នាយករដ្ឋមន្ត្រីកម្ពុជារំលឹកថៃម្តងទៀតអំពីអ្នកសង្កេតការណ៍ឥណ្ឌូណេស៊ី
ទោះបីជាមានការព្រមព្រៀងគ្នាក្នុងកិច្ចប្រជុំអាស៊ានកាលពីថ្ងៃ ទី២២កុម្ភៈ ស្តីពីការទទួលយកអ្នកសង្កេតការណ៍ឥណ្ឌូណេស៊ីឱ្យត្រួតពិនិត្យការឈប់ បាញ់គ្នានៅតាមព្រំដែនកម្ពុជាថៃក៏ដោយ ក៏រហូតមកទល់ពេលនេះ គេមិនទាន់ឃើញមានអ្នកសង្កេតការណ៍ឥណ្ឌូណេស៊ីមកដល់ទល់ដែននៅឡើយ ទេ។ ភាគីថៃនៅបន្តអូសបន្លាយពេលវេលាក្នុងភាពស្ទាក់ស្ទើរយ៉ាងខ្លាំង ខណៈដែលភាគីកម្ពុជាបានត្រៀមរួចរាល់អស់ហើយ។ លោកនាយករដ្ឋមន្ត្រី ហ៊ុន សែន បានស្តីបន្ទោសថៃនៅថ្ងៃនេះថាជាអ្នកធ្វើឱ្យយឺតយ៉ាវនៃការមក ដល់របស់ក្រុមអ្នកសង្កេតការណ៍។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ ប៉ែន បូណា ពីទីក្រុងភ្នំពេញ
លោកនាយករដ្ឋមន្ត្រី ហ៊ុន សែន បានថ្លែងពីខេត្តកំពតនៅថ្ងៃនេះថា រដ្ឋមន្ត្រីការបរទេសឥណ្ឌូណេស៊ីបានសរសេរលិខិតជូនដំណឹងដល់សមាជិកអាស៊ានទាំងអស់អំពីការវិវឌ្ឍន៍នៃជម្លោះកម្ពុជានិងថៃ។ លិខិតនោះបានបញ្ជាក់ច្បាស់ថា ភាគីកម្ពុជាបានទទួលយកទាំងស្រុងនូវលក្ខខណ្ឌរបស់ឥណ្ឌូណេស៊ីក្នុងការទទួលយកអ្នកសង្កេតការណ៍ ដើម្បីពិនិត្យមើលបទឈប់បាញ់គ្នានៅតាមជាយដែន។ កម្ពុជាក៏បានបញ្ជាក់ច្បាស់លាស់អំពីចំណុចដែលត្រូវចុះសង្កេតការណ៍ និងពេលវេលាសម្រាប់អ្នកសង្កេតការណ៍។ ប៉ុន្តែ ភាគីថៃវិញនៅកំពុងពិចារណានៅឡើយ។
បើយោងតាមលោកនាយករដ្ឋមន្ត្រី ហ៊ុន សែន ភាគីកម្ពុជាបានកំណត់យកទីតាំងចំនួន១៤សម្រាប់ឱ្យអ្នកសង្កេតការណ៍ឥណ្ឌូណេស៊ីចុះពិនិត្យមើល និងបានកំណត់រយៈពេល១២ខែ។ ចំណុចសង្កេតការណ៍និងពេលវេលានេះអាចនឹងត្រូវបន្ថែមទៀតក្នុងករណីចាំបាច់។ ប៉ុន្តែ លោកបានស្តីបន្ទោសរដ្ឋាភិបាលថៃដែលនៅតែរារែកមិនទាន់សម្រេចចិត្តនៅឡើយ។ ប្រមុខរដ្ឋាភិបាលខ្មែរបានរំលឹកថៃថា កាលពីមុននេះ ថៃខ្លួនឯងបានប្រកាសថា សុខចិត្តទទួលយកអ្នកសង្កេតការណ៍ឥណ្ឌូណេស៊ី ហើយថែមទាំងបានស្នើឱ្យកម្ពុជាទទួលយកដូចគ្នាទៀតផងតែឥឡូវបែរជាថៃខ្លួនឯងធ្វើឱ្យយឺតយ៉ាវទៅវិញ។
នៅក្នុងកិច្ចប្រជុំអាស៊ានកាលពីថ្ងៃទី២២កុម្ភៈនៅទីក្រុងហ្សាការតា កម្ពុជានិងថៃបាន ព្រមព្រៀងគ្នាទទួលយកអ្នកសង្កេតការណ៍ឥណ្ឌូណេស៊ីឱ្យមកធ្វើជាសាក្សីនៃបទឈប់បាញ់គ្នានៅព្រំដែនព្រះវិហារ។ ឥណ្ឌូណេស៊ីត្រៀមបញ្ជូនអ្នកសង្កេតការណ៍របស់ខ្លួនចំនួន៣០នាក់មកកាន់ប្រទេសកម្ពុជានិងថៃ។ ប៉ុន្តែមកទល់នឹងថៃ្ងនេះ គ្មានឡើយវត្តមានរបស់អ្នកសង្កេតការណ៍ទាំងនោះ។
ស្ថានការណ៍នៅតាមជាយដែនព្រះវិហារនៅតែស្ថិតក្នុងសភាពផុយស្រួយ ក្នុងពេលទន្ទឹងរង់ចាំការមកដល់របស់ក្រុមអ្នកសង្កេតការណ៍ឥណ្ឌូណេស៊ី។ ព័ត៌មានពីតំបន់ជាយដែនឱ្យដឹងថា ទាហានថៃនៅតែបន្តប្រុងប្រៀបបង្កហេតុជាមួយកម្ពុជាមិនឈប់ឈរឡើយ។ កាលពីថ្ងៃម្សិលមិញ ទាហានថៃបានប៉ុនប៉ងជីកលេណដ្ឋានជាច្រើនកន្លែងចូលកៀកនឹងតំបន់ភ្នំទ្រព្យដែលជាកន្លែងផ្ទុះអាវុធ ប៉ុន្តែ សកម្មភាពនេះបានផ្អាកទៅវិញ បន្ទាប់ពីទាហានកម្ពុជាបានរារាំងជាច្រើនលើកមក។ ទន្ទឹមនឹងការរង់ចាំអ្នកសង្កេតការណ៍ លោកនាយករដ្ឋមន្ត្រី ហ៊ុន សែន ក៏បានស្នើឱ្យឥណ្ឌូណេស៊ីកំណត់កាលបរិច្ឆេទប្រជុំបីភាគីនៅទីក្រុងហ្សាការតាផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ