សម្តេចព្រះ នរោត្តម សីហនុសោយទីវង្គត ក្នុងព្រះជន្ម ៩០ ព្រះវស្សា
អតីតព្រះមហាក្សត្រកម្ពុជា សម្តេចព្រះ នរោត្តម សីហនុ បានយាងចូលព្រះទីវង្គត កាលពីវេលាម៉ោង១និង២០នាទី យប់រំលងអធ្រាត្រ ម៉ោង នៅទីក្រុងភ្នំពេញ នាថ្ងៃទី១៥ ខែតុលា ឆ្នាំ២០១២ ក្នុងព្រះជន្មាយុ ៩០ ព្រះវស្សា ដោយព្រះជរាពាធ នៅមន្ទីរពេទ្យ ទីក្រុងប៉េកាំង ប្រទេសចិន។ នេះបើតាមសេចក្តីប្រកាសរបស់រដ្ឋាភិបាលកម្ពុជា។ សេចក្តីប្រកាស ដែលបានចេញផ្សាយកាលពីព្រឹកព្រលឹម ថ្ងៃចន្ទ ទី១៥តុលានេះ បានជម្រាបដល់ជនរួមជាតិថា រាជរដ្ឋាភិបាលកម្ពុជានឹងដង្ហែព្រះសពរបស់សម្តេចឪ ពីប្រទេសចិន មកកាន់រាជធានីភ្នំពេញ ដើម្បីតម្កល់និងប្រារព្ធព្រះរាជពិធីបុណ្យតាមប្រពៃណីជាតិ នៅព្រះបរមរាជវាំង។ គ្រាន់តែទទួលដំណឹងនៃការយាងចូលទីវង្គតរបស់សម្តេចឪ ភ្លាម នៅព្រឹកព្រលឹមថ្ងៃចន្ទនេះ ព្រះមហាក្សត្រ សម្តេចព្រះ នរោត្តម សីហមុនី និងលោកនាយករដ្ឋមន្ត្រី ហ៊ុន សែន បានចាកចេញពីភ្នំពេញ ទៅកាន់ប៉េកាំង ដោយព្រះទ័យនិងទឹកចិត្តស្រងូតស្រងាត់ ក្តុកក្តួល រហូតដល់ស្រក់ទឹកភ្នែក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៤៤
ក្នុងពេលជូនព្រះរាជដំណើរព្រះមហាក្សត្រ សម្តេចព្រះ នរោត្តម សីហមុនី ព្រះរាជបុត្រ របស់សម្តេចឪ និងលោកនាយករដ្ឋមន្ត្រី ហ៊ុន សែន ឡើងយន្តហោះ ទៅកាន់ទីក្រុងប៉េកាំង នៅព្រឹកមិញ គឺស្ថិតក្នុងទិដ្ឋភាពក្រៀមក្រំក្រៃលែង។ នាម៉ឺនសព្វមុខមន្ត្រី គ្រប់ៗគ្នា ស្ថិតក្នុងទឹកមុខស្រងូតស្រងាត់ និងយំខ្សឹកខ្សួល។ គ្រាន់តែចុះពីឡានភ្លាម ព្រះករុណា សម្តេចព្រះ នរោត្តម សីហមុនី បានស្ទុះអោបលោកនាយករដ្ឋមន្ត្រី ហ៊ុន សែន និងយំដោយក្តីរន្ធត់។
ព្រះករុណាត្រូវយាង និងទទួលនូវការទូលចូលរួមរំលែកទុក្ខពីមន្ត្រីម្តងម្នាក់ៗ រួមទាំងរាជវង្សានុវង្ស ដែលបានថ្វាយព្រះរាជដំណើរព្រះអង្គ នៅព្រឹកមិញ។ ព្រះករុណាព្រះមហាក្សត្រ និងលោកនាយករដ្ឋមន្ត្រី ហ៊ុន សែន យាង និងអញ្ជើញទៅប៉េកាំងព្រឹកមិញ ដើម្បីដង្ហែរព្រះសពរបស់សម្តេចឪ ពីប្រទេសចិន មកកាន់រាជធានីភ្នំពេញ ដើម្បីតម្កល់ និងប្រារព្ធព្រះរាជពិធីបុណ្យតាមប្រពៃណីជាតិ នៅព្រះបរមរាជវាំង។ តែមិនទាន់មានកាលកំណត់ច្បាស់លាស់នៅឡើយទេ។ ប៉ុន្តែតាមមន្ត្រីរដ្ឋាភិបាល ព្រះសពសម្តេចឪ អាចនឹងដង្ហែរមកដល់ភ្នំពេញ នៅរសៀលថ្ងៃទី១៧តុលា ខានស្អែក។
បន្ទាប់ពីទទួលដំណឹងពីការសោយទីវង្គតរបស់សម្តេចឪ គឺរដ្ឋាភិបាល បានដាក់បញ្ជាឲ្យមានការបង្ហូតទង់ជាតិ ត្រឹមពាក់កណ្តាលដង ដើម្បីជាការកាន់ទុក្ខ ថ្វាយដល់សម្តេចឪ នរោត្តម សីហនុ។
នៅព្រឹកមិញនេះដែរ គណៈរដ្ឋមន្ត្រី បានបើកកិច្ចប្រជុំបន្ទាន់មួយ មុននឹងចេញសារាចរណែនាំ ស្តីពី ការរៀបចំព្រះរាជពិធីបុណ្យសព ថ្វាយសម្តេចឪ។ កិច្ចប្រជុំ ដែលមានក្រសួងពាក់ព័ន្ធក្នុងរដ្ឋាភិបាល ចូលរួមនោះ បានលើកឡើងពីការបញ្ជូន និងការដង្ហែរព្រះសពរបស់ព្រះករុណាសម្តេចឪ មកពីទីក្រុងប៉េកាំង រហូតដល់យកទៅតម្កល់ធ្វើបុណ្យ ក្នុងព្រះបរមរាជវាំងក្នុងទីក្រុងភ្នំពេញ។
តែចំពោះមុខនេះ រដ្ឋាភិបាលនឹងរៀបចំព្រះរាជពិធីបុណ្យកាន់មរណទុក្ខ ថ្វាយព្រះករុណាសម្តេចឪ រយៈពេល ៧ ថ្ងៃ ព្រមទាំងមានការចាត់ចែង ឲ្យបន្តកាន់ទុក្ខ ដោយតម្កល់ព្រះសពសម្តេចឪ ទុកក្នុងរយៈពេល ៩០ ថ្ងៃ មុននឹងបូជាតាមប្រពៃណីជាតិ។
យ៉ាងណាក៏ដោយ មន្ត្រីរដ្ឋាភិបាល បានអះអាងថារដ្ឋាភិបាលត្រូវរៀបចំ ចាត់ចែងព្រះរាជពិធីបុណ្យសពថ្វាយសម្តេចឪ សម្តេចព្រះ នរោត្តម សីហនុ ឲ្យស្របទៅតាមប្រពៃណីជាតិផង និងស្របតាមព្រះរាជបណ្តាំរបស់ព្រះអង្គផងដែរ។
កាលពីដើមឆ្នាំនេះ អតីតព្រះមហាក្សត្រ សម្តេចឪ នរោត្តម សីហនុ បានព្រះរាជសំណេរ នៅក្នុងព្រះរាជសារ ដើម្បីផ្តាំផ្ញើអោយរៀបចំព្រះរាជពិធីបូជាព្រះសពរបស់ព្រះអង្គ ក្រោយពេលព្រះអង្គសោយទីវង្គត។ ព្រះរាជបណ្តាំនោះ ត្រូវបានព្រះអង្គសរសេរខ្លីៗ ជាភាសាបារាំង មាន ៣ ចំណុច។ ទី១ គឺព្រះអង្គបញ្ជាក់ពីការលុបចោលព្រះរាជបណ្តាំមុនៗ ដែលព្រះអង្គ ធ្លាប់ប្រកាសថា មិនអោយគេបូជាព្រះសពរបស់ព្រះអង្គ។
ទី២ នៅពេលដែលព្រះអង្គ សោយទីវង្គត ព្រះអង្គផ្តាំអោយមានការរៀបចំពិធីបូជាព្រះសពរបស់ព្រះអង្គ នៅលើវាលមេរុ ទៅតាមប្រពៃណីសាសនាខ្មែរ និងទី៣ មួយថ្ងៃ បន្ទាប់ពីពិធីបូជាព្រះសព ព្រះអង្គបានផ្តាំផ្ញើថា អដ្ឋិធាតុរបស់ព្រះអង្គ ត្រូវលាងសំអាត ហើយដាក់នៅក្នុងកោដមួយ ជាកោដធ្វើអំពីមាសក៏បាន ឬកោដធម្មតាក៏បាន។ ព្រះរាជសារ របស់ព្រះករុណា សម្តេចព្រះ នរោត្តម សីហនុ កាលណោះ ក៏បានលើកឡើងថា កោដនោះ ត្រូវយកទៅតំកល់នៅក្នុងចេតីយគន្ធបុប្ជា នៅក្នុងព្រះវិហារព្រះកែវមរកត ក្នុងព្រះបរមរាជវាំង។
សម្តេចព្រះ នរោត្តម សីហនុ ក៏បានបញ្ជាក់ក្នុងព្រះរាជសារដដែលថា នៅពេលដែលសម្តេចម៉ែ សោយទីវង្គត ព្រះអង្គក៏សូមអោយគេរៀបចំធ្វើដូចករណីរបស់ព្រះអង្គដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ