កូរ៉េខាងជើងបានបាញ់បង្ហោះកំាជ្រួច ឬមីស៊ីលដោយជោគជ័យ សហគមន៍អន្តរជាតិថ្កោលទោស
នៅថ្ងៃពុធ ទី១២ ធ្នូនេះ កូរ៉េខាងជើងបានប្រកាសឲ្យដឹងថា ខ្លួនបានបាញ់បង្ហោះកំាជ្រួចប្រកបដោយជោគជ័យ ព្រមទំាងបានដាក់ទៅក្នុងតារាវិថីនូវផ្កាយរណបមួយទុកសម្រាប់បម្រើឲ្យវិស័យស៊ីវិល។ សម្រាប់សហគមន៍អន្តរជាតិ ពិសេសសហរដ្ឋអាមេរិកមិនបានជឿថា ជាកំាជ្រួចផ្ទុកផ្កាយរណបទេ តែជាការសាកល្បងមីស៊ីលអន្តរទ្វីបដូចដែលទីក្រុងព្យុងយ៉ាងព្យាយាមសាកល្បងមិនបានសម្រេចនាពេលកន្លងមក។ យ៉ាងណាក៏ដោយ សហគមន៍អន្តរជាតិបានថ្កោលទោស និងចាត់ទុកទង្វើរបស់កូរ៉េខាងជើងថា ជាការបង្ករឿងថ្មីទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៦
គិតតំាងពីឆ្នំា ១៩៩៨ មក នេះជាការបាញ់សាកល្បងកំាជ្រួច ឬមីស៊ីលលើកទី៥ហើយ តែនៅលើនេះ គេពិតជាអាចនិយាយបានថា របបកុម្មុយនិស្តកូរ៉េខាងជើងបានសម្រេចដូចក្តីបំណងរបស់ខ្លួនមែន។ បន្ទាប់ពីទូរទស្សន៍ជាតិកូរ៉េខាងជើងបានប្រកាសពីដំណឹងជោគជ័យនេះភ្លាម បញ្ជាការ ការពារដែនអាកាសអាមេរិកំាងក៏បានបញ្ជាក់អំពីបេសកកម្មប្រកបដោយជោគជ័យនេះដែរ ប៉ុន្តែគ្រាន់និយាយថា គេបានឃើញមីស៊ីលមួយបានទម្លាក់វត្ថុមួយទៅក្នុងតារាវិថី។ តើវត្ថុនោះ ជាផ្កាយរណបដូចដែលកូរ៉េខាងជើងបានអះអាងឬ យ៉ាងណានោះ ? នៅមិនទាន់មានព័ត៌មានផ្លូវការណាមួយនៅឡើយទេ។
កាលពីខែមេសាកន្លងទៅ កូរ៉េខាងជើងបានបាញ់កំាជ្រួចដូចគ្នានេះម្តងហើយ តែបានផ្ទុះបែកក្នុងលំហអាកាស បន្ទាប់ពីហោះបានប៉ុន្មានវិនាទីមក។ តែនៅថ្ងៃទី១២ ធ្នូនេះ កំាជ្រួចនោះបានហោះតាមគន្លងផ្លូវដូចដែលបានកំណត់ទុកមុន ដំបូង កំាជ្រួចនោះបានហោះរំលងសមុទ្រលឿង បន្ទាប់មក បានហោះរំលងកោះអូគីណាវ៉ារបស់ជប៉ុន មុននឹងផ្ទុះបែកនៅប៉ែកខាងកើតនៃឆ្នេរសមុទ្រហ្វីល្លីពីន។ យ៉ាងណាក៏ដោយ សហគមន៍អន្តរជាតិមិនបានជឿថា ជាការបញ្ជូនផ្កាយរណបទៅដាក់ក្នុងតារាវិថីទុកសម្រាប់បម្រើនៅក្នុងវិស័យស៊ីវិលនោះទេ តែជាការបាញ់សាកល្បងមីស៊ីលអន្តរទ្វីបទៅវិញ។
អ៊ីចឹងហើយបានជាខណៈនេះ ប្រតិកម្មបាននិងកំពុងបន្តធ្លាក់មកជាបន្តបន្ទាប់ដែលជាទូទៅ គេនំាគ្នាថ្កោលទោស និងចាត់ទុកទង្វើរបស់ទីក្រុងព្យុងយ៉ាងថា ជាការបង្ករឿងជាថ្មី។ មុនគេ គឺប្រទេសជប៉ុនដែលកំាជ្រួចនោះបានហោះរំលងកោះអូគីណាវ៉ារបស់ខ្លួន។ លោករដ្ឋមន្រ្តីការពារជាតិជប៉ុនបានប្រកាសថា ជប៉ុនចំាបាច់ត្រូវតែបំពាក់ប្រព័ន្ធមីស៊ីល ប្រឆំាងមីស៊ីលប្រកបដោយប្រសិទ្ធិភាព ដើម្បីប្រឈមទប់នឹងបច្ចេកវិទ្យាចម្រើនទៅមុខរបស់កូរ៉េខាងជើង។ នៅខាងអាមេរិក អ្នកនំាពាក្យក្រុមប្រឹក្សាសន្តិសុខបានថ្លែងថា ទង្វើរបស់ទីក្រុងព្យុងយ៉ាង ជាការគំរាមកំហែងសន្តិសុខក្នុងតំបន់ និងជាការរំលោភលើសេចក្តីសម្រេចចិត្តរបស់ក្រុមប្រឹក្សាសន្តិសុខអង្គការសហប្រជាជាតិលេខ ១៧១៨ និង១៨៧៤។ ចំណែកលោកអគ្គលេខាធិការអង្គការសហប្រជាជាតិបាន គីមូនបានសម្តែងក្តីបារម្ភចំពោះសន្តិភាព និងស្ថិរភាពនៅក្នុងតំបន់។
និយាយពីប្រទេសចិន និងរុស្ស៊ីដែលជាសម្ព័ន្ធមិត្តរបស់កូរ៉េខាងជើងវិញ ទីក្រុងប៉េកំាង និងម៉ូស្គូក៏បានថ្កោលទោសដែរ តែជាការស្តីបន្ទោសដោយចុងមាត់ ចុង ក ពិសេស បានត្រឹមតែសម្តែងការសោកស្តាយប៉ុណ្ណោះ។ យ៉ាងណាក៏ដោយក្នុងថ្ងៃនេះ និងតាមសំណើរបស់សហរដ្ឋអាមេរិក និងប្រទេសជប៉ុន ក្រុមប្រឹក្សាសន្តិសុខនឹងកោះប្រជុំជាបន្ទាន់មួយដើម្បីស្វែងរកទ័ណ្ឌកម្មថ្មីទៀតដាក់លើកូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ