គណបក្សភឿថៃលើវិថីពោរពេញដោយបន្លាក្រោយការបោះឆ្នោត
ចុះផ្សាយនៅថ្ងៃ៖
ស្តាប់ - ០៣:៤៦
ក្រោយការឈ្នះឆ្នោតភ្លូកទឹកភ្លូកដីកាលពីថ្ងៃទី៣កក្កដាកន្លងទៅ គណបក្សភឿថៃកំពុងត្រៀមខ្លួនដឹកនាំប្រទេសថៃជំនួសគណបក្សប្រជាធិបតេយ្យរបស់លោកអាភីស៊ីត វាចាជីវ៉ា។ ប៉ុន្តែ គណបក្សកាន់អំណាចដែលចាញ់ឆ្នោតកំពុងរិះរកគ្រប់មធ្យោបាយដើម្បីរារាំងផ្លូវទៅកាន់តំណែងនាយករដ្ឋមន្ត្រីរបស់លោកស្រី យីងឡាក់ ស៊ីណាវ៉ាត្រា។ ពាក្យបណ្តឹងមួយចំនួន ដែលគណបក្សប្រជាធិបតេយ្យប្តឹងគណបក្សភឿថៃបានធ្វើឲ្យគណៈកម្មាធិការរៀបចំបោះឆ្នោតមិនអាចអនុម័តបេក្ខភាពលោកស្រី យីងឡាក់ ជាសមាជិកសភានៅឡើយទេ។ តើលោកស្រី យីងឡាក់ ស៊ីណាវ៉ាត្រា អាចកាប់ឆ្ការបន្លាចេញពីផ្លូវឆ្ពោះទៅកាន់តំណែងនាយករដ្ឋមន្ត្រីស្របតាមឆន្ទៈរបស់ពលរដ្ឋថៃបានដែរឬទេ?
ដូចដែលក្រុមអ្នកវិភាគបានមើលឃើញតាំងពីដើមទីអ៊ីចឹង ផ្លូវទៅកាន់តំណែងនាយករដ្ឋមន្ត្រី របស់អ្នកនយោបាយចេញពីត្រកូលស៊ីណាវ៉ាត្រាពោរពេញដោយបន្លា។ រយៈពេលតែ១០ថ្ងៃប៉ុណ្ណោះក្រោយការឈ្នះឆ្នោតភ្លូកទឹកភ្លូកដីកាលពីថ្ងៃទី៣កក្កដា មានពាក្យបណ្តឹងយ៉ាងហោចណាស់ក៏ពីរដែរដែលគណបក្សប្រជាធិបតេយ្យរបស់លោកអាភីស៊ីតប្តឹងចោទប្រកាន់គណបក្សភឿថៃរបស់លោកស្រី យីងឡាក់ ស៊ីណាវ៉ាត្រា។
បណ្តឹងទី១ទាក់ទងនឹង ការពាក់ព័ន្ធរបស់លោកថាក់ស៊ីនជាមួយគណបក្សភឿថៃ។ គណបក្សកាន់អំណាចនៃរដ្ឋាភិបាលចាំផ្ទះរបស់នាយករដ្ឋមន្ត្រី អាភីស៊ីត ចោទភឿថៃថាបានអនុញ្ញាតឲ្យលោកថាក់ស៊ីនដែលច្បាប់ហាមឃាត់មិនឲ្យធ្វើនយោបាយរយៈពេល៥ឆ្នាំចូលរួមក្នុងយុទ្ធនាការឃោសនារកសំឡេងឆ្នោតពីចម្ងាយតាមរយៈវីដេអូខុនហ្វេរ៉ិន។ នេះជាកម្មវត្ថុដែលគណបក្សប្រជាធិបតេយ្យប្តឹងឲ្យរំលាយគណបក្សភឿថៃចោល។ រីឯពាក្យបណ្តឹងទី២ជាប់ទាក់ទងនឹងការទិញសន្លឹកឆ្នោត។
គណបក្សប្រជាធិបតេយ្យបានចោទលោកស្រីយីងឡាក់ថាបានទិញសន្លឹកឆ្នោតព្រោះតែលោកស្រីបានឆាមីឲ្យអ្នកគាំទ្ររបស់ខ្លួនទទួលទាននៅពេលឃោសនារកសំឡេងឆ្នោត។ រឿងបែបនេះស្តាប់ទៅគួរឲ្យអស់សំណើច ប៉ុន្តែ គណៈកម្មាធិការរៀបចំបោះឆ្នោតកំពុងបើកការស៊ើបអង្កេតតាមពាក្យបណ្តឹង។ បន្ថែមពីលើនេះ ក្រុមអាវលឿងបានព្យាយាមរករឿងគណបក្សភឿថៃដោយបានលើកឡើងពីភាពមិនប្រក្រតីជាច្រើនទៀតមកសម្អាងដើម្បីបង្កឧបសគ្គដល់គណបក្សដែលស្និទ្ធនឹងលោកថាក់ស៊ីនមួយនេះក្នុងការឈានជើងទៅកាន់អំណាច។
នេះនៅមិនទាន់រាប់បញ្ហាដែលលោកស្រីយីងឡាក់កំពុងប្រឈមជាមួយក្រុមអាវក្រហមដែលជាអ្នកស្មោះស្ម័គ្ររបស់គណបក្សភឿថៃផងទេ។ ចាប់តាំងពីក្រោយការឈ្នះឆ្នោតភា្លមៗ លោកស្រីយីងឡាក់ ស៊ីណាវ៉ាត្រា កំពុងប្រឈមនឹងជម្រើសទ្វេគ្រោះ៖ ជម្រើសទី១គឺការតម្រូវចិត្តក្រុមអាវក្រហមដែលទាមទារឲ្យរដ្ឋាភិបាលថ្មីបើកការស៊ើបអង្កេតទៅលើអំពើហិង្សាប្រកបដោយការបង្ហូរឈាមនៅកណ្តាលទីក្រុងបាងកកកាលពីឆ្នាំ២០១០ក្នុងព្រឹត្តិការណ៍បង្ក្រាបពួកបាតុករអាវក្រហមពីសំណាក់ក្រុមយោធា និងជម្រើសទី២គឺការសម្របសម្រួលជាមួយក្រុមយោធាដើម្បីឈានទៅបង្កើតរដ្ឋាភិបាលដោយចៀសវាងបាននូវរដ្ឋប្រហារ។ នេះជាជម្រើសដ៏មហាសែនលំបាកដែលអនាគតនាយករដ្ឋមន្ត្រីស្ត្រីដំបូងរបស់ប្រទេសថៃត្រូវដោះស្រាយ។
ជាការពិតណាស់ថា គណបក្សភឿថៃបានឆ្លងផុតដំណាក់កាលដ៏សំខាន់មួយដោយជោគជ័យនោះគឺជាដំណាក់កាលនៃការបំផ្លាញដំណើរការបោះឆ្នោតពីសំណាក់ក្រុមយោធាដ៏មានឥទ្ធិពលនៅពេលដែលពួកគេបានដឹងមុនថាគណបក្សភឿថៃនឹងឈ្នះឆ្នោត។ មិនត្រឹមតែមិនអាចបំផ្លាញការបោះឆ្នោតបានប៉ុណ្ណោះទេ ប៉ុន្តែ ទីបំផុតទៅ គណបក្សប្រជាធិបតេយ្យ និងក្រុមយោធាបានបង្ខំចិត្តទទួលស្គាល់លទ្ធផលបោះឆ្នោតដោយសារតែប្រជាពលរដ្ឋថៃដ៏ច្រើនលើសលប់បានបោះឆ្នោតគាំទ្រគណបក្សភឿថៃឲ្យដឹកនាំប្រទេស។
ប៉ុន្តែ នៅមិនទាន់ប្រាកដថារដ្ឋាភិបាលដែលដឹកនាំដោយលោកស្រីយីងឡាក់ ស៊ីណាវ៉ាត្រា អាចចៀសផុតពីរដ្ឋប្រហារយោធានៅឡើយទេ ខណៈដែលក្រុមអាវក្រហមកំពុងដាក់សម្ពាធលើលោកស្រីយីងឡាក់ឲ្យសើរើសំណុំរឿងបង្ក្រាបបាតុករប្រឆាំងរដ្ឋាភិបាលលោកអាភីស៊ីតកាលពីឆ្នាំមុន ដើម្បីវែកមុខជនដៃដល់យកមកកាត់ទោសនោះ? បញ្ហានៅត្រង់ថា មេដឹកនាំយោធាទំនងជាជ្រើសយករដ្ឋប្រហារជាជាងការអង្គុយរង់ចាំគេនាំខ្លួនទៅកាត់ទោសពីបទឧក្រិដ្ឋ។ នេះជាចំណោទសំខាន់ជាងគេមួយសម្រាប់រដ្ឋាភិបាលគណបក្សភឿថៃ។
ចុងក្រោយនេះ គណៈកម្មាធិការរៀបចំបោះឆ្នោតថៃមិនទាន់បានប្រកាសទទួលស្គាល់បេក្ខភាពលោកស្រីយីងឡាក់ ស៊ីណាវ៉ាត្រាជាសមាជិកសភាផ្លូវការនៅឡើយទេដោយសារតែលោកស្រីនៅជាប់ពាក្យបណ្តឹង។ តើពលរដ្ឋថៃមិនអាចមានអ្នកដឹកនាំស្របតាមឆន្ទៈរបស់ខ្លួនបានទេឬ? នេះជាចំណោទដែលនៅស្មុគស្មាញនៅឡើយរហូតមកទល់ពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ