គណៈប្រតិភូជាន់ខ្ពស់គណបក្សហ្វ៊ុនស៊ិនប៉ិចគ្រោងធ្វើទស្សនកិច្ចនៅប្រទេសចិន ក្នុងខែមេសាខាងមុខ
គណៈប្រតិភូជាន់ខ្ពស់គណបក្សហ្វ៊ុនស៊ិនប៉ិច នឹងទៅបំពេញទស្សនកិច្ចប្រទេសចិន នៅខែមេសាខាងមុខនេះ។ ជាគោលការណ៍ គណបក្សរាជានិយមហ្វ៊ុនស៊ិនប៉ិច និងគណបក្សកុម្មុយនិស្តចិន ត្រូវធ្វើការផ្លាស់ប្តូរគណៈប្រតិភូជាន់ខ្ពស់ទៅវិញទៅមក ពីរដងក្នុងមួយឆ្នាំ។ លោក ញឹក ប៊ុនឆៃ នាយកប្រតិបត្តិនៃគណបក្សហ្វ៊ុនស៊ិនប៉ិចពិពណ៌នាថា ទំនាក់ទំនងរវាងគណបក្សទាំងពីរកាន់តែមានលក្ខណៈល្អប្រសើរឡើងៗ ពីពេលមួយទៅពេលមួយ។
ចុះផ្សាយនៅថ្ងៃ៖
ស្តាប់ - ០២:១៨
លោក ញឹក ប៊ុនឆៃ នាយកប្រតិបត្តិនៃគណបក្សហ្វ៊ុនស៊ិនប៉ិចបានថ្លែងប្រាប់អោយដឹងនៅថ្ងៃអាទិត្យនេះថា មន្រ្តីជាន់ខ្ពស់នៃគណបក្សហ្វ៊ុនស៊ិនប៉ិចប្រមាណជា៨ ទៅ១០នាក់ នឹងចាកចេញទៅបំពេញទស្សនកិច្ចនៅក្នុងសធារណរដ្ឋប្រជាមានិតចិន នៅខែមេសាខាងមុខនេះ ក្នុងក្របខណ្ឌគណបក្សហ្វ៊ុនស៊ិនប៉ិច និងគណបក្សកុម្មុយនិស្តចិន។ តាមគោលការណ៍រវាងគណបក្សហ្វ៊ុនស៊ិនប៉ិច និងគណបក្សកុម្មុយនិស្តចិន គណៈប្រតិភូជាន់ខ្ពស់នៃបក្សទាំងពីរត្រូវផ្លាស់ប្តូរទស្សនកិច្ចចំនួនពីរដង ក្នុងមួយឆ្នាំ។ ហើយនេះ គេនៅមិនទាន់និយាយពីការផ្លាស់ប្តូរគណៈប្រតិភូយុវជនរវាងគណបក្សទាំងពីរផង។
លោក ញឹក ប៊ុនឆៃ នាយកប្រតិបត្តិនៃគណបក្សហ្វ៊ុនស៊ិនប៉ិចបានបញ្ជាក់ប្រាប់អោយដឹងទៀតថា គណៈប្រតិភូគណបក្សហ្វ៊ុនស៊ិនប៉ិច ដែលគ្រោងនឹងធ្វើទស្សនកិច្ចនៅក្នុងប្រទេសចិននាខែមេសាខាងមុខនេះ អាចនឹងដឹកនាំដោយព្រះអង្គម្ចាស់ក្សត្រី អារុណ រស្មី ដែលនឹងក្លាយទៅជាព្រះប្រធានគណបក្សហ្វ៊ុនស៊ិនប៉ិច ក្រោយសមាជវិសាមញ្ញគណបក្ស នៅថ្ងៃទី២១ខែមិនាខាងមុខនេះ។
ព្រះអង្គម្ចាស់ក្សត្រី នរោត្តម អារុណរស្មី អាចនឹងក្លាយទៅជាព្រះប្រធានគណបក្សហ្វ៊ុនស៊ិនប៉ិចផង និងអាចក្លាយទៅជាបេក្ខភាពឈរឈ្មោះនាយករដ្ឋមន្រ្តីតំណាងអោយគណបក្សហ៊្វុនស៊ិនប៉ិច សម្រាប់ការបោះឆ្នោតតំណាងរាស្ត្រ ខែកក្កដាឆ្នាំ ២០១៣ ខាងមុខនេះផង។
លោក ញឹក ប៊ុនឆៃ បានបន្តទៀតថា ទំនាក់ទំនងល្អរវាងគណបក្សហ្វ៊ុនស៊ិនប៉ិច និងគណបក្សកុម្មុយនិស្តចិន បានកើតមានតាំងពីការកកើតគណបក្សហ្វ៊ុនស៊ិនប៉ិចកាលពីឆ្នាំ១៩៨១មកម្ល៉េះ។ ហើយទំនាក់ទំនងល្អនេះនឹងរឹតតែរីកធំធាត់ល្អខ្លាំងឡើងៗ ពីពេលមួយទៅពេលមួយ។
នៅក្នុងក្របខណ្ឌរដ្ឋ និងរដ្ឋវិញ លោកនាយករដ្ឋមន្ត្រី ហ៊ុន សែន បានប្រកាសអោយដឹងកាលពីថ្ងៃសៅរ៍ម្សិលមិញថា លោកគ្រោងនឹងធ្វើដំណើរទស្សនកិច្ចផ្លូវការទៅកាន់ប្រទេសចិននាខែមេសាខាងមុខនេះ ដើម្បីជំរុញល្បឿនកិច្ចសហប្រតិបត្តិការជាមួយមេដឹកនាំថ្មីនៃប្រទេសចិន។ នៅក្នុងខែមិនាខាងមុខនេះ លោកប្រធានាធិបតី និងលោកនាយករដ្ឋមន្រ្តីថ្មីនៃប្រទេសមហាអំណាចចិននឹងចូលកាន់តំណែង រីឯលោកប្រធានធិបតី និងលោកនាយករដ្ឋមន្រ្តីផុតអណត្តិនឹងចូលនិវត្តន៍។
សូមបញ្ជាក់ថា ក្នុងរយៈពេលប៉ុន្មានឆ្នាំចុងក្រោយនេះ ទីក្រុងភ្នំពេញ និងទីក្រុងប៉េកាំងបានឯកភាពគ្នាលើកកម្ពស់កម្រិតសហប្រតិបត្តិការក្នុងភាពជាដៃគូរយុទ្ធសាស្រ្តគ្រប់ជ្រុងជ្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ