លោកSarkozyបញ្ចប់ទស្សនកិច្ចនៅឥណ្ឌា នៅទីក្រុងBombayដែលបានរងគ្រោះដោយអំពើភេរវកម្មនៅខែវិច្ឆិកាឆ្នាំ២០០៨
លោកប្រធានាធិបតីបារាំង Nicolas Sarkozy បញ្ចប់ទស្សនកិច្ច៤ថ្ងៃនៅប្រទេសឥណ្ឌា នៅថ្ងៃអង្គារ៧ធ្នូនេះដែលត្រូវបានកត់សំគាល់ដោយដំណាក់ការថ្មី មួយគឺការស្ថាបនាម៉ាស៊ីនប្រតិកម្មនុយក្លេអ៊ែរEPR ដោយអញ្ជើញទៅកាន់ទីក្រុងBombay ដើម្បីសំដែងគារវកិច្ចចំពោះវិញ្ញាណក្ខន្ធអ្នករងគ្រោះដោយអំពើ ភេរវកម្មនៅខែវិច្ឆិកាឆ្នាំ២០០៨។
ចុះផ្សាយនៅថ្ងៃ៖
សេចក្តីរាយការណ៍របស់ វីនស្តុន រតនា
លោកប្រមុខរដ្ឋបារាំង Nicolas Sarkozy ត្រូវសំដែងគារវកិច្ចចំពោះវិញ្ញាណក្ខន្ធអ្នករងគ្រោះ១៦៦នាក់រួមមានជនជាតិបារាំង២នាក់ផង ដោយអំពើភេរវកម្មរបស់កងcommandoអ៊ីស្លាមនិយមជ្រុល នៅខែវិច្ឆិកាឆ្នាំ២០០៨ នៅរដ្ឋធានីសេដ្ឋកិច្ចឥណ្ឌា Bombay។អំពើភេរវកម្មបង្ហូរឈាមដាបនេះត្រូវគេចាត់ទុកថាជា” ថ្ងៃ១១កញ្ញារបស់ឥណ្ឌា“។
ម្សិលមិញ បន្ទាប់ពីសន្និសីទសារព័ត៌មានរួម ជាមួយលោកនាយករដ្ឋមន្ត្រីឥណ្ឌា Manmohan Singh អ្នកនាំពាក្យនៃវិមានប្រធានាធិបតីបារាំងបានប្រកាសអំពីកិច្ចសន្យាចុះឬហៀបនឹងចុះជាមួយឥណ្ឌាគិតជាទឹកប្រាក់ចំនួនប្រមាណជា១ម៉ឺន៥ពាន់លានអឺរ៉ូ។
ចំណែកឯលោកនាយករដ្ឋមន្ត្រីឥណ្ឌា Singhវិញ បានអះអាងថាគាត់ចង់ “ បង្កើនជាទ្វេ “ ការផ្តោះប្តូរពាណិជ្ជកម្មជាមួយប្រទេសបារាំង ក្នុងរយៈពេលចាប់ពីឆ្នាំ២០០៨ទៅទល់ឆ្នាំ២០១២ ប្រកបដោយទឹកប្រាក់១ម៉ឺន២ពាន់លានអឺរ៉ូក្នុងមួយឆ្នាំ។រីឯគោលដៅរបស់បារាំងវិញគឺសម្រេចឱ្យបាន១ម៉ឺនលានអឺរ៉ូក្នុងមួយឆ្នាំ។ កិច្ចសន្យាចុះម្សិលមិញគ្រាន់តែជា “កិច្ចព្រមព្រៀង-ក្របខ័ណ្ឌទូទៅ” សំរាប់ការស្ថាបនាម៉ាស៊ីនប្រតិកម្មនុយក្លេអ៊ែរEPRពីរ(ប្រមាណជា៧ពាន់លានអឺរ៉ូ)។ ការស្ថាបនាវានឹងចាប់ផ្តើមនៅឆ្នាំ២០១១ហើយការផលិតអគ្គិសនីនឹងចាប់ផ្តើមនៅឆ្នាំ២០១៨។
ក្នុងវិស័យកិច្ចការពារប្រទេសជាតិ”កិច្ចសន្យាបីបានចម្រើនទៅមុខជាដុំកំភួន” សំរាប់ទឹកប្រាក់៥ពាន់លានអឺរ៉ូទាក់ទងនឹងការធ្វើឱ្យទាន់សម័យទំនើបយន្តហោះMirageធុន២០០០ចំនួន៥១គ្រឿងរបស់កងទ័ពឥណ្ឌានិងអភិវឌ្ឍន៍រួមគ្នានៃកាំជ្រួចមីស្ស៊ីល។
លើវិស័យការទូតវិញ ប្រទេសបារាំងនិងឥណ្ឌាក៏បានប្រាថ្នាផងដែរ “ប្រព្រឹត្តដោយព្រមព្រៀងគ្នា ដើម្បីធ្វើឱ្យក្រុមប្រទេសG-20មានប្រសិទ្ធិភាពជាងមុន“។ លោកនាយករដ្ឋមន្ត្រីឥណ្ឌាSinghបានថ្លែង ”គាំទ្រ“ គោលដៅនៃវេនប្រទេសបារាំងធ្វើជាប្រធានG-20 ជាអាទិ៍ ទាក់ទងនឹងការធ្វើឱ្យរៀបរយថ្លៃរូបធាតុដើម។ ចំណែកឯលោកNicolas Sarkozyបានរំលឹកជាថ្មីសេចក្តីប្រាថ្នារបស់ខ្លួនចង់ឃើញប្រទេសឥណ្ឌាក្លាយជាសមាជិកអចិន្ត្រៃយ៍នៃក្រុមប្រឹក្សាសន្តិសុខអ.ស.ប.៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ