លោកនាយករដ្ឋមន្ត្រី ហ៊ុន សែន ប្រកាសបើកទ្វារចំហសម្រាប់គណបក្សប្រឆាំងនៅរដ្ឋសភា
បន្ទាប់ពីកិច្ចប្រជុំរដ្ឋសភា នៅព្រឹកមិញ លោកនាយករដ្ឋមន្ត្រី ហ៊ុន សែន បានថ្លែងទៅកាន់ក្រុមអ្នកកាសែតថា គណបក្សប្រជាជនកម្ពុជា នៅតែរក្សាគោលជំហរចរចាជាមួយគណបក្សសង្គ្រោះជាតិ និងព្រមព្រៀងផ្តល់តំណែងជាអនុប្រធានរដ្ឋសភាមួយ ប្រធានគណៈកម្មការ៤ និងអនុប្រធានគណៈកម្មការ៥ ដល់គណបក្សសង្គ្រោះជាតិ។ ក៏ប៉ុន្តែ គណបក្សសង្គ្រោះជាតិនៅតែប្រកាន់ជំហរមិនអើពើ ហើយបន្តយុទ្ធនាការតវ៉ានឹងលទ្ធផលបោះឆ្នោត តាមរយៈញត្តិតវ៉ា និងបាតុកម្មមហាជនជាដើម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
ជាសេចក្តីប្រកាស ដែលបានធ្វើឡើងផ្ទាល់មាត់ លាយឡំនឹងការព្រមានផង។ នោះគឺលោកនាយករដ្ឋមន្ត្រី ហ៊ុន សែន បានព្រលយពាក្យថា គណបក្សប្រជាជនកម្ពុជាដែលឈ្នះឆ្នោត យល់ព្រមផ្តល់តំណែងជាអនុប្រធានរដ្ឋសភាមួយ ប្រធានគណៈកម្មការ ៤ និងអនុប្រធានគណៈកម្មការ ៥ ដល់គណបក្សសង្គ្រោះជាតិ នៅក្នុងរដ្ឋសភា។
ប៉ុន្តែតំណែងទាំងនោះ ត្រូវបានលោកនាយករដ្ឋមន្ត្រីអះអាងថា ត្រូវឆ្លងកាត់ការបោះឆ្នោតនៅរដ្ឋសភា ដែលលោក មិនហ៊ានធានាថា សមាជិកសភា ៦៨ រូប របស់គណបក្សប្រជាជនកម្ពុជា សម្រេចបែបណាឡើយ។
យ៉ាងណាក៏ដោយ លោកនាយករដ្ឋមន្ត្រី ហ៊ុន សែន បានបញ្ជាក់ថា មុននឹងឈានដល់ការចរចាណាមួយ ទាល់តែសមាជិកសភាគណបក្សសង្គ្រោះជាតិ ចូលស្បថក្នុងព្រះបរមរាជវាំងជាមុនសិន។ ក្នុងនោះ លោកក៏បានគូសបញ្ជាក់ថា សមាជិកសភារបស់គណបក្សសង្គ្រោះជាតិ មានត្រឹមតែ ៥៥ រូបទេ មិនមែន ៦៣ រូប ដូចគណបក្សប្រឆាំង បានប្រកាសនោះឡើយ។
លោកនាយករដ្ឋមន្ត្រី នៅព្រឹកមិញ ក៏បានប្រកាសថា ការជាប់គាំង មិនអាចបន្តកិច្ចចរចារវាងគណបក្សប្រជាជនកម្ពុជានិងគណបក្សសង្គ្រោះជាតិកន្លងមក ដោយសារតែគណបក្សសង្គ្រោះជាតិ ទាមទារយកតំណែងប្រធានរដ្ឋសភា។ ប៉ុន្តែ គណបក្សប្រជាជនកម្ពុជាមិនអាចឲ្យគណបក្សដែលមានសំឡេងភាគតិចក្នុងរដ្ឋសភា កាន់កាប់ជាប្រធានរដ្ឋសភាបានទេ។
លោកនាយករដ្ឋមន្ត្រី ក៏បានព្រមានដល់គណបក្សសង្គ្រោះជាតិ កុំឲ្យប្រព្រឹត្តហួសពីច្បាប់ ដែលឈានទៅប្រកាសជ័យជម្នះ នៅរដ្ឋសភា រហូតដល់ ៦៣ រូប ឬក៏អាចឈានទៅបង្កើតរដ្ឋាភិបាលថ្មីមួយទៀតជាដើម។
រីឯលោក យឹម សុវណ្ណ អ្នកនាំពាក្យគណបក្សសង្គ្រោះជាតិ បានលើកឡើងថា គណបក្សប្រឆាំងមិនមែនចាត់ទុកតំណែងជាការសំខាន់ទេ អ្វីដែលគណបក្សប្រឆាំងចង់បាន គឺតុល្យភាពអំណាចនៅក្នុងស្ថាប័នជាតិសំខាន់ៗ និងការផ្លាស់ប្តូរ កែទម្រង់ពិតប្រាកដ។
លោក យឹម សុវណ្ណ បានបន្តថា គណបក្សសង្គ្រោះជាតិកំពុងធ្វើចលនាមហាជន ដើម្បីតវ៉ានឹងលទ្ធផលបោះឆ្នោត តាមរយៈការកៀងគរប្រជាពលរដ្ឋ ធ្វើញត្តិថ្វាយព្រះមហាក្សត្រ ការធ្វើមហាបាតុកម្មអហិង្សាទូទាំងប្រទេស និងចលនាការទូតទូទាំងពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ