រឿងរ៉ាវឃាត់ខ្លួនស្ត្រីការទូតឥណ្ឌានៅក្រុងញូវយក ធ្វើអោយឥណ្ឌាផ្ទុះកំហឹងប្រឆាំងអាមេរិក
ចុះផ្សាយនៅថ្ងៃ៖
ស្តាប់ - ០៣:៤៥
កាលពីថ្ងៃ១២ធ្នូ កន្លងទៅ នៅក្រុងញូវយក អាជ្ញាធរអាមេរិកបានឃាត់ខ្លួន និងឆែកឆេររាងកាយរបស់ស្រីការទូតឥណ្ឌាមួយរូប គឺលោកស្រី ដេវយ៉ានី ខូប្រាហ្កាដេ ពីបទភូតភរដើម្បីអោយអាមេរិកចេញទិដ្ឋាការការងារអោយអ្នកបំរើការងារក្នុងផ្ទះរបស់លោកស្រី។ ទង្វើអាមេរិកបានធ្វើអោយរដ្ឋាភិបាលឥណ្ឌាក្រេវក្រោធយ៉ាងខ្លាំង រហូតចាត់វិធានាការជាច្រើន ប្រឆាំងទៅនឹងអ្នកការទូតអាមេរិកប្រចាំនៅប្រទេសឥណ្ឌាទៀតផង។
លោកស្រី ដេវយ៉ានី ខូប្រាហ្កាដេ អាយុ៣៩ឆ្នាំ បំរើកិច្ចការទូតឥណ្ឌានៅទីក្រុងញូវយក សហរដ្ឋអាមេរិក ត្រូវបានអាជ្ញាធរអាមេរិកដាក់ខ្នោះ ឃាត់ខ្លួន កាលពីថ្ងៃ១២ធ្នូកន្លងទៅ ក្នុងបទចោទប្រកាន់ថា លោកស្រីបានធ្វើសេចក្តីបញ្ជាក់ក្លែងក្លាយ ដើម្បីអោយអាជ្ញាធរអាមេរិកផ្តល់ទិដ្ឋាការអោយដល់អ្នកបំរើការងារក្នុងផ្ទះលោកស្រី។
រដ្ឋាភិបាលឥណ្ឌាក្រេវក្រោធខ្លាំងចំពោះទង្វើអាមេរិក ប្រឆាំងទៅនឹងអ្នកការទូតខ្លួន ព្រោះថា អាជ្ញាធរអាមេរិកបានដាក់ខ្នោះ ឃាត់ខ្លួន លោកស្រី ខូប្រាហ្កាដេ នៅពេលគាត់កំពុងដាក់កូនៗនៅសាលារៀន ពោលគឺនៅពីមុខសាលារៀនកូនៗគាត់តែម្តង។ អាមេរិកបានបំបាក់មុខស្ត្រីការទូតឥណ្ឌា នៅទីប្រជុំជនសាធារណៈ។ អ្វីដែលបំផ្ទុះកំហឹងឥណ្ឌាបន្ថែមពីលើនេះទៀតនោះ គឺថា នៅស្នងការប៉ូលិស ស្ត្រីការទូតឥណ្ឌារូបនេះត្រូវបានដោះសម្លៀកបំពាក់ អាក្រាតកាយសុទ្ធសាធ ដើម្បីអោយប៉ូលិសបានឆែកឆេរ។ ទង្វើបែបនេះ ជាទង្វើហួសហេតុដែលឥណ្ឌាមិនអាចទទួលយកបានឡើយ។ នៅឥណ្ឌា ការឆែកឆេររាងកាយស្ត្រីភេទមិនប្រព្រឹត្តដល់ថ្នាក់នេះឡើយ ថ្វីបើសង្គមឥណ្ឌា ផ្តល់អាទិភាពដល់បុរសភេទក៏ដោយចុះ។ ពេលដែលមានស្ត្រីធ្វើដំណើរនៅតាមអាកាសយានដ្ឋាន អាជ្ញាធរតែងផ្តល់អាទិភាពដល់ពួកគាត់ ហើយមិនដែលឆែកឆេរពួកគាត់ សូម្បីតែបន្តិចសោះឡើយ។
អ្វីដែលធ្វើអោយឥណ្ឌាខឹងងំក្នុងចិត្តទៀតនោះ គឺថា ថ្វីបើស្ត្រីការទូតឥណ្ឌារូបនោះ ត្រូវបានដោះលែង ដោយមិនបានស្ថិតនៅរយៈពេលយូរក្នុងគុកក្តី អាជ្ញាធរអាមេរិកបានឃុំគាត់ជាមួយអ្នកសេពគ្រឿងញៀន។ ឥណ្ឌាមិនអាចអត់ធ្មត់បានឡើយ ទោះជាសហរដ្ឋអាមេរិកជាមិត្តខ្លួនក៏ដោយចុះ ព្រោះថា ចង់រាប់ឥណ្ឌាជាមិត្ត គឺត្រូវតែផ្តល់ការគោរព ដល់ជាតិឥណ្ឌា គោរពប្រជាជនឥណ្ឌា។ លោក កាម៉ាល់ ណាត រដ្ឋមន្ត្រីកិច្ចការសភាឥណ្ឌាមួយរូប បានលើកឡើងថា ឥណ្ឌាមិនមែនជាសាធារណរដ្ឋសំបកចេកនោះទេ និយាយអោយចំ ឥណ្ឌាមិនអាចអោយអាមេរិកជាន់ស្រួល ដូចជាសំបកចេកនោះឡើយ។
រដ្ឋាភិបាលឥណ្ឌាបានចាត់វិធានការសងសឹកភ្លាមៗទៅនឹងអាមេរិក ក្នុងរឿងរ៉ាវឃាត់ខ្លួនស្ត្រីការទូតខ្លួន។ ឥណ្ឌាបានប្រកាសដកបណ្ណអភ័យឯកសិទ្ធិពិសេស ពីមន្ត្រីការទូតអាមេរិកជាច្រើនរូប ប្រចាំនៅឥណ្ឌា។ បណ្ណអភ័យឯកសិទ្ធិពិសេសនោះ ជាបណ្ណផ្តល់អោយក្រសួងការបរទេសឥណ្ឌា។ សម្រាប់ឥណ្ឌា គឺជាបណ្ណផ្តល់អំណាចពេញមុខពេញមាត់ ដល់ម្ចាស់កម្មសិទ្ធិនៃបណ្ណ។ ព្រោះថា នៅតាមទីសាធារណៈមួយចំនួន រឺក៏នៅតាមអាកាសយានដ្ឋានឥណ្ឌា ពេលធ្វើដំណើរម្តងៗ ម្ចាស់កម្មសិទ្ធបណ្ណទាំងនេះ មិនចាំបាច់ត្រូវឈរបន្តកន្ទុយរង់ចាំការត្រួតពិនិត្យនោះឡើយ។
ដោយឡែក តុលាការអាមេរិកមិនលើកលែងទង្វើខុសច្បាប់ទាក់ទងទិដ្ឋាការការងារក្នុងទឹកដីខ្លួនឡើយ។ ស្ត្រីការទូតឥណ្ឌាដេវយ៉ានី ខូប្រាហ្កាដេ ត្រូវបានចោទប្រកាន់ថា បានភូតកុហកដើម្បីអោយស្ត្រីអ្នកបំរើការងារក្នុងផ្ទះលោកស្រី ទទួលបានទិដ្ឋាការការងារពីអាជ្ញាធរ។ នៅសហរដ្ឋអាមេរិក អាជ្ញាធរអាមេរិកតំរូវអោយអ្នកបំរើការងារក្នុងផ្ទះស្ត្រីការទូតឥណ្ឌា ទទួលប្រាក់ខែជាទឹកប្រាក់ប្រមាណ៤៥០០ដុល្លារ ក្នុងមួយខែ។ ប៉ុន្តែ លោកស្រីខូប្រាដេ បង់ថ្លៃប្រាក់ខែអោយអ្នកបំរើការងារខ្លួនត្រឹមតែ៥៣០ដុល្លារប៉ុណ្ណោះ ដូច្នេះគឺខុសគ្នាឆ្ងាយណាស់ ពីច្បាប់អាមេរិក។
នៅឥណ្ឌា ជាញឹកញយ មុននឹងចេញទៅបំរើការងារនៅបរទេស អ្នកបំពេញការងារឥណ្ឌា តែងចុះហត្ថលេខាកិច្ចសន្យាការងារ នៅក្នុងទឹកដីឥណ្ឌាជាមុនសិន។ ដូច្នេះ ប្រាក់ខែដែលត្រូវទទួលបានគឺខុសគ្នាស្រឡះ ខុសពីច្បាប់ដែលចែងក្នុងប្រទេសដែលអ្នកបំពេញការងារត្រូវទៅទីនោះ។ ដោយឡែក ប្រាក់ខែ៤៥០០ដុល្លារអាមេរិក ដែលអាជ្ញាធរអាមេរិកតំរូវអោយស្ត្រីការទូតឥណ្ឌាបង់អោយអ្នកបំរើការងារផ្ទះខ្លួននោះ គឺជាទឹកប្រាក់ការងារប្រចាំខៃដែលស្ត្រីការទូតរូបនោះទទួលបាន។ ដូច្នេះ ប្រសិនបើគាត់បង់៤៥០០ដុល្លារអោយអ្នកបំរើការងារផ្ទះ គាត់នឹងគ្មានសេសសល់អ្វីទាំងអស់សម្រាប់ការចាយវាយក្នុងជីវភាពប្រចាំថ្ងៃ។
ទោះជាលោកស្រីខូប្រាហ្កាដេ ធ្វើផ្ទុយពីច្បាប់អាមេរិកក៏ដោយចុះ ក៏ប្រជាជនឥណ្ឌាទូទៅបានគាំទ្រលោកស្រី និងគាំទ្ររដ្ឋាភិបាលឥណ្ឌាដែលបានចាត់វិធានការប្រឆាំងអាមេរិក ព្រោះពួកគេមិនពេញចិត្តនឹងទង្វើបៃបមើលងាយមើលថោកស្ត្រីភេទឥណ្ឌា ពីសំណាក់អាមេរិកនោះឡើយ។
ដោយឡែក នៅពេលឥណ្ឌាត្រូវរៀបចំការបោះឆ្នោតក្នុងពេល៦ខែខាងមុខទៀតនោះ ទង្វើក្រេវក្រោធរបស់រដ្ឋាភិបាលឥណ្ឌាអាចនឹងជួយអោយតាក់តែងលំអភាពវិជ្ជមានរបស់គណបក្សកាន់អំណាចមួយកម្រិតទៀត ដើម្បីទទួលបានសន្លឹកឆ្នោតគាំទ្រពីប្រជាជន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ