ក្រុម IS កាត់ក្បាលចំណាប់ខ្មាំងជប៉ុនម្នាក់ទៀត តែលោកអាបេ ប្តេជ្ញាថាមិនចុះចាញ់
ក្រុមអង្គការរដ្ឋអ៊ីស្លាម IS បានប្រកាសនៅក្នុងវីដេអូ ចេញផ្សាយកាលពីថ្ងៃសៅរ៍ថា ពួកគេបានកាត់ក្បាលចំណាប់ខ្មាំងជនជាតិជប៉ុនម្នាក់ទៀតហើយ ដើម្បីបញ្ចេញកំហឹងទៅកាន់ទីក្រុងតូក្យូ ដែលព្រងើយកន្តើយនឹងសំណើររបស់ពួកគេ។ ហើយនេះក៏ដើម្បីឆ្លើយតបនឹងការដាក់ទណ្ឌកម្មរបស់ទីក្រុងវ៉ាស៊ីនតោនផងដែរ។ យ៉ាងណាក៏ដោយ នាយករដ្ឋមន្ត្រីជប៉ុន លោកអាបេ នៅតែប្តេជ្ញាថា មិនចុះញ៉ម នឹងអំពើភេរវនិយមឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
និយាយជារួមទៅ ចំណាប់ខ្មាំងជនជាតិជប៉ុន ២នាក់ គឺត្រូវបានក្រុមអង្គការរដ្ឋអ៊ីស្លាម កាត់ក្បាលទាំងពីរ ក្នុងរយៈពេលមួយសប្តាហ៍។ ពោលគឺកាលពីថ្ងៃសៅរ៍សប្តាហ៍មុន ក្រុមភេរវនិយមនេះ បានបង្ហោះវីដេអូ ពីការកាត់ក្បាលចំណាប់ខ្មាំងគឺ លោក Shoichi Yukawa ហើយនៅថ្ងៃសៅរ៍នេះ ក្រុមអង្គការរដ្ឋអ៊ីស្លាមនេះ បានបង្ហោះវីដេអូជាថ្មី បញ្ជាក់ថាពួកគេបានកាត់ក្បាលចំណាប់ខ្មាំងម្នាក់ទៀត ដែលជាអ្នកកាសែតជប៉ុន គឺលោក Kenji Goto។ ប៉ុន្តែនៅក្នុងវីដេអូនោះ ក្រុមភេរវនិយមនេះ មិនបាននិយាយពីចំណាប់ខ្មាំង ដែលជាអ្នកបើកបរយន្តហោះសញ្ជាតិហ្សកដានី ដែលពួកគេគម្រាមសម្លាប់នោះទេ។
នៅក្នុងវីដេអូនោះ អ្នកកាសែតជប៉ុន លោក Goto ដែលស្លៀកសម្លៀកបំពាក់ពណ៌ទឹកក្រូច ដូចអ្នកទោស លួចរត់ពីក្នុងពន្ធនាគារ Quantanamo បានលត់ជង្គង់ នៅជិតភេរវជនជីហាត ដែលស្លៀកពាក់ខ្មៅសុទ្ធ និងមានបិទម៉ាស់មុខម្នាក់។ ភេរវជនជីហាតនោះ បាននិយាយជាភាសាអង់គ្លេស បន្ទោសទៅកាន់រដ្ឋាភិបាលជប៉ុនថា ជាដើមហេតុនៃការធ្វើឲ្យជនជាតិខ្លួនស្លាប់។
ឃាតករ បានថ្លែងនៅក្នុងវីដេអូ ទៅកាន់នាយករដ្ឋមន្ត្រីជប៉ុន លោកស៊ីនហ្សូ អាបេថា ឃាតកម្មលើអ្នកកាសែត Goto នេះ គឺជាសញ្ញបញ្ជាក់ថា «ជប៉ុនកំពុងតែចាប់ផ្តើមមានសុបិន្តអាក្រក់ហើយ»។ ឃាតករដែលជាជនជីហាតដដែល បានចំអកថា ការស្លាប់របស់លោក Gotoនេះ គឺជាលទ្ធផលនៃការសម្រេចចិត្តរបស់រដ្ឋាភិបាលជប៉ុន។វីដេអូនោះ បានបញ្ចប់ទៅដោយមានរូបភាពដងខ្លួនជាមួយនឹងសម្លៀកបំពាក់ពណ៌ទឹកក្រូច និងក្បាលដែលដាច់ចេញពីដងខ្លួនរបស់លោក Goto។
បន្ទាប់ពីវីដេអូនោះ បានបែកធ្លាយនៅព្រឹកថ្ងៃអាទិត្យនេះ ក្នុងប្រទេសជប៉ុន, លោកអាបេ បានថ្លែងទាំងក្រៀមក្រំ ពីទីក្រុងតូក្យូ ព្រមទាំងសន្យាទាំងកំហឹងថា «គ្មានថ្ងៃអត់អោនឲ្យក្រុមភេរវជននោះឡើយ»។ លោកអាបេ ប្តេជ្ញាដោយមិនចុះញ៉មថា នឹងនៅតែបន្តសហការជាមួយសហគមអន្តរជាតិ ដើម្បីយកពួកប្រព្រឹត្តិឧក្រិដ្ឋកម្មដ៏សាហាវយ៉ង់ខ្នងទាំងនោះ មកដាក់ទោសឲ្យបាន។
សហគមអន្តរជាតិ ដូចជាប្រធានាធិបតីអាមេរិក លោកបារ៉ាក់ អូម៉ា, លោកហ្វ្រង់ស័រ ហូឡង់ ប្រធានាធិបតីបារាំង និងនាយករដ្ឋមន្ត្រីអង់គ្លេស លោកដេវីដ កាមេរ៉ូន សុទ្ធតែបានចេញមុខថ្កោលទោសភ្លាមៗចំពោះការកាត់ក្បាលចំណាប់ខ្មាំងជប៉ុនជាលើកទី២នេះ។ ពួកគេបានថ្កោលថា នេះជាទង្វើ «ដ៏សែនសាហាវឃោរឃៅ» គ្មានមនុស្សធម៌ និងមិនអាចអត់ឱនឲ្យបានជាដាច់ខាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ