ប្រធានាធិបតីអាហ្វហ្កានីស្ថាននឹងទៅប៉ាគីស្ថានថ្ងៃចន្ទ សុំអោយដោះលែងអ្នកទោសតាលីបង់
នៅថ្ងៃចន្ទដើមសប្តាហ៍ក្រោយនេះ ប្រធានាធិបតីអាហ្វហ្កានីស្ថាន លោក អាមីដ កាហ្សៃ នឹងធ្វើដំណើរទៅបំពេញទស្សនកិច្ចនៅប្រទេសប៉ាគីស្ថាន។ ទិសដៅនៃទស្សនកិច្ចនេះ មិនត្រឹមតែពង្រឹងនិងផ្សះផ្សារទំនាក់ទំនងរវាងប្រទេសទាំងពីរឡើងវិញនោះទេ។ ទិសដៅចំបងគឺថា លោកកាហ្សៃនឹងសុំអោយរដ្ឋាភិបាលប៉ាគីស្ថានដោះលែងអ្នកទោសតាលីបង់ជាច្រើនរូបផងដែរ។ ប្រធានាធិបតីអាហ្វហ្កានីស្ថានសង្ឃឹមថា អ្នកទោសតាលីបង់អាចជួយរូបលោក ក្នុងការបញ្ចុះបញ្ចូលក្រុមឧទ្ទាមតាលីបង់អោយយល់ព្រមចរចាសន្តិភាពជាមួយរដ្ឋាភិបាលអាហ្វហ្កានីស្ថាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
ទស្សនកិច្ចប្រធានាធិបតីអាហ្វហ្កានីស្ថាន គឺលោក អាមីដ កាហ្សៃ នៅប៉ាគីស្ថាន នៅថ្ងៃចន្ទខាងមុខនេះ មានទិសដៅច្បាស់លាស់ណាស់៖ គឺថាលោក អាមីដ កាហ្សៃ នឹងសុំអោយប៉ាគីស្ថានដោះលែងអ្នកទោសតាលីបង់ជាច្រើនរូបបន្ថែមទៀត។ ប៉ាគីស្ថានធ្លាប់បានដោះលែងអ្នកទោសតាលីបង់ចំនួនសរុប ២៦នាក់ ពីរលើករួចមកហើយ កាលពីចុងឆ្នាំ២០១២។ លោក កាហ្សៃ សង្ឃឹមថា អ្នកទោសតាលីបង់ទាំងអស់នេះ នឹងជួយអោយក្រុមឧទ្ទាមតាលីបង់ព្រមចរចាសន្តិភាពជាមួយរដ្ឋាភិបាលលោក។
ប៉ាគីស្ថានត្រូវបានគេចាត់ទុកថា មានឥទ្ធិពល និងដើរតួនាទីសំខាន់ ក្នុងការបញ្ចប់ជម្លោះនៅអាហ្វហ្កានីស្ថាន ដែលមានរយៈពេល១២ឆ្នាំ កន្លងមកនេះ។ ជាពិសេសនៅពេលដែលអាហ្វហ្កានីស្ថានជិតរៀបចំការបោះឆ្នោតប្រធានាធិបតី នៅឆ្នាំ២០១៤ខាងមុខ។ ឆ្នាំ២០១៤ក៏ជាឆ្នាំ ដែលកងទ័ពអង្គការអូតង់ភាគច្រើន ក្នុងចំណោមកងទ័ពអង្គការអូតង់សរុប ៨ម៉ឺន៧ពាន់នាក់ ត្រូវចាកចេញពីអាហ្វហ្កានីស្ថានផងដែរ។
ប៉ាគីស្ថានគឺជាដៃគូប្រវត្តិសាស្ត្ររបស់ក្រុមឧទ្ទាមតាលីបង់ នៅអាហ្វហ្កានីស្ថាន។ ប៉ាគីស្ថានបានជួយអោយក្រុមតាលីបង់បានកាន់កាប់ក្រុងកាប៊ូល នៅឆ្នាំ១៩៩៦។ សមាជិកក្រុមឧទ្ទាមតាលីបង់ជាច្រើននាក់ បានទៅជ្រកកោននៅប៉ាគីស្ថាន នៅចុងឆ្នាំ២០០១ ពិសេសបន្ទាប់ពីពេលដែលអាមេរិកនិងបណ្តាបស្ចិមប្រទេស បានផ្តួលរំលំ ការត្រួតត្រាខ្លួននៅអាហ្វហ្កានីស្ថានមក។
ចាប់តាំងពីក្លាយជាដៃគូរបស់អាមេរិកនៅឆ្នាំ២០០១មក ប៉ាគីស្ថានបានសហការចាប់ខ្លួនសមាជិកសំខាន់ៗនៃក្រុមតាលីបង់ជាច្រើនរូប។ អ្នកទោសតាលីបង់នៅប៉ាគីស្ថានបានក្លាយជាឧបករណ៍សំខាន់សំរាប់រដ្ឋាភិបាលប៉ាគីស្ថាន នៅចំពោះមុខអាហ្វហ្កានីស្ថាន និងសហរដ្ឋអាមេរិក ដែលបានប្រែឥរិយាបថមកចង់ចរចាជាមួយក្រុមតាលីបង់វិញ។
អាហ្វហ្កានីស្ថានចង់អោយប៉ាគីស្ថានដោះលែងអ្នកទោសតាលីបង់អោយបានច្រើនបន្ថែមទៀត ពិសេសអ្នកទោសដែលចាប់អារម្មណ៍លើដំណើរការចរចាស្វែងរកសន្តិភាព។ ក្រុងកាប៊ូលក៏ចង់អោយក្រុងអ៊ីស្លាម៉ាបាដដោះលែង ម៉ូឡា អាប់ឌុល ហ្កានី បារ៉ាដា អតីតដៃស្តាំរបស់ម៉ូឡា អូម៉ា ដែលជាមេដឹកនាំតាលីបង់នៅអាហ្វហ្កានីស្ថានផងដែរ។ ថ្មីៗនេះ មេដឹកនាំតាលីបង់នៅអាហ្វហ្កានីស្ថាន បានប្រកាសថា នៅក្រោយពេលដែលកងទ័ពអង្គការអូតង់ត្រូវដកចេញនៅពេលខាងមុខ ក្រុមតាលីបង់មិនចង់ប្រមូលផ្តុំអំណាចតែនៅក្នុងប្រទេសអាហ្វហ្កានីស្ថានមួយនោះទេ។
ទោះយ៉ាងនេះក្តី ក្រុមតាលីបង់បដិសេធធ្វើការចរចាផ្ទាល់ជាមួយប្រធានាធិបតីកាហ្សៃ។ ក្រុមតាលីបង់ចាត់ទុកលោក កាហ្សៃ ជាអាយ៉ងរបស់អាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ