២៥ប្រទេសចូលជួយស្វែងរកយន្តហោះម៉ាឡេស៊ីបាត់
ទោះបីជាបានប្រើគ្រប់មធ្យោបាយ គ្រប់កម្លាំងស្រាវជ្រាវរុករកយ៉ាងណា ក៏រហូតមកទល់នឹងពេលនេះ នៅតែគ្មានស្នាម គ្មានដាន ឬបំណែកអ្វីមួយ ជារបស់យន្តហោះម៉ាឡេស៊ីអ៊ែរឡាញ បាត់ខ្លួនកាលពី៨ថ្ងៃមុនសោះ។ កិច្ចសហប្រតិបត្តិការអន្តរជាតិ ត្រូវបានពង្រឹង និងពង្រីក តាមរយៈសម្រែកសុំជំនួយរបស់ម៉ាឡេស៊ី។ ប្រទេសដែលបានចូលរួមស្វែងរកយន្តហោះ បានកើនឡើងពី ១៤ ទៅ ២៥ប្រទេស មានទាំងជំនួយសម្ភារៈ និងអ្នកឯកទេស។
ចុះផ្សាយនៅថ្ងៃ៖
ស្តាប់ - ០១:៤៩
ម៉ាឡេស៊ីលែងផ្តុំការស្វែងរកយន្តហោះ ឬបំណែកយន្តហោះ ក្នុងសមុទ្ទចិនខាងត្បូង ឬក្នុងដៃសមុទ្ទម៉ាឡាកាទៀតហើយ ! ម៉ាឡេស៊ីត្រូវងាកមកស្វែងរកយន្តហោះនៅក្នុងមហាសមុទ្ទឥណ្ឌា ដែលមួយភាគធំជាមហាសាគរជ្រៅជាងគេបំផុតនៅលើភពផែនដី ឬនៅគន្លងផ្លូវហោះហើរលើដែនគោក ពីភាគខាងជើងប្រទេសថៃទៅកាន់តំបន់អាស៊ីកណ្តាល ឆ្លងកាត់ប្រទេសយ៉ាងហោច១១ប្រទេស។
ការល្បងសមត្ថភាពការទូតថ្មីមួយទៀត កំពុងរង់ចាំម៉ាឡេស៊ី! នេះបើតាមការអះអាងរបស់រដ្ឋមន្ត្រីក្រសួងការពារជាតិនិងដឹកជញ្ជូន។ កូឡាឡាំពួ បានស្នើសុំទៅកាន់ប្រទេសចំនួន២៥ ឱ្យជួយផ្តល់និងផ្ទេរទិន្នន័យបានមកពីផ្កាយរណប ឬរ៉ាដា មកម៉ាឡេស៊ី ក្រែងអាចទាញបានព័ត៌មានខ្លះទាក់ទងនឹងការបាត់យន្តហោះ។ ម៉ាឡេស៊ីក៏បានទាមទារសុំជំនួយជាយន្តហោះ ជានាវា ទៅតាមរកយន្តហោះMH៣៧០ លើគន្លងផ្លូវសំខាន់ពីរ ៖ ខាងជើង ពីប្រទេសកាហ្សាក់ស្ថាន ទៅ ថៃ និងខាងត្បូងពីឥណ្ឌូណេស៊ី ចុះទៅមហាសមុទ្ទឥណ្ឌា។
អាជ្ញាធរម៉ាឡេស៊ី ហាក់កំពុងតក់ស្លុតខ្លាំង ណាមិនធ្លាប់បានទទួលការបំពាក់បំប៉នសម្រាប់ប្រឈមមុខនឹងស្ថានការណ៍ធ្ងន់ធ្ងរ ណាការបាត់យន្តហោះលើកនេះ មានលក្ខណៈចម្លែកខ្លាំង មិនធ្លាប់មានក្នុងប្រវត្តិអាកាសចរណ៍ស៊ីវិលពិភពលោកឡើយ ៖ គ្មានអ្នកចេញមុខទទួលស្គាល់ទង្វើ គ្មានស្លាកស្នាមចុះចតដោយបង្ខំ គេថែមទាំងមិនដឹងថាតើយន្តហោះMH៣៧០ អាចចុះចតនៅទីណាមួយ ឬក៏បញ្ចប់ការហោះហើរក្នុងបាតមហាសាគរឥណ្ឌា។ គេបានសាកល្បងស្ថាបនាដំណើរផ្លូវហោះហើររបស់យន្តហោះប៊ូអ៊ីញ ៧៧៧ ឡើងវិញដោយមានជំនួយពីឧបករណ៍បញ្ជា Simulator ប៉ុន្តែទោះជាយ៉ាងនេះក្តី ក៏ហាក់ដូចជាគ្មានអាចផ្តល់តម្រុយអ្វីដល់ក្រុមអ្នកអង្កេតដែរ នៅពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ