ឥណ្ឌាទាមទារអោយអ្នកការទូតអាមេរិកាំងមួយរូប ចាកចេញពីទឹកដីខ្លួន
សារព័ត៌មានបារាំង AFP (អា អេហ្វ ប៉េ) បានចុះផ្សាយនៅថ្ងៃសុក្រនេះថា រដ្ឋាភិបាលឥណ្ឌាបានទាមទារអោយសមាជិកស្ថានទូតអាមេរិកប្រចាំក្រុងញូវដេល្លី មួយរូប ចាកចេញពីប្រទេសឥណ្ឌា។ អ្នកការទូតអាមេរិករូបនោះ មានឋានៈមុខងារដូចជាស្ត្រីការទូតឥណ្ឌា នៅក្រុងញូវយក ដេវយ៉ានី ខូប្រាហ្កាដេ ដែលតុលាការអាមេរិកដាក់ពិរុទ្ធ និងសុំអោយចាកចេញពីទឹកដីអាមេរិក កាលពីថ្ងៃព្រហស្បតិ៍កន្លងទៅដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤២
នៅថ្ងៃសុក្រនេះ យោងតាមសារព័ត៌មានបារាំង AFP (អា អេហ្វ ប៉េ) ការដែលរដ្ឋាភិបាលឥណ្ឌាបានទាមទារអោយអ្នកការទូតអាមេរិកប្រចាំក្រុងញូវដេល្លី មួយរូប ចាកចេញពីទឹកដីខ្លួននោះ គឺធ្វើឡើងបន្ទាប់ពីអាមេរិកបានសុំស្ត្រីការទូតឥណ្ឌាប្រចាំក្រុងញូវយក គឺលោកស្រី ដេវយ៉ានី ខូប្រាហ្កាដេ អោយចាកចេញពីទឹកដីអាមេរិក។ សារព័ត៌មានបារាំងអាអេហ្វប៉េ បានដកស្រង់សំដីអ្នកទទួលខុសត្រូវឥណ្ឌាមួយរូប ដែលបានលើកឡើងថា អ្នកការទូតអាមេរិកប្រចាំក្រុងញូវដេល្លីដែលឥណ្ឌាទាមទារអោយចាកចេញពីទឹកដីឥណ្ឌានេះ មានឋានៈមុខងារដូចស្ត្រីការទូតឥណ្ឌាខូប្រាហ្កាដេដែរ។
គួររំលឹកថា កាលពីថ្ងៃព្រហស្បតិ៍ តុលាការអាមេរិកបានដាក់ពិរុទ្ធស្ត្រីការទូតឥណ្ឌាខូប្រាហ្កាដេ ពីបទភូតកុហក ដោយធ្វើសេចក្តីបញ្ជាក់ក្លែងក្លាយទាក់ទងនឹងទិដ្ឋាការស្ត្រីបំរើការងារក្នុងផ្ទះខ្លួន។ ស្ត្រីអ្នកបំរើការងារនោះ ជាជនជាតិឥណ្ឌាដែរ។ តុលាការអាមេរិកបានចោទលោកស្រី ខូប្រាហ្កាដេ ពីបទកេងប្រយោជន៍លើស្ត្រីអ្នកបំរើការងារផ្ទះខ្លួន ដោយសារលោកស្រីផ្តល់ប្រាក់ខែដល់គាត់ទាបពេក។ បន្ទាប់ពីដាក់ពិរុទ្ធមក អាមេរិកបានសុំអោយស្ត្រីការទូតឥណ្ឌាចាកចេញពីទឹកដីខ្លួនជាបន្ទាន់។
លោកស្រីខូប្រាហ្កាដេ បានត្រលប់មកឥណ្ឌាវិញហើយ នៅថ្ងៃសុក្រនេះ។ លោកស្រីបានទទួលអភ័យឯកសិទ្ធិការទូត ដែលតាមធម្មតា ជាអភ័យឯកសិទ្ធិដែលគេពិបាកនឹងផ្តល់អោយអ្នកការទូតណាស់។ ប៉ុន្តែទោះយ៉ាងនេះក្តី ឥណ្ឌាហាក់មិនបញ្ចប់កំហឹងខ្លួនងាយៗនោះទេ។ ឥណ្ឌាបានទាមទារអោយសមាជិកស្ថានទូតអាមេរិកមួយរូប ចាកចេញពីឥណ្ឌា ជាការសងសឹកតបទៅអាមេរិកវិញ។
ដោយសាររឿងរ៉ាវស្ត្រីការទូតឥណ្ឌាទំនាក់ទំនងឥណ្ឌានិងអាមេរិកជួបភាពតានតឹងខ្លាំង។ គួររំលឹកថា នៅថ្ងៃ១២ធ្នូ ឆ្នាំ២០១៣ អាជ្ញាធរអាមេរិកបានចាប់ខ្លួនស្ត្រីការទូតឥណ្ឌា ពេលគាត់ដាក់កូនៗនៅសាលារៀន។ អាជ្ញាធរអាមេរិកបានឆែកឆេរ រូបគាត់ក្នុងរាងកាយអាក្រាតសុទ្ធសាធ និងបានឃុំគាត់៤៨ម៉ោង។ ទង្វើនោះ បានធ្វើអោយអាជ្ញាធរឥណ្ឌាផ្ទុះកំហឹង និងចាត់វិធានការជាច្រើន សងសឹកអាមេរិកវិញភ្លាមៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ