១៧លើក ទើបរកបាននាយករដ្ឋមន្ត្រី
នៅទីបំផុត វិបត្តិនយោបាយអូសបន្លាយរយៈពេល៧ខែ ទំនងជាបានមកដល់ទីបញ្ចប់ហើយ ព្រោះពេលនេះ នេប៉ាល់មាននាយករដ្ឋមន្ត្រីថ្មីគឺ លោក ហ្សាឡាណាត ខាណាល់ (Jhalanath Khanal)។ លោក ហ្សាឡាណាត ខាណាល់ ដែលសភាបានបោះឆ្នោតផ្តល់ទំនុកចិត្ត ជាប្រមុខរដ្ឋាភិបាលនេប៉ាល់ កាលពីថ្ងៃម្សិលមិញ បន្ទាប់ពីបានឆ្លងកាត់ការសាកល្បងចំនួន១៦លើក គិតចាប់ពីខែមិថុនា២០១០មក។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អៀង សុខម៉ិញ
មានអាយុ ៦០ឆ្នាំ លោក ហ្សាឡាណាត ខាណាល់ ដែលជាប្រធានគណបក្សរួបរួមម៉ាក្ស-លេនីននិយម អាចទទួលជោគជ័យ នៅក្នុងការបោះឆ្នោតសភាបាន ក៏ព្រោះតែ ពួកម៉ៅនិយម ដែលមាន ២៣៦ អាសនៈ បានងាកមកគាំទ្រលោកនៅនាទីចុងក្រោយ ពោលគឺបន្ទាប់ពី លោក ប្រាចាន់ដា (Prachanda) ប្រធានគណបក្សម៉ៅនិយម បានសម្រេចចិត្តដកខ្លួនចេញពីការប្រកួតប្រជែង។
នេប៉ាល់ ប្រទេសក្រីក្រជាងគេមួយក្នុងលោក ដែលធ្លាក់ក្នុងវិបត្តិសេដ្ឋកិច្ចដ៏ធ្ងន់ធ្ងរ គ្មានរដ្ឋាភិបាលតាំងពីថ្ងៃទី ៣០មិថុនា២០១០ មក។ នាយករដ្ឋមន្ត្រីចាស់បានលាលែងចេញពីតំណែងដោយសារតែគំនាបនយោបាយខ្លាំងពីសំណាក់បក្សប្រឆាំងម៉ៅនិយម។ គណបក្សនេះមិនអាចបង្កើតរដ្ឋាភិបាលចម្រុះបាន។ នេះគឺជាលើកទី១៧ហើយ ដែលសភាបានសម្រេចរកសំឡេងដាច់ខាតបាន ដើម្បីប្រកាសជាផ្លូវការឈ្មោះនាយករដ្ឋមន្ត្រី។
ជាមួយនឹងសំឡេងគាំទ្រ ៣៦៨សំឡេងក្នុងសភា លោក ខាណាល់ បានក្លាយជាប្រមុខរដ្ឋាភិបាលថ្មី បិទបញ្ចប់ទំព័រនយោបាយមិនច្បាស់គ្មានមេគ្មានកើយរបស់នេប៉ាល់។ ប៉ុន្តែ ការបង្កើតរដ្ឋាភិបាលថ្មី នឹងមានលក្ខណៈស្មុគស្មាញ។ គេប៉ាន់ប្រមាណថា ពិតជានឹងមានវត្តមានអតីតពួកឧទ្ទាមមិនខាន នៅក្នុងរដ្ឋាភិបាល។ រដ្ឋាភិបាលថ្មី ត្រូវតែស្វែងរកឲ្យបានការគាំទ្រពីគ្រប់គណបក្ស បើពុំនោះទេ នេប៉ាល់អាចនឹងជួបភាពទ័លច្រកទៀត។
ទោះជាយ៉ាងណាក៏ដោយ ក៏ភ្លាមមួយរំពេច នៅថ្ងៃព្រហស្បតិ៍ម្សិលមិញ លោក បាន គីមូន អគ្គលេខាធិការអង្គការសហប្រជាជាតិ បានសម្តែងការកោតសរសើរចំពោះលទ្ធផលដ៏គាប់ប្រសើរ ដែលសភានេប៉ាល់សម្រេចជ្រើសរើសប្រមុខរដ្ឋាភិបាលបាន។ ពិធីចូលកាន់តំណែងនាយករដ្ឋមន្ត្រីនឹងប្រព្រឹត្តទៅថ្ងៃអាទិត្យខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ