នាយករដ្ឋមន្ត្រីកម្ពុជានឹងចូលរួមកិច្ចប្រជុំស្តីពីការអភិវឌ្ឍន៍តំបន់ត្រីកោណកម្ពុជាឡាវនិងវៀតណាម
ក្រសួងការបរទេស បានប្រកាសនៅថ្ងៃសុក្រនេះថា លោកនាយករដ្ឋមន្ត្រី ហ៊ុន សែននឹងដឹកនាំគណៈប្រតិភូជាន់ខ្ពស់កម្ពុជា ទៅចូលរួមកិច្ចប្រជុំកំពូល កម្ពុជា ឡាវ និងវៀតណាម CLV លើកទី៧ ស្តីពី ការអភិវឌ្ឍន៍តំបន់ត្រីកោណ ដែលនឹងប្រព្រឹត្តទៅពីថ្ងៃទី១៩ដល់ថ្ងៃទី២០ ខែតុលាឆ្នាំ២០១២នៅទីក្រុងហូជីមិញប្រទេសវៀតណាម។ តាមសេចក្តីប្រកាសនៅចុងបញ្ចប់នៃកិច្ចប្រជុំកំពូលនោះ នាយករដ្ឋមន្ត្រីកម្ពុជាឡាវនិងវៀតណាម នឹងចុះហត្ថលេខាលើសេចក្តីថ្លែងការណ៍រួមជុំវិញគម្រោងអភិវឌ្ឍន៍តំបន់ត្រីកោណ។ គម្រោងអភិវឌ្ឍន៍តំបន់ត្រីកោណ ត្រូវបាននាយករដ្ឋមន្ត្រីទាំងបីប្រទេស បង្កើតឡើងកាលពីឆ្នាំ១៩៩៩ ដោយដាក់ខេត្តជាប់ព្រំដែនទាំងបីប្រទេស ដើម្បីអភិវឌ្ឍន៍ក្រោមជំនួយពីប្រទេសជប៉ុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
តាមការអញ្ជើញរបស់លោក ង្វៀន តាន់យុង ( Nguyen Tan Dung ) នាយករដ្ឋមន្ត្រី វៀតណាម លោកនាយករដ្ឋមន្ត្រី ហ៊ុន សែន នឹងដឹកនាំគណៈប្រតិភូជាន់ខ្ពស់ ទៅចូលរួមកិច្ចប្រជុំកំពូល កម្ពុជា ឡាវ និងវៀតណាម ( CLV ) លើកទី៧ ស្តីពី ការអភិវឌ្ឍន៍តំបន់ត្រីកោណ ដែលនឹងប្រព្រឹត្តទៅពីថ្ងៃទី១៩ ដល់ថ្ងៃទី២០ ខែតុលា ឆ្នាំ២០១២ នៅទីក្រុងហូជីមិញ សាធារណរដ្ឋសង្គមនិយម វៀតណាម។ នេះបើតាមសេចក្តីជូនព័ត៌មាន របស់ក្រសួងការបរទេសនៅថ្ងៃទី១២តុលានេះ។
ក្រសួងការបរទេស បានប្រកាសថា គណៈប្រតិភូ ដែលនឹងអមដំណើរលោកនាយករដ្ឋមន្ត្រី ហ៊ុន សែន ទៅកាន់តុប្រជុំ នៅទីក្រុងហូជីមិញ រួមមាន៖
លោកទេសរដ្ឋមន្ត្រី ចម ប្រសិទ្ធ រដ្ឋមន្ត្រីក្រសួងពាណិជ្ជកម្មនិងសមាជិកនៃរដ្ឋាភិបាលកម្ពុជាដទៃទៀត។ សេចក្តីជូនព័ត៌មានដដែល បានគូសបញ្ជាក់ថា នៅចុងបញ្ចប់នៃកិច្ចប្រជុំកំពូលនេះ នាយករដ្ឋមន្ត្រីកម្ពុជា ឡាវ និងវៀតណាម នឹងចុះហត្ថលេខាលើសេចក្តីថ្លែងការណ៍រួម។ សូមរម្លឹកថា តំបន់ត្រីកោណកម្ពុជា-ឡាវ-វៀតណាម ត្រូវបានបង្កើតឡើង តាមគំនិតផ្តួចផ្តើមរបស់នាយករដ្ឋមន្ត្រី នៃប្រទេសកម្ពុជា-ឡាវ-វៀតណាម កាលពីឆ្នាំ១៩៩៩ នៅក្នុងកិច្ចប្រជុំកំពូល នាទីក្រុងវៀងច័ន្ទប្រទេសឡាវ។
តំបន់អភិវឌ្ឍន៍ត្រីកោណ កម្ពុជា វៀតណាម និងឡាវ គ្របដណ្តប់លើខេត្ត នៅជាប់ព្រំដែនប្រទេសទាំងបី ដោយខាងកម្ពុជា មានខេត្តស្ទឹងត្រែង រតនៈគិរី ខេត្តមណ្ឌលគិរី និងខេត្តក្រចេះ។
ផែនការមេ ស្តីពី ការអភិវឌ្ឍន៍សេដ្ឋកិច្ចសង្គម សម្រាប់តំបន់ត្រីកោណអភិវឌ្ឍន៍កម្ពុជា-ឡាវ-វៀតណាម ត្រូវបានអនុម័តដោយនាយករដ្ឋមន្ត្រីនៃប្រទេសទាំងបី កាលពីឆ្នាំ២០០៤។ គម្រោងនោះ ត្រូវបានប្រទេសជប៉ុន ផ្តល់ជំនួយក្នុងទឹកប្រាក់ចំនួន ២០ លានដុល្លារ ដើម្បីសាងសង់ផ្លូវ ស្ពាន និងសាលារៀន ជាដើម។ ក្នុងគម្រោងនោះ ក៏មានសាងសង់មជ្ឈមណ្ឌលពាណិជ្ជកម្ម នៅខេត្តជាប់ព្រំដែនប្រទេសទាំងបីផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ