Obama ស្នើប្រធានាធិបតីវៀតណាម អោយជំរុញការគោរពសិទ្ធិមនុស្សបានប្រសើរទៅមុខ
ប្រធានាធិបតីវៀតណាម លោក ជឿង តាន់សាង បានបំពេញទស្សនកិច្ចកាលពីថ្ងៃព្រហស្បតិ៍ម្សិលមិញ នៅសហរដ្ឋអាមេរិក។ លោកបានជួបប្រធានាធិបតីអាមេរិក បារ៉ាក់ អូបាម៉ា នៅសេតវិមាន។ ក្នុងជំនួបនេះ ប្រធានាធិបតីទាំងពីរបានលើកពីបញ្ហាសិទ្ធិមនុស្សនៅវៀតណាម មកពិភាក្សាគ្នា។ លោកអូបាម៉ា បានស្នើលោកជឿង តាន់សាង ធ្វើយ៉ាងណាអោយការគោរពសិទ្ធិមនុស្សនៅវៀតណាម បានប្រសើរទៅមុខ។ ដោយឡែក សមាជិកសហគមន៍ជនភៀសខ្លួនវៀតណាម នៅសហរដ្ឋអាមេរិក រាប់រយនាក់បាននាំគ្នាធ្វើបាតុកម្ម ប្រឆាំងនឹងទស្សនកិច្ចរបស់ប្រធានាធិបតីវៀតណាម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤២
ក្នុងសន្ទរកថា ថ្លែងទៅកាន់អ្នកសារព័ត៌មាន កាលពីថ្ងៃព្រហស្បតិ៍ម្សិលមិញ ប្រធានាធិបតីអាមេរិកបានលើកឡើងថា លោកបានជជែកដោយត្រង់ៗតែម្តងជាមួយប្រធានាធិបតីវៀតណាម អំពីភាពប្រសើរឡើងនៃការគោរពសិទ្ធិមនុស្សនៅវៀតណាម និងបញ្ហាលំបាកនានា ដែលនៅតែបន្តមានក្នុងប្រទេសនេះ។
លោកអូបាម៉ា បានប្រាប់លោក ជឿង តាន់សាង ថាអាមេរិកនៅតែបន្តជឿជាក់ថាប្រទេសទាំងពីរត្រូវតែគោរពអោយបាននូវសេរីភាពបញ្ចេញមតិយោបល់ សេរីភាពសាសនា សេរីភាពធ្វើបាតុកម្ម។ គួរបញ្ជាក់ថា ដោយសារតែបញ្ហាសិទ្ធិមនុស្សនៅវៀតណាមនេះ សមាជិកសភាអាមេរិកមួយចំនួន មិនចង់អោយលោកអូបាម៉ា ទទួលជួបលោកជឿង តាន់សាង ឡើយ។
ដោយឡែក ទាក់ទងនឹងទំនាក់ទំនងរវាងវៀតណាមនិងអាមេរិក លោកអូបាម៉ា បន្ថែមថា ប្រទេសទាំងពីរបានឈានទៅដល់ការផ្តល់ទំនុកទុកចិត្តគ្នាទៅវិញទៅមកហើយ ថ្វីដ្បិតតែអតីតកាលរវាងប្រទេសទាំងពីរមានភាពស្មុគ្រស្មាញក្តី។ ប្រធានាធិបតីអាមេរិកចង់សំដៅលើអតីតកាលសង្គ្រាមវៀតណាម។ គួររំលឹកថា លោក ជឿង តាន់សាង ជាប្រធានាធិបតីវៀតណាមទីពីរ ដែលបំពេញទស្សនកិច្ចនៅអាមេរិក ក្រោយពេលដែលសង្គ្រាមរវាងប្រទេសទាំងពីរបានបញ្ចប់ ក្នុងឆ្នាំ ១៩៧៥។
វៀតណាមចូលរួមក្នុងកិច្ចពិភាក្សាស្តីពី ដៃគូក្នុងតំបន់អន្តរប៉ាស៊ីហ្វិក ដែលស្ថិតក្នុងគំរោងដោះដូរពាណិជ្ជកម្មសេរី គាំទ្រដោយក្រុងវ៉ាស៊ីនតោន។ អាមេរិកចង់អោយកិច្ចព្រមព្រៀងមួយសំរេចបាន យ៉ាងយូរក្នុងដំណាច់ឆ្នាំនេះ ព្រោះថា គំរោងនេះអាចនឹងជួយបង្កើតការងារធ្វើ និងបង្កើនការវិនិយោគ ក្នុងតំបន់ ពិសេសក្នុងប្រទេសទាំងពីរតែម្តង។ ទាក់ទងជម្លោះសមុទ្រចិនខាងត្បូង ដែលជាទំនាស់រវាងចិននិងវៀតណាម ព្រមទាំងប្រទេសជាច្រើនទៀតដែរនោះ លោកអូបាម៉ា បានសុំជាថ្មីម្តងទៀត អោយមានការដោះស្រាយតាមបែបសន្តិភាព។
លោកជឿង តាន់សាង ក៏បានអញ្ជើញលោកអូបាម៉ា អោយទៅទស្សនកិច្ចវៀតណាមមុននឹងលោកបញ្ចប់អណត្តិ នៅដើមឆ្នាំ២០១៧ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ