កម្ពុជាត្រៀមទប់ទល់ពួកជ្រុលនិយមថៃពេលបកស្រាយសាលក្រមឆ្នាំ ១៩៦២
លោកនាយករដ្ឋមន្ត្រី ហ៊ុន សែន បានស្នើឲ្យកងកម្លាំងប្រដាប់អាវុធនៅតាមព្រំដែនព្រះវិហារ បង្កើនការប្រុងប្រយ័ត្នចំពោះសភាពការណ៍អាក្រក់ណាមួយ ដែលអាចកើតឡើងជាយថាហេតុ ដោយសារពួកជ្រុលនិយមថៃ។ សំណើរបស់ប្រមុខរាជរដ្ឋាភិបាលបានកើតឡើង នៅខណៈដែលតុលាការយុត្តិធម៌អន្តរជាតិក្រុងឡាអេ គ្រោងបកស្រាយឡើងវិញនូវសាលក្រមឆ្នាំ ១៩៦២ ស្តីពីបញ្ហាព្រះវិហារ នាពាក់កណ្តាលខែមេសាខាងមុខ។
ចុះផ្សាយនៅថ្ងៃ៖
ស្តាប់ - ០២:៣៣
កងកម្លាំងប្រដាប់អាវុធគ្រប់ប្រភេទនៅតាមព្រំដែនកម្ពុជា-ថៃ ត្រូវបានលោកនាយករដ្ឋមន្ត្រី ហ៊ុន សែន ស្នើឲ្យរួមសហការគ្នាតាមដាននិងក្ដាប់សភាពការណ៍នានា ដើម្បីចាត់វិធានការឲ្យមានប្រសិទ្ធភាពក្នុងករណីដែលពួកជ្រុលនិយមថៃបង្កបញ្ហាណាមួយ មកលើបូរណភាពទឹកដី និងអធិបតេយ្យភាពកម្ពុជា។
មានប្រសាសន៍នៅចំពោះមុខកម្លាំងប្រដាប់អាវុធ នាឱកាសបិទសន្និបាតបូកសរុបការងាររបស់ក្រសួងមហាផ្ទៃកាលពីល្ងាចថ្ងៃសុក្រម្សិលមិញ លោកនាយករដ្ឋមន្ត្រី ហ៊ុន សែន បានបញ្ជាក់ថា សភាពការណ៍ព្រំដែនកម្ពុជា-ថៃមានការវិវត្ដន៍ល្អប្រសើរកាលពីឆ្នាំ ២០១២ កន្លងទៅ ដោយសារមានកិច្ចសហការល្អរវាងរាជរដ្ឋាភិបាលទាំងពីរ។
ប៉ុន្ដែនៅពេលខាងមុខនេះ តុលាការអន្ដរជាតិក្រុងឡាអេ នឹងបកស្រាយសាលក្រមពាក់ព័ន្ធបញ្ហាប្រាសាទព្រះវិហារ តាមបណ្ដឹងរបស់ភាគីកម្ពុជា។ បញ្ហានេះបានបណ្តាលឲ្យមាននិន្នាការរំជើបរំជួលនៅក្នុងប្រទេសថៃ ក្នុងនោះក៏មានការប៉ុនប៉ងប្រើវិធានការយោធា ដើម្បីដោះស្រាយបញ្ហាជាមួយកម្ពុជាទៀតផង។
លោកនាយករដ្ឋមន្ត្រីបញ្ជាក់ថា រាជរដ្ឋាភិបាលភ្នំពេញ និងបាងកកគ្មានបញ្ហាជាមួយគ្នាទេ ហើយកម្ពុជាក៏គ្មាននិន្នាការជ្រុលនិយមដែរ។ ប៉ុន្តែ នៅក្នុងប្រទេសថៃមានបញ្ហាច្រើនណាស់ដែលត្រូវប្រុងប្រយ័ត្ន ពីព្រោះពួកជ្រុលនិយមថៃអាចបង្កការញុះញង់ធ្វើឲ្យមានបញ្ហារវាងប្រទេសទាំងពីរ។ ប្រមុខរាជរដ្ឋាភិបាលបានប្រកាសជំហររបស់កម្ពុជាថា បើទោះបីជាការបកស្រាយសាលក្រមចេញមកបែបណាក៏ដោយ ក៏កម្ពុជាត្រូវស្ងាត់ស្ងៀម និងរកវិធីដោះស្រាយជាជាងការបង្កើតបញ្ហា។
គួរបញ្ជាក់ថា តុលាការយុត្តិធម៌អន្តរជាតិទីក្រុងឡាអេ (ICJ) គ្រោងនឹងលើកយកពាក្យបណ្តឹងរបស់កម្ពុជាស្តីពីការសុំបកស្រាយសាលក្រម ឆ្នាំ១៩៦២ ស្តីពីព្រំដែនប្រាសាទព្រះវិហារ មកបើកសវនាការ នៅពាក់កណ្តាលខែមេសាខាងមុខនេះ។ ពាក្យបណ្តឹងសុំបកស្រាយសាលក្រមឡើងវិញនេះត្រូវបានរាជរដ្ឋាភិបាលក្រុងភ្នំពេញដាក់ទៅតុលាការទីក្រុងឡាអេកាលពីខែមេសា ឆ្នាំ២០១១ ក្រោយពីថៃបានបង្កសង្គ្រាមជាច្រើនលើក រហូតដល់ធ្វើឲ្យខូចខាតប្រាសាទព្រះវិហារ ដែលជាសម្បត្តិបេតិកភ័ណ្ឌពិភពលោក ជាច្រើនកន្លែង។
ចំណាត់ការរបស់តុលាការក្រុងឡាអេចំពោះករណីព្រះវិហារ ដែលគេដឹងថាភាគីថៃចាញ់ប្រៀបកម្ពុជារួចស្រេចទៅហើយនោះ បានធ្វើឲ្យពួកជ្រុលនិយមថៃមិនសប្បាយចិត្ត ហើយបានដាក់សម្ពាធយ៉ាងខ្លាំងទៅលើរាជរដ្ឋាភិបាលរបស់ខ្លួនមិនឲ្យទទួលយកការសម្រេចរបស់តុលាការនេះ។ ពួកជ្រុលនិយមថៃក៏បានប្រកាសត្រៀមបង្កបញ្ហាជាច្រើនជាមួយកម្ពុជា ដែលជំរុញឲ្យលោកនាយករដ្ឋមន្ត្រីសុំឲ្យត្រៀមវិធានការទប់ទល់វិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ