បារាំងចេញមុខការពារអ៊ីស្រាអែលជំនួសអាមេរិក
ចុះផ្សាយនៅថ្ងៃ៖
ស្តាប់ - ០៣:៤១
តាំងពីថ្ងៃអាទិត្យចុងសប្តាហ៍មុនមក រហូតដល់ថ្ងៃអង្គារនេះ ប្រធានាធិបតីបារាំង លោក ហ្វ្រង់ស៊័រ ហូឡង់ បានបំពេញទស្សនកិច្ចនៅអ៊ីស្រាអែលនិងប៉ាឡេស្ទីន។ ទស្សនកិច្ចនេះ កាន់តែធ្វើអោយគេមើលឃើញថា បារាំងកំពុងតែព្យាយាមខិតទៅជិតអ៊ីស្រាអែលខ្លាំងឡើងៗ ខណៈដែលអាមេរិកដែលបានធូរស្រាលទំនាក់ទំនងជាមួយអ៊ីរ៉ង់នោះ ហាក់បានឃ្លាតឆ្ងាយបន្តិចពីអ៊ីស្រាអែល។
ក្នុងពេលថ្មីៗនេះ ក្នុងកិច្ចពិភាក្សាសំណុំរឿងនុយក្លេអ៊ែរអ៊ីរ៉ង់ នៅក្រុងហ្សឺណែវ រវាងប្រទេសមហាអំណាច៥+១ គឺរវាង អាមេរិក ចិន បារាំង អង់គ្លេស រុស្ស៊ី អាល្លឺម៉ង់ ជាមួយអ៊ីរ៉ង់ បារាំងបានបង្ហាញខ្លួនកាន់តែជិតដិតឡើង ជាមួយអ៊ីស្រាអែលដែលជាសត្រូវរបស់អ៊ីរ៉ង់។ ជាក់ស្តែង នៅដើមខែវិច្ឆិកានេះ ប្រទេសជាច្រើនក្នុងកិច្ចពិភាក្សា បានយល់ព្រមលើកទណ្ឌកម្មនុយក្លេអ៊ែរអោយដល់អ៊ីរ៉ង់ ហើយគ្រប់ភាគីទាំងអស់ស្ទើរតែសំរេចចេញកិច្ចព្រមព្រៀងរួមគ្នាមួយទៅហើយ។ ប៉ុន្តែ ស្រាប់តែបារាំងបង្ហាញជំហរតឹងតែងជាប់ៗគ្នា ចំពោះកម្មវិធីនុយក្លេអ៊ែរអ៊ីរ៉ង់ ដោយបង្ខំអោយអ៊ីរ៉ង់បំភ្លឺពីអនាគតស្តុកនៃធាតុអ៊ុយរ៉ានីញ៉ូមដែលចម្រាញ់ហើយ២០ភាគរយ បំភ្លឺពីការចម្រើនធាតុអ៊ុយរ៉ានីញ៉ូម ពីមជ្ឈមណ្ឌលទឹកធ្ងន់អារ៉ាក់ អោយបានកាន់តែលំអិតថែមទៀត។ បារាំងបានយកជើងរាទឹក ធ្វើអោយបរាជ័យដល់ការខិតខំប្រឹងប្រែងពិភាក្សារវាងអាមេរិក អឺរ៉ុប និងអ៊ីរ៉ង់ក្នុងរយៈពេលច្រើនខែមកនេះ។
ខណៈទំនាក់ទំនងរវាងអាមេរិកដែលជាសម្ព័ន្ធមិត្តនឹងអ៊ីស្រាអែល បានឈានទៅរកភាព ធូរស្រាលជាមួយអ៊ីរ៉ង់ ធ្វើអោយអ៊ីស្រាអែលស្ថិតក្នុងភាពឯកានោះ បារាំងបានជំនួសមុខអោយអាមេរិក ដោយចេញមុខមាត់ការពារសន្តិសុខអោយអ៊ីស្រាអែល។ យើងសង្កេតឃើញថា បារាំងហាក់យកចិត្តអ៊ីស្រាអែលណាស់ ជាពិសេសចាប់ពីថ្ងៃអាទិត្យកន្លងទៅ នៅពេលប្រធានាធិបតីបារាំង លោក ហ្វ្រង់ស៊័រ ហូឡង់ បានចុះទៅទស្សនកិច្ចអ៊ីស្រាអែល ជួប ជាមួយ ប្រធានាធិបតី និងនាយករដ្ឋមន្ត្រីអ៊ីស្រាអែល។
គ្រាន់តែមកដល់អ៊ីស្រាអែលភ្លាម លោកហ្វ្រង់ស៊័រ ហូឡង់ បានលើកឡើងភា្លមៗថា បារាំងមិនចុះញ៉មនឹងបញ្ហារីកសាយភាយនុយក្លេអ៊ែរដាច់ខាត ប្រសិនបើបារាំងមិនទាន់ច្បាស់ក្នុងចិត្តថា អ៊ីរ៉ង់ពិតជាបោះបង់ចោលអាវុធនុយក្លេអ៊ែរខ្លួននោះទេ។
ត្រង់ចំណុចនេះ ប្រធានាធិបតីបារាំងចង់បង្ហាញដល់អ៊ីស្រាអែលថា បារាំងត្រៀមការពារសន្តិសុខដល់អ៊ីស្រាអែល ករណីមានការវាយប្រហារពីអ៊ីរ៉ង់ដែលជាសត្រូវសួរពូជ របស់អ៊ីស្រាអែលនោះ។ ទង្វើរបស់បារាំងធ្វើអោយអ៊ីស្រាអែលឥតញញើតក្នុងការប្រើពាក្យថា បារាំងជាប្រទេសមហាមិត្តរបស់អ៊ីស្រាអែលនោះឡើយ ព្រោះថា ក្នុងកិច្ចពិភាក្សានុយក្លេអ៊ែរ អ៊ីរ៉ង់នៅក្រុងហ្សឺណែវ គ្រប់ភាគីហាក់ងាកទៅចងសម្ព័ន្ធមិត្តជាមួយអ៊ីរ៉ង់ មានតែបារាំងប៉ុណ្ណោះ ដែលមិនបានបោះបង់អ៊ីស្រាអែលអោយនៅកំសត់ឯកា។ បារាំងមិនខ្វល់ថា អ៊ីរ៉ង់គិតយ៉ាងណា រឺក៏ក្តៅក្រហាយយ៉ាងណានោះទេ។
ពិតណាស់ បារាំងចង់បង្ហាញភាពស្និទ្ធស្នាលជាមួយអ៊ីស្រាអែល។ ប៉ុន្តែ នៅពីក្រោយភាពស្និទ្ធស្នាលនេះ បារាំងហាក់សម្លឹងឃើញប្រយោជន៍សេដ្ឋកិច្ចពាណិជ្ជកម្មសំរាប់ជាតិខ្លួនឯណោះទៅវិញទេ។ គួរកត់សម្គាល់ថា ទស្សនកិច្ចប្រធានាធិបតីបារាំងនៅអ៊ីស្រាអែល មានអមដំណើរដោយប្រធានក្រុមហ៊ុនដល់ទៅជាង៤០នាក់ តំណាងអោយសហគ្រាសបារាំងប្រមាណ១៥០។ ទិសដៅទស្សនកិច្ចនេះគឺជំរុញទំនាក់ទំនងសេដ្ឋកិច្ច ពាណិជ្ជកម្មជាមួយអ៊ីស្រាអែលឡើងវិញ ព្រោះថា សំរាប់អ៊ីស្រាអែល បារាំងជាប្រទេសលំដាប់ទី១១ប៉ុណ្ណោះ ក្នុងទំនាក់ទំនងសេដ្ឋកិច្ចពាណិជ្ជកម្ម។ អ៊ីស្រាអែលជាប្រទេសអ្នកមាន មានបច្ចេកវិទ្យាទំនើប ឆ្លាតវៃក្នុងការរកស៊ី។ ប្រធានក្រុមហ៊ុនបារាំងចង់សិក្សាពីភាពឆ្លាតវៃពាណិជ្ជកម្មរបស់អ៊ីស្រាអែល។ បារាំងចង់អោយទំនាក់ទំនងសេដ្ឋកិច្ចពាណិជ្ជកម្មជាមួយអ៊ីស្រាអែល បានកើនទឹកប្រាក់ហួសពីជាងពីរពាន់លានដុល្លារ ក្នុងពេលកន្លងមកថែមទៀត។
ទំនាក់ទំនងសេដ្ឋកិច្ចពិតជាសំខាន់ណាស់សំរាប់លើកស្ទួយសេដ្ឋកិច្ចបារាំងនៅពេលនេះ ពិសេសក្រោយពេលទីភ្នាក់ងារវាយតម្លៃហានិភ័យ Sandard & Poor's ទើបបានបញ្ចុះចំណាត់ថា្នក់បារាំងពីAA+ អាអា បូក អោយធ្លាក់មកនៅត្រឹមAA អាអា ធម្មតា កាលពីថ្ងៃ៨វិច្ឆិកាកន្លងទៅ។ ក្នុងស្រុក បារាំងកំពុងប្រឈមនឹងការកើនឡើងនៃជនគ្មានការងារធ្វើ រួមទាំងបញ្ហាជាប់គាំងនយោបាយពន្ធដារផងដែរ។
ដូច្នេះ បារាំងពិតជាឆ្លាតវៀងវៃមិនតិចទេ ដោយចេះឆ្លៀតឱកាសដើម្បីចំណេញប្រយោជន៍ពីទំនាក់ទំនងជាមួយអ៊ីស្រាអែលបាន។ បារាំងក៏ឆ្លាតវៃផងដែរ ដើម្បីបន្តទំនាក់ទំនងជាមួយប៉ាឡេស្ទីន ដែលតែងទាស់ទែងគ្នារឿងទឹកដីជាមួយអ៊ីស្រាអែលនោះ។ ប្រធានាធិបតីបារាំងចេះប៉ាន់ប្រមាណមុខមាត់បារាំងនៅពេលទស្សនកិច្ចទឹកដីប៉ាឡេស្ទីន។ នៅពេលជួបជាមួយប្រធានរដ្ឋអំណាចប៉ាឡេស្ទីន លោក ម៉ាមូឌ អាបាស កាលពីថ្ងៃចន្ទម្សិលមិញនេះ លោកហូឡង់បានអំពាវនាវអោយអ៊ីស្រាអែលបញ្ឈប់អាណានិគមខ្លួនជាស្ថាពរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ