បោះឆ្នោតសភានៅហ្វីលីពីន
នៅថ្ងៃចន្ទនេះ ប្រជាជនហ្វីលីពីនបាននាំគ្នាទៅបោះឆ្នោតរើសតំណាងរាស្ត្រ សមាជិកព្រឹទ្ធសភា និងអភិបាលខេត្ត-ក្រុងរបស់ខ្លួន សំរាប់ពាក់កណ្តាលអណត្តិសភា។ លទ្ធផលនៃការបោះឆ្នោតអាចនឹងត្រូវបានដឹង នៅល្ងាចថ្ងៃចន្ទនេះ។ គេរំពឹងថា ប្រធានាធិបតី បេនីញ៉ូ អាគីណូ ដែលបានដើរតួនាទីសំខាន់ក្នុងការធ្វើអោយមានកំណើនសេដ្ឋកិច្ចក្នុងប្រទេស នឹងទទួលបានជោគជ័យ។ ដោយឡែក ការឃោសនាក្នុងការបោះឆ្នោតកន្លងមក បានប្រព្រឹត្តទៅក្នុងអំពើហិង្សា បណ្តាលអោយមនុស្សជាង៣០នាក់បាត់បង់ជីវិត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
ប្រជាជនហ្វីលីពីនដែលមានឈ្មោះបោះឆ្នោត សំរាប់ពាក់កណ្តាលអណត្តិសភា នៅថ្ងៃចន្ទនេះ មានចំនួនជាង៥២លាននាក់។ ពួកគេត្រូវជ្រើសរើសតំណាងរាស្ត្រ សមាជិកព្រឹទ្ធសភា និងអភិបាលខេត្ត-ក្រុង សំរាប់តំណែងសរុបចំនួន ១៨០០០ តំណែង នៅទូទាំងប្រទេស។
គេរំពឹងថា ការបោះឆ្នោតនេះអាចនឹងផ្តល់ជោគជ័យដល់ប្រធានាធិបតី បេនីញ៉ូ អាគីណូ ដែលបានដើរតួនាទីសំខាន់ក្នុងការលើកកំណើនសេដ្ឋកិច្ចហ្វីលីពីន។ កំណើនសេដ្ឋកិច្ចហ្វីលីពីនក្នុងឆ្នាំ២០១២កន្លងទៅ មានរហូតដល់ទៅជាង៦,៦ ភាគរយ ជាអត្រាមួយខ្ពស់នៅអាស៊ី។ គេសង្កតឃើញថា អ្នកវិនិយោគបរទេសផ្តល់ទំនុកចិត្តខ្ពស់ដល់ប្រទេសនេះ។
លោកអាគីណូ ដែលបានជាប់ឆ្នោតជាប្រធានាធិបតី កាលពីខែមិថុនា ឆ្នាំ២០១០នោះ បានព្យាយាមធ្វើអោយការបោះឆ្នោតពាក់កណ្តាលអណត្តិនេះ ក្លាយជាការបោះឆ្នោតប្រជាមតិមួយជាប្រយោជន៍ដល់រូបលោក។ គួររំលឹកថា កាលពីឆ្នាំ២០១០ គណបក្សសេរីរបស់លោកអាគីណូមិនបានទទួលសមាសភាពភាគច្រើន នៅព្រឹទ្ធសភាហ្វីលីពីននោះទេ។ នៅពេលនេះ ប្រសិនបើលោកអាគីណូទទួលបានសមាសភាពនេះ លោកនឹងមានអំណាចខ្ពស់ក្នុងការអនុម័តច្បាប់។
ទោះយ៉ាងណាក្តី ដូចជារាល់ដងដែរ ការឃោសនាបោះឆ្នោតកន្លងមក បានប្រព្រឹត្តទៅដោយមិនអាចចៀសផុតពីអំពើហិង្សានានាបានឡើយ។ ហើយអំពើហិង្សានៅពេលនេះ បានសម្លាប់មនុស្សជាង៣០នាក់ ដែលភាគច្រើនជាសកម្មជនប្រឆាំង រឺក៏ជាអ្នកសារព័ត៌មាន។ យោងតាមប្រភពព័ត៌មានខ្លះ អំពើហិង្សាក្នុងការឃោសនាបោះឆ្នោតកន្លងមក បានសម្លាប់មនុស្សដល់ទៅទ្វេដងលើសនេះទៅទៀត។
ក្រៅពីនេះ បេក្ខជននានាបានព្យាយាមទិញសន្លឹកឆ្នោតពីប្រជាជន ដោយបានធ្វើការលួចលាក់ផ្តល់ប្រាក់កាស និងកាដូផ្សេងៗដល់ពួកគេ។ វិធានការនេះមានប្រសិទ្ធភាពខ្ពស់ ព្រោះថា ថ្វីដ្បិតតែហ្វីលីពីនមានកំណើនសេដ្ឋកិច្ចគួរអោយកត់សម្គាល់ក្តី វិសមភាពរវាងអ្នកមាននិងអ្នកក្រនៅមានគម្លាតគ្នាឆ្ងាយស្រឡះ។ ប្រជាជនភាគច្រើននៅតែមានចំណូលតិចជាងមួយដុល្លារ ក្នុងមួយថ្ងៃ។
លទ្ធផលនៃការបោះឆ្នោតប្រហែលជាអាចចេញជាផ្លូវការ នៅល្ងាចថ្ងៃចន្ទនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ