SIPRI ៖ ចំណាយយោធាថយ តែការគំរាមកំហែងនុយក្លេអ៊ែរនៅតែខ្លាំង
នៅឆ្នាំ២០១១ ការគំរាមកំហែងនុយក្លេអ៊ែរនៅមានសន្ទុះសន្ធោសន្ធៅខ្លាំងជានិច្ច បើទោះបីពិភពលោកបានកាត់បន្ថយ និងបញ្ឈប់ការចំណាយលើផ្នែកអាវុធយុទ្ធភ័ណ្ឌយ៉ាងណាក៏ដោយ។ នេះបើយោងតាមរបាយការណ៍ប្រចាំឆ្នាំ២០១២ របស់វិទ្យាស្ថានស្រាវជ្រាវអន្តរជាតិដើម្បីសន្តិភាព (SIPRI) ចេញផ្សាយនៅថ្ងៃចន្ទទី ៤មិថុនា ២០១២។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
ចំណាយប្រចាំឆ្នាំលើវិស័យយោធា បានស្គាល់កំណើនទាបបំផុត នៅឆ្នាំ២០១១ ពោលគឺ ប្រមាណតែ០,៣%ប៉ុណ្ណោះ ឬគិតជាទឹកប្រាក់ ១៧៣៨ពាន់លានដុល្លារអាមេរិក និងតំណាងឱ្យ២,៥%នៃផលិតផលដុលសរុបពិភពលោក។ កំណើនទាបខ្លាំងនេះ មួយភាគធំគឺបណ្តាលមកពីវិបត្តិសេដ្ឋកិច្ច។
ប៉ុន្តែសម្រាប់វិទ្យាស្ថានស្រាវជ្រាវអន្តរជាតិដើម្បីសន្តិភាព គេមិនទាន់អាចកំណត់បាននៅឡើយទេ ថាការចំណាយលើវិស័យយោធាស្ថិតនៅនឹងត្រឹមកំរិតនេះបានយូរអង្វែងនោះ។ ម្យ៉ាងវិញទៀត ទោះបីពិភពលោកឈប់ចាយវាយក្នុងវិស័យយោធា -ជាលើកទីមួយគិតចាប់ពីឆ្នាំ ១៩៩៨មក-ក៏ដោយ ក៏ការធ្វើទំនើបកម្មនុយក្លេអ៊ែរនៅតែជាអាវុធសក្តិសិទ្ធិប្រើសំរាប់ទាញអំណាចនៅលើឆាកអន្តរជាតិ។ តាំងពីឆ្នាំ២០១១មក ដោយមានការរួមចំណែកមួយផ្នែកធំពីរុស្ស៊ី និងអាមេរិក ចំនួនក្បាលនុយក្លេអ៊ែរបានថយចុះ ពីជាង២០៥០០ មក១៩០០០នាដើមឆ្នាំ២០១២ នៅក្នុងបណ្តាប្រទេសចំនួន៨ ៖ អាមេរិក រុស្ស៊ី អង់គ្លេស បារាំង ចិន ឥណ្ឌា និងអ៊ីស្រាអែល។ តែគ្មានប្រទេសណាមួយបោះបង់ចោលអាវុធនុយក្លេអ៊ែរ ដូចសេចក្តីប្រកាសចង់បានពិភពលោកគ្មានអាវុធនុយក្លេអ៊ែរឡើយ។ ចំណែកកូរ៉េខាងជើងវិញមានស្តុកទុកសារធាតុភ្លុយតូនីញូមយោធា ប្រមាណ៣០គីឡូក្រាម ដែលអាចផលិតអាវុធនុយក្លេអ៊ែរបានដល់ទៅ៨គ្រាប់។ នេះបើតាមរបាយការណ៍របស់វិទ្យាស្ថានស្រាវជ្រាវអន្តរជាតិដើម្បីសន្តិភាពដដែល។
ទាក់ទងនឹងកម្មវិធីនុយក្លេអ៊ែរអ៊ីរ៉ង់និងស៊ីរីដ៏ចម្រូងចម្រាសវិញ អ្នកស្រាវជ្រាវរបស់ Sipri បានបង្ហាញមន្ទិលសង្ស័យទៅលើប្រសិទ្ធិភាពនៃតួនាទីរបស់អង្គការសហប្រជាជាតិក្នុងការគ្រងគ្រង និងការត្រួតពិនិត្យយោធា។
Sipri វិទ្យាស្ថានអន្តរជាតិ ឯករាជ្យ និងមានទីស្នាក់ការនៅទីក្រុងស្តុកខុមនេះ ក៏បានលើកឡើង នៅក្នុងរបាយការណ៍ប្រចាំឆ្នាំរបស់ខ្លួនប្រភេទថ្មីៗនៃជម្លោះ ៖ សង្គ្រាមស៊ីវិលនៅក្នុងប្រទេសកំពុងអភិវឌ្ឍន៍ ជាទម្រង់ធំនៃវិបត្តិ ជម្លោះរវាងរដ្ឋមួយជាមួយរដ្ឋមួយទៀតស្ទើរតែងមាន។ បដិវត្តអារ៉ាប អំពើហិង្សា នៅក្នុងបណ្តាប្រទេសអារ៉ាប ក្នុងមួយឆ្នាំកន្លងទៅនេះ មិនមែនជាករណីឯកាទេ។ សម្រាប់វិទ្យាស្ថាននេះជាទម្រង់ថ្មីនៃជម្លោះ ដែលអន្តរជាតិយោធាអន្តរជាតិពិបាកនឹងប្រព្រឹត្តទៅបានណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ