ចំណាប់ខ្មាំងជប៉ុន៖ ក្រុមជីហាតកំពុងតែធ្វើឲ្យបក្សសម្ព័ន្ធអាមេរិកប្រឈមនឹងភាពប្រេះឆា
ចុះផ្សាយនៅថ្ងៃ៖
ស្តាប់ - ០៤:៥៦
ក្រុមជីហាតរដ្ឋអ៊ីស្លាមទើបនឹងបានចេញផ្សាយខ្សែវីដេអូមួយទៀត កាលពីល្ងាចថ្ងៃអង្គារម្សិលមិញ ដោយគំរាមសម្លាប់ចំណាប់ខ្មាំងជប៉ុន ក្នុងរយៈពេល ២៤ម៉ោង បើសិនជាគេមិនដោះលែងអ្នកទោសជីហាតម្នាក់ ដែលកំពុងជាប់ឃុំនៅក្នុងប្រទេសហ្សកដានី។ ការទាមទារនេះកំពុងតែធ្វើឲ្យរដ្ឋាភិបាលហ្សកដានីត្រូវរងសម្ពាធគ្រប់ទិស។ វាក៏អាចនឹងបង្កឲ្យមានភាពប្រេះឆានៅក្នុងចំណោមប្រទេសសម្ព័ន្ធមិត្តប្រឆាំងនឹងក្រុមជីហាតរដ្ឋអ៊ីស្លាមផងដែរ។
អ្នកទោសដែលក្រុមជីហាតទាមទារឲ្យដោះលែងជាថ្នូរនឹងចំណាប់ខ្មាំងជប៉ុន គឺជាស្រ្តីជនជាតិអ៊ីរ៉ាក់ ឈ្មោះថា សាជីដា អាល់រីស្ហាវី (Sajida al-Rishawi) ដែលធ្លាប់បានចូលរួមក្នុងការវាយប្រហារភេរវកម្មនៅក្នុងប្រទេសហ្សកដានី កាលពីឆ្នាំ២០០៥។ ការវាយប្រហារភេរវកម្ម ដែលកាលណោះបានបណ្តាលឲ្យមនុស្សស្លាប់ជិត ៦០នាក់ ត្រូវបានប្រជាជនហ្សកដានីជាច្រើនចាត់ទុកថាជាហេតុការណ៍ ១១កញ្ញា សម្រាប់ពូកគេ។
ដូច្នេះ ការទាមទារឲ្យដោះលែង អាល់ រីស្ហាវី គឺជាសម្ពាធនយោបាយដ៏ធ្ងន់មួយ សម្រាប់រដ្ឋាភិបាលហ្សកដានី ហើយជាយុទ្ធសាស្រ្តមួយរបស់ក្រុមជីហាតរដ្ឋអ៊ីស្លាម ដើម្បីផ្សព្វផ្សាយឃោសនាលើកតម្កើងកេរ្តិ៍ឈ្មោះ ទាក់ទាញឲ្យគេចាប់អារម្មណ៍។
រដ្ឋាភិបាលហ្សកដានីត្រូវរងនូវសម្ពាធដ៏ធ្ងន់ចំនួនពីរ គឺសម្ពាធពីក្រៅប្រទេស និងសម្ពាធនៃនយោបាយក្នុងស្រុក។
គួរបញ្ជាក់ថា នៅក្នុងតំបន់មជ្ឈិមបូព៌ា ហ្សកដានីស្ថិតក្នុងចំណោមប្រទេសជាមិត្តដ៏ល្អរបស់ជប៉ុន។ ហ្សកដានី គឺជាប្រទេសមួយនៅក្នុងដំណើរទស្សនកិច្ចជុំវិញតំបន់មជ្ឈិមបូព៌ារបស់លោកស្ហ៊ីនហ្សូ អាបេ កាលពីពេលថ្មីៗនេះ ដោយនៅពេលនោះ លោកនាយករដ្ឋមន្រ្តីជប៉ុនបានប្រកាសអំពីការផ្តល់កម្ចីរហូតដល់ទៅ ១០០លានដុល្លារដល់ហ្សកដានី។ ដូច្នេះ នៅពេលដែលជប៉ុនជួបនឹងបញ្ហា ហើយទទូចសុំជំនួយពីហ្សកដានីវិញ វាគឺជាសម្ពាធដ៏ធ្ងន់មួយ សម្រាប់រដ្ឋាភិបាលហ្សកដានី។
នៅក្នុងស្រុកវិញ ការដោះលែងភេរវជន អាល់រីស្ហាវី ដែលជាប់ពាក់ព័ន្ធនឹងការវាយប្រហារភេរវកម្មដ៏ធំមិនធ្លាប់មាននៅហ្សកដានី អាចនឹងធ្វើឲ្យប្រជាជនហ្សកដានីខឹងសម្បារ។ ប្រជាជននឹងកាន់តែខឹងខ្លាំងទៅទៀត ប្រសិនបើការដោះលែងភេរវជននេះត្រូវធ្វើឡើង ដើម្បីជួយរំដោះចំណាប់ខ្មាំងរបស់ជប៉ុន ក្នុងពេលដែលហ្សកដានីមានអ្នកបើកយន្តហោះចម្បាំងហ្សកដានីម្នាក់កំពុងជាប់ក្នុងដៃពួកជីហាត ហើយមិនត្រូវបានរដ្ឋាភិបាលហ្សកដានីស្វះស្វែងរកការដោះលែង។
នៅរសៀលថ្ងៃពុធ ទូរទស្សន៍ក្នុងស្រុកហ្សកដានីបានផ្សាយឲ្យដឹងថា រដ្ឋាភិបាលហ្សកដានីបានប្រកាសយល់ព្រមដោះលែងភេរវជនអាល់រីស្ហាវី ប្រសិនបើក្រុមជីហាតសុខចិត្តដោះលែងអ្នកបើកបរយន្តហោះហ្សកដានីឲ្យមានសេរីភាព។ គេនៅមិនទាន់ឮពីចម្លើយតបរបស់ក្រុមជីហាតនៅឡើយទេ។
ក៏ប៉ុន្តែ ការសុខចិត្តដោះលែងអ្នកទោសទៅតាមការទាមទាររបស់ក្រុមជីហាត អាចនឹងធ្វើឲ្យហ្សកដានី និងជប៉ុន ត្រូវប្រឈមមុខនឹងភាពប្រេះឆាជាមួយសហរដ្ឋអាមេរិក ដែលជាសម្ព័ន្ធមិត្តដ៏ធំបំផុត។ ប្រទេសទាំង៣នេះ ក៏សុទ្ធតែស្ថិតនៅក្នុងបក្សសម្ព័ន្ធប្រឆាំងនឹងក្រុមជីហាតជាមួយគ្នាផងដែរ។
តាំងពីដើមមក អាមេរិកតែងតែប្រកាន់ជំហរប្រឆាំងដាច់ខាតនឹងការបង់លុយ ឬដោះលែងអ្នកទោសជាថ្នូរនឹងចំណាប់ខ្មាំងក្នុងដៃក្រុមភេរវជន។ អាមេរិកខ្លួនឯងផ្ទាល់ក៏ធ្លាប់ប្រឈមមុខនឹងវិបត្តិចំណាប់ខ្មាំងជាមួយក្រុមជីហាតរដ្ឋអ៊ីស្លាមនេះដែរ កាលពីពេលថ្មីៗនេះ ដោយក្រុមជីហាតបានទាមទារពីអាមេរិកឲ្យបង់លុយ និងដោះលែងអ្នកទោស ដើម្បីជាថ្នូរនឹងការដោះលែងចំណាប់ខ្មាំង។ ក៏ប៉ុន្តែ អាមេរិកបដិសេធ ហើយពលរដ្ឋអាមេរិក ៣នាក់ត្រូវក្រុមជីហាតសម្លាប់ដោយកាត់ក្បាល។
កាលពីថ្ងៃចន្ទ នៅក្រោយពេលមានវិបត្តិចំណាប់ខ្មាំងជប៉ុន មន្រ្តីជាន់ខ្ពស់នៃក្រសួងការបរទេសអាមេរិកបានធ្វើការបញ្ជាក់សាជាថ្មីម្តងទៀត អំពីជំហររបស់អាមេរិក ដោយទាមទារមិនឲ្យមានការធ្វើសម្បទានអ្វីទាំងអស់ជាមួយក្រុមភេរវជន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ