ប្រមុខការទូតបារាំងទស្សនកិច្ចអ៊ីស្រាអែលបន្តពីប៉ាឡេស្ទីន
នៅថ្ងៃអាទិត្យនេះ រដ្ឋមន្ត្រីការបរទេសបារាំង លោក Laurent Fabius បានបំពេញទស្សនកិច្ចនៅអ៊ីស្រាអែល ដើម្បីជួយជំរុញសន្ទុះនៃដំណើរការចរចាស្វែងរកសន្តិភាពរវាងអ៊ីស្រាអែលនិងប៉ាឡេស្ទីន។ ក្នុងប្រធានបទដូចគ្នានេះ ប្រមុខការទូតបារាំងទើបតែបានបំពេញទស្សនកិច្ចនៅប៉ាឡេស្ទីន កាលពីថ្ងៃសៅរ៍ម្សិលមិញនេះ ដោយបានជួបជាមួយប្រធានរដ្ឋអំណាច ម៉ាមូដ អាបាស ព្រមទាំងបានសន្យាថាបារាំងនឹងជួយជាថវិកា៩លានអឺរ៉ូដល់ប៉ាឡេស្ទីន ក្នុងពេលឆាប់ៗខាងមុខនេះទៀតផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
បន្ទាប់ពីបានបំពេញទស្សនកិច្ចនៅប៉ាឡេស្ទីន ជួបជាមួយប្រធានរដ្ឋអំណាច ម៉ាមូដ អាបាស កាលពីថ្ងៃសៅរ៍រួចមក នៅថ្ងៃអាទិត្យនេះ រដ្ឋមន្ត្រីការបរទេសបារាំង លោក Laurent Fabius បានធ្វើដំណើរមកកាន់អ៊ីស្រាអែល ដើម្បីបន្តបេសកម្មជំរុញលើកទឹកចិត្តដល់ដំណើរការចរចាស្វែងរកសន្តិភាពរវាងអ៊ីស្រាអែលនិងប៉ាឡេស្ទីន។
Laurent Fabius ជួបជាមួយប្រធានាធិបតី Shimon Peres និងនាយករដ្ឋមន្ត្រីBenyamin Netanyahu ព្រមទាំងលោកស្រី Tzipi Livni ដែលជានាយករដ្ឋមន្ត្រីក្រសួងយុត្តិធម៌ ទទួលបន្ទុកកិច្ចចរចាជាមួយប៉ាឡេស្ទីនផងដែរ។ កាលពីល្ងាចថ្ងៃសៅរ៍ ប្រមុខការទូតបារាំងបានពិភាក្សាជាមួយលោក Yuval Steinitz ប្រមុខការទូតអ៊ីស្រាអែលរួចមកហើយ ពីកិច្ចចរចារវាងអ៊ីស្រាអែលនិងប៉ាឡេស្ទីន ពិសេសពីបញ្ហាសាងសង់លំនៅដ្ឋានក្នុងតំបន់អាណានិគម និងការណែនាំរបស់សហភាពអឺរ៉ុបដែលចង់អោយមានការបែងចែកអោយឃើញពីភាពខុសគ្នារវាងអ៊ីស្រាអែល និងដែនដីដែលអ៊ីស្រាអែលកាន់កាប់។ គួររំលឹកថា អ៊ីស្រាអែលមានការថ្នាំងថ្នាក់ជាមួយសហភាពអឺរ៉ុប ព្រោះសហភាពអឺរ៉ុបមិនចង់ជួយថវិកាជនជាតិអ៊ីស្រាអែលដែលមានវត្តមាននៅក្នុងតំបន់ដែលអ៊ីស្រាអែលកាន់កាប់ និងជនជាតិអ៊ីស្រាអែលដែលធ្វើការនៅក្នុងតំបន់អាណានិគមទាំងនោះទេ។
ដោយឡែក ចាប់តាំងពីអ៊ីស្រាអែល និងប៉ាឡេស្ទីន បានត្រលប់មកចរចាស្វែងរកសន្តិភាពជាមួយគ្នាឡើងវិញ កាលពីពាក់កណ្តាលខែកក្កដាមក ពុំទាន់មានភាគីណាមួយដើរចេញពីតុចរចានៅឡើយទេ។ ដូច្នេះ សំរាប់បារាំងដែលចង់ឃើញជោគជ័យនៃការចរចា នេះគឺជាសញ្ញាដ៏ល្អមួយ។ ទោះយ៉ាងនេះក្តី លោកស្រី Livni តំណាងភាគីចរចាអ៊ីស្រាអែល បានប្រាប់ថា ការចរចានេះជួនកាលមានភាពតឹងតែង ហើយនៅទីបញ្ចប់ អ៊ីស្រាអែលនឹងត្រូវត្រៀមធ្វើការលះបង់មួយដ៏ធំ។ ប៉ុន្តែ លោកស្រី Livni មិនបានប្រាប់ថា តើការលះបង់នោះជាអ្វីនោះទេ។ ខាងភាគីចរចាប៉ាឡេស្ទីនវិញ បានប្រាប់ថា អ៊ីស្រាអែលមិនយកចិត្តទុកដាក់ក្នុងការចរចាសោះឡើយ។
ទោះជាកិច្ចចរចាភាគីទាំងពីរប្រព្រឹត្តទៅដូចម្តេចក្តី គេរំពឹងថា ទស្សនកិច្ចប្រមុខការទូតបារាំងនៅអ៊ីស្រាអែល អាចមានទិសដៅផ្សេងទៀត។ ព្រោះថា ប្រទេសជិតខាងអ៊ីស្រាអែល ដូចជាអេហ្ស៊ីប លីបង់ និងស៊ីរី កំពុងតែជួបវិបត្តិ។ បារាំងចង់អោយមានប្រតិបត្តិការយោធាជាអន្តរជាតិមួយនៅស៊ីរី។ ដូច្នេះ បារាំងអាចត្រូវការជំនួយពីអ៊ីស្រាអែល ព្រោះថាអ៊ីស្រាអែលស្ថិតនៅមុខគេ ក្នុងការប្រឈមនឹងការវាយប្រហារពីសំណាក់ស៊ីរី និងពីក្រុមអេស្បួឡាលីបង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ