កម្ពុជា-ឡាវ សម្ពោធបង្គោលព្រំដែន ចំខួប៥៥ឆ្នាំ នៃទំនាក់ទំនងការទូតប្រទេសទាំងពីរ
នៅថ្ងៃច័ន្ទនេះ លោក ថុងស៊ីង ថាំម៉ាវង់ (Thongsing Thammavong) នាយករដ្ឋមន្ត្រីឡាវ ដែលទើបឡើងកាន់តំណែង បានផ្តើមដំណើរទស្សនកិច្ចរយៈពេលពីរថ្ងៃនៅកម្ពុជា។ នៅ ពេលមកដល់ភ្នំពេញ នៅព្រឹកមិញ លោកនាយករដ្ឋមន្ត្រីឡាវ បានជួបពិភាក្សាការងារជាមួយ លោកនាយករដ្ឋមន្ត្រី ហ៊ុន សែន។ ប្រមុខរដ្ឋាភិបាលទាំងពីរ បានព្រមព្រៀងរៀបចំសម្ពោធបង្គោលព្រំដែន នៅច្រកទ្វារអន្តរជាតិ ដុងក្រឡ ក្នុងខេត្តស្ទឹងត្រែង ដើម្បីសាទរខួបលើកទី៥៥ ឆ្នាំ នៃទំនាក់ទំនងការទូតកម្ពុជា-ឡាវ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លី ម៉េងហួរ ពីទីក្រុងភ្នំពេញ
នៅពេលផ្តើមដំណើរទស្សនកិច្ចរយៈពេលពីរថ្ងៃនៅកម្ពុជា នាព្រឹកថ្ងៃចន្ទ ទី៧មីនា ឆ្នាំ២០១១ លោកនាយករដ្ឋមន្ត្រីឡាវ ថុងស៊ីង ថាំម៉ាវង់ បានជួបពិភាក្សាការងារជាមួយលោកនាយករដ្ឋមន្ត្រី ហ៊ុន សែន នៅវិមានសន្តិភាព ក្រុងភ្នំពេញ។
បន្ទាប់ពីកិច្ចប្រជុំដោយបិទទ្វាររយៈពេលជាង ១ ម៉ោង នៅព្រឹកមិញ លោក ខៀវ កាញារីទ្ធ អ្នកនាំពាក្យរដ្ឋាភិបាល បានថ្លែងទៅកាន់ក្រុមអ្នកកាសែតថា លោកនាយករដ្ឋមន្ត្រីឡាវ ថុងស៊ីង ថាំម៉ាវង់ បានសម្តែងការរីករាយចំពោះការបោះបង្គោលព្រំដែនកម្ពុជា-ឡាវ។
ការបោះបង្គោលព្រំដែន តាមលោកនាយករដ្ឋមន្ត្រីឡាវ កម្ពុជា-ឡាវបានសម្រេចក្នុងស្មារតី សហការដោះស្រាយ ជាអ្នកភូមិផងរបងជាមួយផង និងជាបងប្អូនផង។ ចំណែកចំណុច ដែលសេសសល់ លោកនាយករដ្ឋមន្ត្រីឡាវ បានជំរុញឲ្យភាគីទាំងពីរ បន្តធ្វើការចរចា ដើម្បីដោះស្រាយការបោះបង្គោលព្រំដែនឲ្យបានឆាប់ចប់។
លោក ខៀវ កាញារីទ្ធ បានលើកឡើងថា លោកនាយករដ្ឋមន្ត្រីឡាវ ក៏បានស្នើយកចំណុចដុងក្រឡ ដើម្បីស្ថាបនា ជាបង្គោលព្រំដែនអនុស្សាវរីយ៍ និងជាមិត្តភាព ដើម្បីអាចបញ្ជាក់ថា ប្រទេសទាំងពីរបានរួមដៃគ្នាដោះស្រាយការបោះបង្គោលព្រំដែនដោយជោគជ័យ។
ដោយសារតែឆ្នាំនេះ ជាខួបទី៥៥ នៃទំនាក់ទំនងការទូតកម្ពុជា-ឡាវ លោកនាយករដ្ឋមន្ត្រីឡាវ ក៏បានស្នើសុំឲ្យមានការសហការគ្នា រៀបចំជាការរំលឹកទិវានេះ។
ជាការឆ្លើយតប លោក ខៀវ កាញារីទ្ធ អះអាងថា លោកនាយករដ្ឋមន្ត្រី ហ៊ុន សែន លើកឡើង កម្ពុជា-ឡាវ គួរតែរៀបចំខួបលើកទី៥៥ឆ្នាំនៃទំនាក់ទំនងការទូត ចាប់ផ្តើមដំបូង ក្នុងពេល ដែលប្រទេសទាំងពីរ រៀបចំសម្ពោធបង្គោលអនុស្សាវរីយ៍ព្រំដែនកម្ពុជា-ឡាវ នៅដុងក្រឡ។ ពិធីនោះ ធ្វើឡើង ក្រោមវត្តមានរបស់នាយករដ្ឋមន្ត្រីទាំងពីរ។
មកដល់ពេលនេះ កម្ពុជា-ឡាវ បោះបង្គោលព្រំដែនបាន ១២៧ បង្គោល ស្មើនឹង ៨៨%។ ចំពោះការកំណត់ពេលវេលា ដែលត្រូវសម្ពោធបង្គោលព្រំដែននៅដុងក្រឡ និងការបញ្ចប់ដំណើរការបោះបង្គោលព្រំដែនកម្ពុជា និងឡាវ ត្រូវបានលោក ខៀវ កាញារីទ្ធ បញ្ជាក់ថា មិនត្រូវបានប្រមុខរដ្ឋាភិបាលទាំងពីរ លើកឡើងក្នុងកិច្ចប្រជុំនៅព្រឹកមិញឡើយ។
ក្រៅពីដំណើរការបោះបង្គោលព្រំដែន ប្រមុខរដ្ឋាភិបាលកម្ពុជា-ឡាវ ក៏បានលើកឡើងពីកិច្ចសហប្រតិបត្តិការលើគ្រប់វិស័យ ការតភ្ជាប់ផ្លូវ ខ្សែកាបអុបទិក ជាពិសេសកិច្ចសហការខេត្តនៅជាប់ព្រំដែន ដើម្បីធ្វើឲ្យព្រំដែនកម្ពុជា-ឡាវ ជាព្រំដែនសន្តិភាព កិច្ចសហប្រតិបត្តិការ និងបង្កលក្ខណៈល្អ ដល់ការធ្វើពាណិជ្ជកម្មឆ្លងព្រំដែនរវាងប្រជាជនទាំងពីរផង និងលុបបំបាត់នូវឧក្រិដ្ឋកម្មឆ្លងដែន និងការបង្ក្រាបគ្រឿងញៀន ជាដើម។
ជម្លោះព្រំដែនកម្ពុជា-ថៃ ក៏ជាប្រធានបទនៃកិច្ចប្រជុំរវាងប្រមុខរដ្ឋាភិបាលកម្ពុជា និងឡាវ នៅព្រឹកមិញផងដែរ។
អំឡុងពេលទស្សនកិច្ចនៅកម្ពុជា រយៈពេលពីរថ្ងៃ លោក ថងស៊ីង ថាំម៉ាវង់ នឹងចូលក្រាបបង្គំគាល់ព្រះមហាក្សត្រ នរោត្តម សីហមុនី ជួបជាមួយលោក ជា ស៊ីម ប្រធានព្រឹទ្ធសភា លោក ហេង សំរិន ប្រធានរដ្ឋសភា និងជួបជាមួយលោកនាយករដ្ឋមន្ត្រី ហ៊ុន សែន ក្រៅពីនេះ លោកនាយករដ្ឋមន្ត្រីឡាវ នឹងទៅទស្សនាសារមន្ទីរជាតិ។
កើតនៅថ្ងៃទី១២មេសា ឆ្នាំ១៩៤៤ លោក ថងស៊ីង ថាំម៉ាវង់ ត្រូវបានរដ្ឋសភាជាតិឡាវ តែងតាំងជានាយករដ្ឋមន្ត្រី កាលពីថ្ងៃទី២៣ ខែធ្នូ ឆ្នាំ២០១០។ លោក ថងស៊ីង ថាំម៉ាវង់ ដែលបានកាន់តំណែងជាប្រធានរដ្ឋសភាឡាវ ចាប់តាំងពីឆ្នាំ២០០៦ បានឡើងកាន់តំណែងជានាយករដ្ឋមន្ត្រី ជំនួសលោក ប៊ូសន បុប្ផាវ៉ាន់ (Bouasone Bouphavanh)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ