តើអ្វីទៅមូលហេតុនៃភាពតានតឹងនៅកាស្សឺមៀរខាងឥណ្ឌា?
ចុះផ្សាយនៅថ្ងៃ៖
ស្តាប់ - ០៣:៣១
មានស្លាប់យ៉ាងតិច១០០នាក់ហើយ នៅក្នុងការប៉ះទង្គិចគ្នាជាបន្តបន្ទាប់រវាងពួកអ្នកផ្តាច់ទឹកដីនិយមនិងកងទ័ពឥណ្ឌា នៅកាស្សឺមៀរ តាំងពីខែមិថុនារហូតមកទល់ពេលនេះ។តើអ្វីទៅមូលហេតុជាប្រវត្តិសាស្រ្តនៃភាពតានតឹងជាអចិន្រ្តៃយ៍ នៅកាស្សឺមៀរខាងឥណ្ឌា ជាង៦០ឆ្នាំកន្លងមកហើយ?
ប៉ុន្មានថ្ងៃចុងក្រោយនេះ ភាពតានតឹងកើនឡើងខ្លាំង នៅកាស្សឺមៀរខាងឥណ្ឌា។ ដើម្បីទប់ទល់នឹងបាតុកម្មរបស់ពួកអ្នកផ្តាច់ទឹកដីនិយម ទាហាននិងនគរបាលឥណ្ឌាប្រើធម៌ក្តៅ វាយបំបែក និងបាញ់សម្លាប់ពួកបាតុករ។
តាមពិត អំពើហិង្សាបានផ្តើមឡើងកាលពីជាងបីខែមុនម៉្លេះ ក្រោយពីក្មេងជំទង់ម្នាក់បានស្លាប់ក្រោមគ្រាប់កាំភ្លើងរបស់កងកម្លាំងរក្សាសណ្តាប់ធ្នាប់របស់ឥណ្ឌា។ ឧប្បត្តិហេតុនេះគឺជាប្រេងចាក់ទៅលើភ្លើងកំហឹងរបស់ពួកអ្នកកាន់សាសនាអ៊ីស្លាម ដែលទាមទារផ្តាច់ទឹកដីកាស្សឺមៀរ ចេញពីការកាន់កាប់របស់ឥណ្ឌា ជាង៦០ឆ្នាំកន្លងមកហើយ។
សោកនាដកម្មនៅកាស្សឺមៀរបានផ្តើមកើតឡើង នៅឆ្នាំ១៩៤៧ នៅពេលដែលក្រោយពីទទួលបានឯករាជ្យពីអង់គ្លេស ឥណ្ឌាបានប្រេះឆាជាពីរ ជាប្រទេសឥណ្ឌាសម្រាប់អ្នកកាន់សាសនាហិណ្ឌូ និងជាប្រទេសប៉ាគីស្តង់សម្រាប់អ្នកកាន់សាសនាអ៊ីស្លាម។ កាលណោះ គូបដិបក្ខទាំងពីរ បានយល់ព្រមព្រៀងគ្នាថា រដ្ឋណាដែលមានអ្នកកាន់សាសនាអ៊ីស្លាមច្រើនជាង រដ្ឋនោះនឹងក្លាយជាកម្មសិទ្ធិរបស់ប៉ាគីស្តង់។ ផ្ទុយទៅវិញ រដ្ឋណាដែលមានអ្នកកាន់សាសនាហិណ្ឌូច្រើនជាង រដ្ឋនោះនឹងក្លាយជាកម្មសិទ្ធិរបស់ឥណ្ឌា។
ការបែងចែកទឹកដី បានប្រព្រឹត្តទៅដោយគ្មានវិបត្តិធ្ងន់ធ្ងរនៅគ្រប់ទីកន្លែង លើកលែងតែនៅ កាស្សឺមៀរមួយចេញ។ មូលហេតុគឺមកអំពីនៅក្នុងដែនដីនេះ ប្រជាជនភាគច្រើនជាអ្នកកាន់សាសនាអ៊ីស្លាម ក៏ប៉ុន្តែស្តេចក្រាញ់។ជាអ្នកកាន់សាសនាហិណ្ឌូ។ អ៊ីចឹងហើយ បានជានៅទីបំផុត ស្តេចក្រាញ់បានសម្រេចចិត្តប្រកាសដាក់ទឹកដីកាស្សឺមៀរ ឲ្យឋិតនៅក្រោមការគ្រប់គ្រងរបស់ឥណ្ឌាទៅវិញ។
បញ្ហាកាស្សឺមៀរ បានធ្វើឲ្យសង្គ្រាមផ្ទុះឡើងមួយរំពេចរវាងឥណ្ឌានិងប៉ាគីស្តង់ដែលក្លាយជាបងប្អូនគូសត្រូវ ពីអំណើះតទៅ។ នៅឆ្នាំ១៩៤៩ អង្គការសហប្រជាជាតិលូកដៃធ្វើអន្តរាគមន៍ ពុះចែកកាស្សឺមៀរជាពីរ ឲ្យឥណ្ឌាពាក់កណ្តាលខាងត្បូង និងឲ្យប៉ាគីស្តង់ពាក់កណ្តាលខាងជើង។ ប៉ុន្តែ ទាំងសងខាងនៅតែមិនសុខចិត្ត ជាពិសេសប៉ាគីស្តង់ដែលនៅឆ្នាំ១៩៦៥សម្រេចលើកទ័ពទៅវាយយកកាស្សឺមៀរខាងឥណ្ឌាមកកាន់កាប់ តែច្បាំងចាញ់ឥណ្ឌា នៅទីបំផុត។
តាំងពីពេលនោះមក កាស្សឺមៀរខាងឥណ្ឌាក្លាយជាជង្រុកបញ្ហា ពីព្រោះប្រជាជនអ្នកកាន់សាសនាអ៊ីស្លាមនៅទីនោះទាមទារផ្តាច់ទឹកដី បង្កភេរវកម្មប្រឆាំងនឹងឥណ្ឌា ដោយមានការជួយជ្រោមជ្រែងពីប៉ាគីស្តង់។
បញ្ហាកាស្សឺមៀររឹងរឹតតែមានលក្ខណៈធ្ងន់ធ្ងរ ចាប់ពីដើមទសវត្សរ៍ទី៥០មក ដោយហេតុតែមហិច្ឆតារបស់ចិន។ កាលណោះ កងទ័ពចិនបានលួចចូលមកកាន់កាប់តំបន់ប៉ែកខាងកើតនៃកាស្សឺមៀរឥណ្ឌា ជាទីដែលគ្មានមនុស្សរស់នៅ គឺតំបន់Aksai Chin។
ការឈ្លានពាននេះរបស់ចិន បាននាំទៅរកសង្គ្រាមរវាងឥណ្ឌានិងចិន នៅឆ្នាំ១៩៦២។ មិនតែប៉ុណ្ណោះ ដើម្បីយកចិត្តចិនដែលជួយគាំទ្រខ្លួននៅក្នុងអធិករណ៍ជាមួយឥណ្ឌា ថ្នាក់ដឹកនាំប៉ាគីស្តង់ បានកាត់ដីកាស្សឺមៀរមួយដុំរបស់ខ្លួននៅប៉ែកខាងកើតឲ្យទៅចិនទៀត នៅឆ្នាំ ១៩៦៣។
អធិករណ៍ជុំវិញដែនដីកាស្សឺមៀរជារឿងមួយរសើបនិងប្រកបទៅដោយគ្រោះថ្នាក់ ក្នុងគ្រាបច្ចុប្បន្ន ពីព្រោះតួអង្គទាំងបី ឥណ្ឌា ប៉ាគីស្តង់និងចិន ជាមហាអំណាចនុយក្លេអ៊ែរ។ ជាការពិតណាស់ដែលថា ការដែលប្រទេសបដិបក្ខមានអាវុធនុយក្លេអ៊ែររៀងៗខ្លួន តម្រូវឲ្យមានការប្រុងប្រយ័ត្ន ឲ្យចៀសវាងសង្គ្រាម ឲ្យរក្សាស្ថានភាពStatut Quo។ ក៏ប៉ុន្តែវាមិនអាចខ្ទប់កំហឹងរបស់ពួកអ្នកផ្តាច់ទឹកដីនិយមបានទេ ហើយវាក៏មិនអាចខ្ទប់បានដែរអំពើហិង្សាតាមរយៈវិច្ឆេទកម្មឬភេរវកម្មនានា ក្នុងគោលដៅធ្វើឲ្យរង្គោះរង្គើអំណាចរបស់ឥណ្ឌានៅក្នុងដែនដីកាស្សឺមៀរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ