ព្រះអង្គម្ចាស់ នរោត្តម រណឫទ្ធិ ផ្តើមវាយប្រហារគណបក្សសមរង្ស៊ី និងសិទ្ធិមនុស្ស
នៅព្រឹកថ្ងៃពុធ ទី៣០ឧសភានេះ ព្រះអង្គម្ចាស់ នរោត្តម រណឫទ្ធិ បានលើកឡើងថា ការបត់បែនរបស់ព្រះអង្គពេលនេះ តាមរយៈការរួបរួមរវាងហ្វ៊ុនស៊ិនប៉ិច និងគណបក្ស នរោត្តម រណឫទ្ធិ ក្រោមការឧបត្ថម្ភគាំទ្រពីលោកនាយករដ្ឋមន្ត្រី ហ៊ុនសែន គឺជាមធ្យោបាយតែមួយគត់ សម្រាប់ចូលរួមក្នុងរដ្ឋាភិបាលអាណត្តិក្រោយ។ ក្នុងពេលជួបជុំសកម្មជនគណបក្សនរោត្តម រណឫទ្ធិ ធ្វើយុទ្ធនាការ ហែក្បួនឃោសនាបោះឆ្នោតឃុំសង្កាត់ នៅបរិវេណវត្តភ្នំ ព្រះអង្គម្ចាស់ នរោត្តម រណឫទ្ធិ ក៏បានទិតៀនចំៗលើគណបក្សសមរង្ស៊ី និងគណបក្សសិទ្ធិមនុស្ស របស់លោកកឹមសុខា គឺគណបក្សប្រឆាំងទាំងពីរ មិនអាចដោះស្រាយបញ្ហាប្រឈមរបស់ប្រទេសជាតិ រួមមាន៖ បញ្ហាពុករលួយ និងការរំលោភដីធ្លីបានឡើយ។
ចុះផ្សាយនៅថ្ងៃ៖
ស្តាប់ - ០១:៤៦
ព្រះអង្គម្ចាស់ នរោត្តម រណឫទ្ធិ បានប្រកាសនៅថ្ងៃនេះថា មានតែការវិលត្រលប់របស់ព្រះអង្គ ទៅកាន់ហ្វ៊ុនស៊ិនប៉ិចវិញទេ ទើបអាចប្រមូលកម្លាំងអ្នករាជានិយម បូកបញ្ចូលជាមួយនឹងកម្លាំងជាតិ របស់គណបក្សប្រជាជនកម្ពុជា និងលោកនាយករដ្ឋមន្ត្រី ហ៊ុនសែន។ ធ្វើរបៀបនេះ យើងនឹងអាចឈានទៅរកការបង្រួបបង្រួមផង និងអាចដោះស្រាយបញ្ហាជាតិជាច្រើន ដូចជា បញ្ហាដីធ្លី និងបញ្ហាពុករលួយ ជាដើម។ តាមព្រះអង្គម្ចាស់ នរោត្តម រណឫទ្ធិ របត់ថ្មីរបស់ព្រះអង្គពេលនេះ នឹងអាចឈានទៅរកការបង្រួបបង្រួមផង និងការចូលរួមចំណែកក្នុងការដោះស្រាយបញ្ហាជាតិផង។
ផ្ទុយទៅវិញ ចំពោះមុខអ្នកកាសែត នៅព្រឹកមិញ ព្រះអង្គម្ចាស់ នរោត្តម រណឫទ្ធិ បានលើកពីសារៈសំខាន់នៃការឧបត្ថម្ភគាំទ្ររបស់លោកនាយករដ្ឋមន្ត្រី ហ៊ុន សែន ដល់ការបង្រួបបង្រួមរវាងហ្វ៊ុនស៊ិនប៉ិច និងគណបក្សរបស់ព្រះអង្គ ដែលឈានដល់ការចុះកិច្ចព្រមព្រៀង កាលពីថ្ងៃ២៤ឧសភា។
ព្រះអង្គម្ចាស់ ក៏បានរម្លឹកព្រះរាជបន្ទូលរបស់សម្តេចឪ នរោត្តម សីហនុ ក្នុងព្រះរាជពិធីចម្រើនព្រះជន្មព្រះអង្គ កាលពីខែតុលា ចំពោះការអំពាវនាវអោយអ្នកនយោបាយរួបរួមគ្នា។ ព្រះអង្គម្ចាស់ នរោត្តម រណឫទ្ធិ បានចាប់អារម្មណ៍ព្រះរាជបន្ទូលរបស់សម្តេចឪ ដែលព្រះអង្គមាន ព្រះរាជឱង្ការថា “ហ្លួង និងសម្តេច ហ៊ុន សែន”។ ពាក្យពីរម៉ាត់នេះ ត្រូវបានព្រះអង្គម្ចាស់ចាត់ទុកថា មានន័យស្មើនឹងសហប្រតិបត្តិការរួបរួមគ្នារវាងព្រះអង្គ និងលោកនាយករដ្ឋមន្ត្រី។
ជាមួយគ្នានោះ ព្រះអង្គម្ចាស់ នរោត្តម រណឫទ្ធិ ក៏បានលើកឡើងថា ការបោះឆ្នោតឲ្យគណបក្សសមរង្ស៊ី និងគណបក្សសិទ្ធិមនុស្ស គឺដូចជាបោះចូលទឹកទន្លេ។ ព្រះអង្គពន្យល់ថា ក្នុងរយៈពេល ៤ អាណត្តិកន្លងមក គណបក្សប្រឆាំងមិនបានជួយដោះស្រាយបញ្ហាអ្វីជូនប្រជាជនទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ