ហិបប្រាក់របស់អង្គការមូលនិធិរូបិយវត្ថុអន្តរជាតិកើនឡើងទ្វេដង
ជាលទ្ធផលគួរឱ្យអបអរ! នៅពេលបិទបញ្ចប់ជំនួបកំពូលនៃក្រុមប្រទេសមហាឧស្សាហកម្ម និងប្រទេសមានសេដ្ឋកិច្ចលូតលាស់ខ្លាំង ហៅកាត់ថា ហ្សេ ២០ នៅក្រុងវ៉ាស៊ីនតោន អង្គការមូលនិធិរូបិយវត្ថុអន្តរជាតិ (IMF) សម្រេចប្រមូលមូលនិធិចូលហិបបាន លើសពី៤៣០ពាន់លានដុល្លារបន្ថែមទៀត។ កញ្ចប់ថវិកាដែលតំបន់អឺរ៉ូ និងប្រទេសជាសមាជិក ទាំងជាង២០ប្រទេស បានសន្យាបង់ចូលហិបអង្គការមូលនិធិរូបិយវត្ថុអន្តរជាតិនេះ គឺជាអាវុធដ៏មោះមុតសំរាប់ការពារសេដ្ឋកិច្ចពិភពលោក ទល់នឹងវិបត្តិក្នុងតំបន់អឺរ៉ូ និងកំណើនសេដ្ឋកិច្ចបន្ថយល្បឿននៅតំបន់អាស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
ការព្រមព្រៀងគ្នា នៅយប់មិ្សលមិញ សន្យាបង្កើនថវិកាក្នុងហិបមូលនិធិបានជាង៤៣០ពាន់លានដុល្លារសហរដ្ឋអាមេរិក បញ្ជាក់យ៉ាងច្បាស់អំពីចេតនាមោះមុតរបស់សហគមន៍អន្តរជាតិ ក្នុងស្វែងរកអាវុធសំរាប់ទប់ទល់និងការពារ ប្រឆាំងនឹងវិបត្តិសេដ្ឋកិច្ច ! នេះជាការថ្លែងកោតសរសើររបស់លោកស្រីអគ្គនាយិកាអង្គការមូលនិធិរូបិយវត្ថុអន្តរជាតិ។ ថវិកាដែលប្រទេសសមាជិកបានសន្យាបង់ចូលក្នុងហិបនេះ ពាក់កណ្តាលបានមកពីអឺរុប។ ចំណែកប្រទេសចិនវិញ មិនឈរឱបដៃនៅស្ងៀមមើលផែនការបង្កើនហិបមូលនិធិឡើយ ប៉ុន្តែធនាគារប្រជាមានិតចិនមិនបានបញ្ជាក់ឡើយអំពីចំនួនទឹកប្រាក់ដែលអាជ្ញាធរក្រុងប៉េកាំងត្រៀមបង់ចូលហិបមូលនិធិនោះ។ ដោយឡែកប្រទេសកាណាដា មិនចូលរួមចំណែកទេ ព្រោះយល់ថាមិនចាំបាច់។
ជាមួយនឹងការអបអរសាទរ ការបង្កើនកញ្ចប់ថវិកា បានដូចការគ្រោងទុក រហូតអាចមានសមត្ថភាពផ្តល់ប្រាក់កម្ចីបានជិតទ្វេដង អង្គការមូលនិធិរូបិយវត្ថុក៏បានបោះផ្សាយរបាយការណ៍មួយព្រមាន អំពីសកម្មភាពសេដ្ឋកិច្ចដើរយឺតៗ នៅត្រីមាសទីបួនឆ្នាំ ២០១១ ដែលអាចនឹងបន្តអូសបន្លាយក្នុងឆ្នាំ២០១២។ ពោលគឺឆ្នាំនេះ កំណើនសេដ្ឋកិច្ចពិភពលោកមានកំរិតត្រឹមតែ៦%ប៉ុណ្ណោះ។
៦% ជាអត្រាខ្ពស់ណាស់សំរាប់តំបន់អឺរ៉ុប និងសហរដ្ឋអាមេរិក ប៉ុន្តែជាសារបញ្ជាក់ពីកំណើនសេដ្ឋកិច្ចយឺតៗនៅតំបន់អាស៊ី។ ដោយហេតុវិបត្តិហិរញ្ញវត្ថុ នៅអឺរ៉ុបនិងអាមេរិក ទីផ្សារនាំចេញរបស់អាស៊ី មានជាអាទិ៍ជប៉ុន ចិន និងឥណ្ឌា ទទួលរងផលប៉ះពាល់យ៉ាងខ្លាំង។ ម្យ៉ាងវិញទៀត ប្រេងឥន្ធនៈឡើងថ្លៃ គ្រោះមហន្តរាយធម្មជាតិ ទឹកជំនន់ រញ្ជួយដីនៅហ្វូគូស្ហ៊ីម៉ា សុទ្ធសឹងជាកត្តាដែលរំខានដល់កំណើនសេដ្ឋកិច្ចនៅអាស៊ីដែរ។ ប៉ុន្តែទោះជាយ៉ាងដូច្នេះក្តី ក៏អង្គការមូលនិធិរូបិយវត្ថុអន្តរជាតិនៅតែមានសុទិដ្ឋិនិយម ថាវិស័យធនាគារអាស៊ីនៅតែមានសុខភាពរឹងមាំ ធន់នឹងព្យុះហិរញ្ញវត្ថុដែលបានបោកបក់លើតំបន់អឺរ៉ូបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ