លោកពូទីនបំពេញទស្សនកិច្ចនៅប្រទេសចិន
លោកប្រធានាធិបតីរុស្ស៊ី Vladimir Poutine ត្រូវអញ្ជើញទៅបំពេញទស្សនកិច្ចនៅប្រទេសចិនចំនួន៣ថ្ងៃ ចាប់ពីថ្ងៃអង្គារទី៥មិថុនាទៅ។ គោលដៅនៃដំណើរទស្សនកិច្ចរបស់លោកពូទីននៅប្រទេសចិនគឺដើម្បីពង្រឹងទំនាក់ទំនងរវាងប្រទេសរុស្ស៊ីនិងប្រទេសចិនជាសម្ព័ន្ធមិត្តដ៏សំខាន់របស់រុស្ស៊ី ក៏ព្រមទាំងពង្រីកទំនាក់ទំនងនៅលើវិស័យនយោបាយការទូតនិងសេដ្ឋកិច្ចផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៥
លោកប្រធានាធិបតីរុស្ស៊ី ពូទីននិងលោកប្រធានាធិបតីចិន ហ៊ូជីនតាវនឹងត្រូវជួបសន្ទនាគ្នាដើម្បីស្វែងរកគោលជំហររួមមួយស្តីពី វិបត្តិស៊ីរីនិងស្តីពីកម្មវិធីនុយក្លេអ៊ែរអ៊ីរ៉ង់។
ប្រទេសរុស្ស៊ីនិងចិន មានសិទ្ធិវេតូនៅក្នុងក្រុមប្រឹក្សាសន្តិសុខអសប-សិទ្ធិវេតូដែលប្រទេសទាំងពីរនេះប្រើប្រាស់ ដើម្បីបិទខ្ទប់សេចក្តីសម្រេចចិត្តរបស់អសប ក្នុងការដាក់ទណ្ឌកម្មទៅលើការវាយបង្រ្កាបគាបត្បៀតនៅក្នុងប្រទេសស៊ីរី។
ក្រៅពីបញ្ហានយោបាយអន្តរជាតិ ទស្សនកិច្ចរបស់ប្រធានាធិបតីរុស្ស៉ីនៅប្រទេសចិនក៏ជាឱកាសល្អមួយដែរសំរាប់រុស្ស៊ី ក្នុងការបង្កើនខ្លាំងថែមទៀត សហប្រតិបត្តិការរបស់ខ្លួនជាមួយប្រទេសចិន នៅលើវិស័យសេដ្ឋកិច្ចដែលមានលក្ខណៈសំខាន់រួចទៅហើយ ជាអាទិ៍នៅលើវិស័យថាមពល។គួររំលឹកថា ទីក្រុងម៉ូស្គូនិងទីក្រុងប៉េកាំង តាំងពីជាច្រើនឆ្នាំមកហើយ បានចរចាគ្នាអំពីកិច្ចសន្យាមួយ ដែលរុស្ស៊ីគ្រោងលក់ឧស្ម័នរបស់ខ្លួនទៅឲ្យប្រទេសចិនប្រមាណជា៧ម៉ឺនលានម៉ែត្រគុបក្នុងរយៈពេល៣០ឆ្នាំខាងមុខ។ ប៉ុន្តែចាប់តាំងពីឆ្នាំ ២០០៩ និងការចុះកិច្ចព្រមព្រៀងក្របខណ្ឌមួយមក កិច្ចចរចារវាងភាគីចិននិងរុស្ស៊ី មិនបានជឿនលឿនទេ ដោយហេតុកិច្ចចរចានេះ ត្រូវជាប់គាំងនៅត្រង់បញ្ហាតម្លៃឧស្ម័ន។
ដោយឡែក យោងតាមសារព័ត៌មានរុស្ស៊ី ប្រទេសរុស្ស៊ីនិងចិន ក៏មានបំណងចង់រួបរួមគ្នាដែរ ក្នុងការពង្រីកសាងសង់យន្តហោះសំរាប់ដឹកផ្លូវឆ្ងាយ ដើម្បីប្រជែងជាមួយក្រុមហ៊ុនយក្ខ លោកខាងលិច Airbus និង Boeing។ កាលពីខែមេសាកន្លងផុតទៅ ម៉ូស្គូ និងប៉េកាំង បានជូនដំណឹងអំពីការបង្កើតមូលនិធិ វិនិយោគរួមគ្នាមួយ ចាប់ពីពេលនេះ ទៅដល់ចុងខែមិថុនា ដែល មានទឹកប្រាក់ ៤០០០លានដុល្លារ សំរាប់ការប្រើប្រាស់ជាអាទិ៍នៅក្នុងការពង្រីកនៅលើវិស័យកសិកម្មនិងការដឹកជញ្ជូន។
នាពេលថ្មីៗកន្លងទៅនេះ លោកពូទីន បានថ្លែងបញ្ជាក់ថា “ការរីកលូតលាស់នៅក្នុងវិស័យសេដ្ឋកិច្ចនៃប្រទេសចិន ពុំមែនជាការគំរាមអ្វីមួយឡើយ។ ផ្ទុយទៅវិញទីក្រុងម៉ូស្គូ ចាប់អារម្មណ៍ខ្លាំងទៅលើសក្តានុពលនៃសេដ្ឋកិច្ចប្រទេសចិន សម្រាប់ការពង្រីកវិស័យនេះនៅក្នុងតំបន់ Sibérie និងតំបន់ចុងបូព៌ា,ដែលជាតំបន់សម្បូណ៌ទៅដោយធនធានថាមពល ប៉ុន្តែប្រឈមមុខនឹងបញ្ហាធនធានមនុស្ស។
សូមបញ្ជាក់ថា មុននឹងអញ្ជើញទៅកាន់ប្រទេសចិន លោកប្រមុខរដ្ឋរុស្ស៊ីនៅថ្ងៃចន្ទ៤មិថុនា ត្រូវអញ្ជើញទៅបំពេញទស្សនកិច្ចនៅ Ouzbékistan។ ម្ស៉ាងទៀត កិច្ចសន្ទនារវាងរុស្ស៊ីនិងចិននៅថ្ងៃ៥និង៦មិថុនាខាងមុខនឹងត្រូវបន្តដោយជំនួបកំពូលនៅទីក្រុងប៉េកាំងនៃបណ្តាប្រមុខរដ្ឋ នៃអង្គការសហប្រតិបត្តិការសៀងហៃហៅកាត់ថាOSCដែលមានប្រទេស រុស្ស៊ី ចិន Ouzbékistan kazakhstan Tadjikistan និង Kirghizstan ជាសមាជិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ