កម្ពុជាស្ថិតនៅលំដាប់ទី១២៤ ចំពោះកង្វះអាហារូបត្ថម្ភកុមារ
យោងតាមរបាយការណ៍មួយដែលចេញផ្សាយ ដោយអង្គការទស្សនៈពិភពលោក World Vision ដែលចេញផ្សាយកាលពីថ្ងៃទី០៣ កញ្ញា ឆ្នាំ២០១៣ កម្ពុជាស្ថិតនៅលំដាប់លេខរៀងទី១២៤ ក្នុងចំណោមប្រទេសទាំង ១៧៦ ក្នុងពិភពលោក ចំពោះបញ្ហាកង្វះអាហារូបត្ថម្ភកុមារ។ អង្គការទស្សនៈពិភពលោកអន្តរជាតិ កំពុងព្រួយបារម្ភជាខ្លាំង ចំពោះចំណាត់ថ្នាក់នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
របាយការណ៍សន្ទស្សន៍សកលនៃវិសមភាពសុខភាពកុមារ ដែលមានឈ្មោះថា ឃាតករគម្លាត ឬ Killer Gap បានស្រាវជ្រាវឃើញថា កម្ពុជាស្ថិតនៅលំដាប់ទី ១២៤ ក្នុងចំណោម ប្រទេស ១៧៦ នៅលើពិភពលោក ដែលមានទំហំនៃគម្លាត រវាងកុមារដែលទទួលបានសេវាសុខភាពល្អ និងមិនល្អ។ កង្វះអាហារូបត្ថម្ភរបស់កុមារក្នុងលំដាប់នេះ អាចនិយាយបានថា នៅមានកម្រិតខ្ពស់ ៤០ភាគរយ ដែលជាសញ្ញាបង្ហាញពីវិសមភាពនៅកម្ពុជា។
លោក Steve Coke ប្រធានគម្រោងជាន់ខ្ពស់ផ្នែកតស៊ូមតិ និងសុខភាពកុមារ នៃអង្គការទស្សនៈពិភពលោក ប្រចាំនៅកម្ពុជា បានប្រាប់វិទ្យុបារាំងថា ការសិក្សាដែលចេញបានលទ្ធផលនេះ គឺផ្អែកលើការវាស់វែង ៤ចំនុច ដែលសុទ្ធតែពាក់ព័ន្ធនឹងបញ្ហាសុខភាពកុមារ និងការស្វែងរកសេវាសុខភាព។
ចំណែក លោក Andrew Hassett នាយកយុទ្ធនាការរបស់អង្គការទស្សនៈពិភពលោកអន្តរជាតិ ក៏បានសម្តែងភាពភ្ញាក់ផ្អើលជាខ្លាំង នៅក្នុងសេចក្តីប្រកាសព័ត៌មាននេះ។ ភ្ញាក់ផ្អើល ពីព្រោះលោកមើលឃើញថា ប្រទេសកម្ពុជាមានធនធាន អ្នកចេះដឹងអំពីវិធីសាស្ត្រថែទាំសុខភាពកុមារ មាតា និង ទារក ដែលមានគុណភាពប្រសើរ។ ប៉ុន្តែ បែរជាត្រូវ ជួបនឹងគ្រោះហានិភ័យបែបនេះទៅវិញ។
លោកបានបន្តនៅក្នុងសេចក្តីប្រកាសនោះថា នេះជាកម្រិតមួយដ៏ខ្ពស់ ដែលអង្គការទស្សនៈពិភពលោកមិនអាចទទួលយកបានទេ ហើយអង្គការមួយនេះក៏ចង់ឲ្យរដ្ឋាភិបាល សង្គមស៊ីវិល និងដៃគូអភិវឌ្ឍន៍នានានៅក្នុងប្រទេសកម្ពុជា ពន្លឿន «យុទ្ធនាការលើកកម្ពស់សុខភាពកុមារឥឡូវនេះ» ក្នុងគោលបំណងធ្វើឲ្យប្រសើរឡើង នូវស្ថានភាពអាហារូបត្ថម្ភ របស់កុមារនៅកម្ពុជា។
គួរបញ្ជាក់ថា ប្រទេសដែលមានសេវាសុខភាពល្អជាងគេ និងទទួលបានចំណាត់ថ្នាក់លេខ១ គឺប្រទេសបារាំង ខណៈដែលប្រទេសភាគច្រើន ដែលស្ថិតនៅក្រោមលំដាប់លេខ១០០ ជាប្រទេសដែលស្ថិតក្នុងតំបន់អាព្រិក។
អង្គការទស្សនៈពិភពលោកកម្ពុជា នឹងលើកយករបាយការណ៍សន្ទស្សន៍គម្លាតសុខភាពជាសកលនេះ ទៅពិភាក្សានៅក្នុងកិច្ចប្រជុំជាសកលនៃអង្គការសហប្រជាជាតិ ដែលចាប់ផ្តើមពីថ្ងៃទី១៧ ខែកញ្ញានេះ ដើម្បីទាក់ទាញឲ្យមានការគិតគូរពីគម្លាតនៃការទទួលបានសេវាសុខភាពបន្ថែមទៀតដល់កម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ