្យភាគីនីមួយៗអាចឆ្លើយបកទៅនឹងអ្វី ដែលភាគីមួយទៀតបានលើកក្នុងអង្គសវនាការ កាលពីថ្ងៃទី៣០។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៨:២០
