វារីអគ្គីសនីអាចកាត់បន្ថយទិន្នផលជលផល៧០%ក្នុងអាងទន្លេមេគង្គក្រោម
នៅថ្ងៃសុក្រទី២៤កញ្ញានេះ នៅក្នុងទីក្រុងបាងកកប្រទេសថៃ ស្ថាប័នហិរញ្ញវត្ថុធំៗមកពីសហរដ្ឋអាមេរិក អឺរ៉ុប និងអាស៊ីបានជួបជុំគ្នានៅក្នុងសន្និសីទមួយ ដើម្បីបង្ហាញពីការទទួលខុសត្រូវ និងផលប៉ះពាល់ផ្នែកសេដ្ឋកិច្ច សង្គម និងបរិស្ថាន ដែលកើតចេញពីការសាងសង់ទំនប់វារីអគ្គិសនីនៅទន្លេមេគង្គប៉ែកខាងក្រោម។ កិច្ចប្រជុំដែលរៀបចំដោយអង្គការមូលនិធិសកលសម្រាប់ការអភិរក្ស WWFមានបំណងស្វែងយល់ និងរកវិធីសាស្ត្រ ដើម្បីកាត់បន្ថយផលប៉ះពាល់ទាំងនេះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លាង ដឺលុច ពីទីក្រុងភ្នំពេញ
បច្ចុប្បន្ននេះ មានផែនការសាងសង់ទំនប់វារីអគ្គីសនីចំនួន១១កន្លែងដែលគេកំពុងស្នើឡើងសម្រាប់ទន្លេមេគង្គប៉ែកខាងក្រោម។ ទន្លេមេគង្គក្រោមដែលហូរកាត់ប្រទេសឡាវ ថៃ កម្ពុជា និងវៀតណាម។ ប្រសិនបើទំនប់ណាមួយក្នុងចំណោមទំនប់ទាំងនេះត្រូវបានសាងសង់នោះ វានឹងកាត់ផ្តាច់ប្រព័ន្ធអេកូឡូស៊ីនៃទន្លេមេគង្គប៉ែកខាងក្រោម និងបណ្តាលអោយមានផលប៉ះពាល់ជាអវិជ្ជមានផ្សេងៗ។
ហេតុដូច្នេះហើយបានជាស្ថាប័នធនាគារធំៗមកពីសហរដ្ឋអាមេរិក និងអឺរ៉ុប និងអាស៊ីបានជួបប្រជុំគ្នាជាលើកដំបូង នៅក្នុងទីក្រុងបាងកក ប្រទេសថៃនៅថ្ងៃទី២៤កញ្ញានេះ ដើម្បីពិភាក្សាគ្នាអំពីការទទួលខុសត្រូវរបស់ខ្លួន និងរកមធ្យោបាយដើម្បីកាត់បន្ថយផលប៉ះពាល់ដែលកើតចេញពីការកសាងទំនប់វារីអគ្គីសនីទាំងនេះ។ កិច្ចប្រជុំនេះត្រូវបានរៀបចំដោយអង្គការWWF។
សេចក្តីប្រកាសព័ត៌មានរបស់អង្គការWWFសរសេរថា ការព្យាករណ៍មួយចំនួនបង្ហាញថា ផលិតភាពនៃជលផលប្រចាំឆ្នាំនៅតំបន់មេគង្គប៉ែកខាងក្រោម ដែលមានតម្លៃជាទឹកប្រាក់រហូតដល់៧ពាន់លានដុល្លារនោះ នឹងអាចធ្លាក់ចុះរហូតដល់៧០ភាគរយ ដោយសារទំនប់វារីអគ្គីសនីនៅតាមដងទន្លេមេគង្គក្រោម។ មិនតែប៉ុណ្ណោះ ប្រភេទសត្វសំខាន់ៗដូចជាត្រីរាជ និងសត្វផ្សោតប្រហែលអាចប្រឈមនឹងការឈានទៅផុតពូជ ប្រសិនបើទំនប់វារីអគ្គីសនីទាំង១១នេះត្រូវបានសាងសង់នោះ។
អង្គការWWF បានស្នើអោយមានការពន្យារពេលរហូតដល់១០ឆ្នាំខាងមុខទៀត មុនឈានដល់ការឯកភាពលើការសាងសង់ទំនប់វារីអគ្គីសនីនៅទន្លេមេគង្គប៉ែកខាងក្រោម ដើម្បីធានាថា ផលប៉ះពាល់ដែលកើតចេញពីទំនប់វារីអគ្គីសនី ត្រូវបានគេសិក្សាយ៉ាងល្អិតល្អន់។ ស្របពេលជាមួយគ្នានេះ លោកMarc Goichotទីប្រឹក្សាផ្នែកនិរន្តរភាពហេដ្ឋារចនាសម្ព័ន្ធនៃអង្គការWWF មហាតំបន់មេគង្គបាននិយាយថា គេអាចកាត់បន្ថយផលប៉ះពាល់ពីគម្រោងវារីអគ្គីសនីចំពោះប្រព័ន្ធអេកូឡូស៊ីបាន។ នោះគឺការសាងសង់ទំនប់វារីអគ្គីសនីក្នុងតំបន់លិចទឹកក្បែរដងទន្លេ ជាជាងសាងសង់កាត់ទន្លេ។ ឬវិធីម្យ៉ាងទៀត គេអាចអនុវត្តគម្រោងវារីអគ្គីសនីមួយដោយគ្មានទំនប់តែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ