WWF៖ ទំនប់វារីអគ្គីសនី នៅទន្លេមេគង្គគំរាមកំហែងពពួកត្រីរាជ
របាយការណ៍ថី្មមួយរបស់ អង្គការមូលនិធិអភិរក្សសត្វព្រៃ WWF បានរកឃើញថា ចំនួនត្រីរាជ នៅតំបន់មេគង្គ នឹងឈានទៅប្រឈមនឹងការផុតពូជ ប្រសិនបើផែនការអភិវឌ្ឍន៍វារីអគ្គិសនី ក្នុងតំបន់ទន្លេមេគង្គ នៅតែបន្ត។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លី ម៉េងហួរ
របាយការណ៍ បានរៀបរាប់ថា ត្រីទំហំធំៗ ពិសេសត្រីរាជ និងត្រីគល់រាំង កំពុងប្រឈមនឹងការបាត់បង់ ដោយសារតែការអភិវឌ្ឍន៍ទំនប់វារីអគ្គិសនី តាមដងទន្លេមេគង្គ ពិសេសទំនប់វារីអគ្គិសនី នៅក្នុងប្រទេសឡាវ។
ត្រីរាជ ( Dog-eating catfish ) និងត្រីគល់រាំង ជាប្រភេទត្រីនិមិត្តរូប របស់ជាតិកម្ពុជា ហើយជាត្រី ដែលមានទំហំធំជាងគេបំផុត លើសកលលោក។ ត្រីរាជ និងត្រីគល់រាំង ដែលមួយៗ មានទំងន់ ៣០០ គីឡូក្រាម ស្ថិតនៅលំដាប់ទី ៥ ក្នុងចំណោមប្រភេទធំៗ ទាំង ១០ ប្រភេទ នៅលើសកលលោក។ ក៏ប៉ុន្តែត្រីទំហំធំនេះ ជាប្រភេទត្រី រងការគំរាមកំហែងជិតផុតពូជ ដែលកំពុងរស់នៅក្នុងទន្លេមេគង្គ។
លោក រ៉ូជ័រ មុលុត ( Roger Mollot ) អ្នកជីវវិទូ របស់អង្គការ មូលនិធិអភិរក្សសត្វព្រៃ WWF ប្រចាំប្រទេសឡាវ បានលើកឡើង ក្នុងសេចក្តីថ្លែងការណ៍ថា ៖ “ត្រីដែលមានទំហំធំ ប៉ុនត្រីរាជ មិនអាចហែលកាត់របាំងធំ ប៉ុនទំនប់វារីអគ្គីសនី ដើម្បីទៅផ្នែកខាងលើមេគង្គ ដើម្បីធ្វើការពងកូនបានទេ។ សភាពបែបនេះ នឹងអាចនាំឱ្យចំនួនត្រីទឹកសាប ដ៏សំខាន់មួយប្រភេទនេះ ប្រឈមនឹងការបាត់បង់។”
ទិន្នន័យវិទ្យាសាស្ត្រ បច្ចុប្បន្នបង្ហាញថា ត្រីរាជ ធ្វើចរាចរណ៍ពីទន្លេសាបក្នុងប្រទេសកម្ពុជា ឆ្ពោះទៅទន្លេមេគង្គ ដើម្បីទៅធ្វើការពងកូន នៅប៉ែកខាងជើងប្រទេសថៃ និងឡាវ។ ក៏ប៉ុន្តែទំនប់វារីអគ្គិសនីទាំងឡាយ ដែលត្រូវគេសាងសង់នៅត្រង់ចំណុចប៉ែកខាងក្រោមមេគង្គ នឹងរាំងស្ទះ ដល់ការធ្វើចរាចរណ៍ ដើម្បីពងកូនរបស់ត្រីប្រភេទកម្រនេះ។
សេចក្តីប្រកាសព័ត៌មានរបស់អង្គការ WWF ក៏បានលើកឡើងថា គម្រោងសាងសង់ទំនប់វារីអគ្គីសនីនៅលើទន្លេមេគង្គ ក្នុងខេត្ត សាយ៉ាប៊ូលី ភាគខាងជើងប្រទេសឡាវ គឺជាការគំរាមកំហែង ដល់ការរស់នៅរបស់ត្រីរាជ។ ទំនប់វារីអគ្គីសនី សាយ៉ាប៊ូលី គឺជាទំនប់ទីមួយដែលមាននៅលើទន្លេមេគង្គផ្នែកខាងក្រោម ដែលនឹងត្រូវយកទៅធ្វើការវាយតម្លៃ មុនពេលដែលប្រទេសទាំងឡាយដែលជាសមាជិកគណៈកម្មការទន្លេមេគង្គ ផ្តល់ប្រឹក្សាទៅលើការសាងសង់។
សេចក្តីប្រកាស ក៏បានកត់សម្គាល់ថា ទំនប់វារីអគ្គិសនី ក្នុងតំបន់មេគង្គប៉ែកខាងក្រោម មិនត្រឹមតែប៉ះពាល់ ដល់ពពួកត្រីមានទំហំធំៗទាំងនេះទេ វាថែមទាំងអាចធ្វើឱ្យការប្រែប្រួលអាកាសធាតុ កាន់តែធ្ងន់ធ្ងរថែមទៀត នៅក្នុងប្រព័ន្ធមេគង្គ ដែលជាតំបន់ជលផល និងកសិកម្មដ៏សម្បូរបែបជាងគេមួយ នៅលើសកលលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ