លោកអូបាម៉ាគាំទ្រឥណ្ឌាក្នុងការទាមទារអាសនៈសមាជិកអចិន្ត្រៃយ៍នៃ អ.ស.ប
លោកប្រធានាធិបតីអាមេរិកបារ៉ាក់អូបាម៉ាដែលបានធ្វើការគាំទ្រនៅ ថ្ងៃច័ន្ទទី៨វិច្ឆិកាឆ្នាំ២០១០ ការទាមទារកៅអីសមាជិកអចិន្ត្រៃយ៍នៃអង្គការសហប្រជាជាតិដោយប្រទេស ឥណ្ឌា បានថ្លែងបញ្ជាក់ថា ប្រទេសដែលកាន់លទ្ធិប្រជាធិបតេយ្យធំជាងគេក្នុងលោកត្រូវតែមានតួនាទី ”ស្របច្បាប់”របស់ខ្លួននៅក្នុងចំណោមប្រទេសមហាអំណាចពិភពលោក។
ចុះផ្សាយនៅថ្ងៃ៖ កែប្រែថ្ងៃទី៖
បទវិភាគរបស់ សៀក សារិន
ក្រុមប្រឹក្សាសន្តិសុខគឺជាស្ថាប័នមួយដ៏សំខាន់បំផុតនៅក្នុងអង្គការសហប្រជាជាតិ។ រាល់សេចក្តីសម្រេចចិត្តសំខាន់ៗនៃអ ស ប ដែលសម្រេចបានគឺចេញពីស្ថាប័នមួយនេះ។ ក្រុមប្រឹក្សាសន្តិសុខនៃអ ស ប មានសមាជិកអចិន្ត្រៃយ៍ទាំងអស់ប្រាំប្រទេសដែលមានសិទ្ធិveto បានសេចក្តីថា បើប្រសិនជាមានការប្រឆាំងជំទាស់ពីសំណាក់ប្រទេសណាមួយក្នុងចំណោមប្រទេសទាំងប្រាំដែលជាសមាជិកអចិន្ត្រៃយ៍នៃក្រុមប្រឹក្សាសន្តិសុខ នោះសេចក្តីសម្រេចចិត្តរបស់អ ស ប ពុំអាចចេញរួចឡើយ។ ប្រទេសទាំងប្រាំដែលជាសមាជិកអចិន្ត្រៃយ៍នៃក្រុមប្រឹក្សាសន្តិសុខមាន៖ សហរដ្ឋអាមេរិក ប្រទេសចិន ប្រទេសបារាំង ប្រទេសរុស្ស៊ី និងប្រទេសអង់គ្លេស។ ហើយនៅមានសមាជិក១០ប្រទេសទៀតជាសមាជិក”មិនអចិន្ត្រៃយ៍”នៅក្នុងក្រុមប្រឹក្សាសន្តិសុខដែលបានត្រូវគេជ្រើសតាំងឡើងក្រោយពីមានការបោះឆ្នោត។
ដោយយល់ពីសារៈសំខាន់នៃសមាជិកអចិន្ត្រៃយ៍នៃក្រុមប្រឹក្សាសន្តិសុខបានជាលោកប្រធានាធិបតីអាមេរិកបារ៉ាក់អូបាម៉ាដែលបានគាំទ្រការទាមទារកៅអីសមាជិកអចិន្ត្រៃយ៍នៃអង្គការសហប្រជាជាតិដោយប្រទេសឥណ្ឌា បានថ្លែងបញ្ជាក់ថា ប្រទេសដែលកាន់លទ្ធិប្រជាធិបតេយ្យធំជាងគេក្នុងលោកត្រូវតែមានតួនាទី”ស្របច្បាប់”របស់ខ្លួននៅក្នុងចំណោមប្រទេសមហាអំណាចពិភពលោក។
គួរកត់សម្គាល់ថា ការធ្វើកំណែទម្រង់ទៅលើក្រុមប្រឹក្សាសន្តិសុខនៃអ ស ប ត្រូវការពេលវេលាដល់ទៅរាប់ឆ្នាំ។ ប្រទេសឥណ្ឌាដែលទើបនឹងទទួលបាននូវអាសនៈជាសមាជិក”មិនអចិន្ត្រៃយ៍”នៃ ក្រុមប្រឹក្សាសន្តិសុខនៃអ ស បកាលពីខែតុលាកន្លងទៅ នៅរង់ចាំការទទួលស្គាល់ធំធេងជាងនេះទៀតពីសំណាក់សហគមន៍អន្តរជាតិ។
ក្រៅពីនេះ លោកអូបាម៉ាបានបន្ទោសប្រទេសឥណ្ឌាថា ទីក្រុងញីវដែលីនៅរក្សាភាពស្ងៀមស្ងាត់ ពុំចេញស្តីអ្វីទាំងអស់ពាក់ព័ន្ធនឹងបញ្ហារំលោភសិទ្ធិមនុស្សនៅប្រទេសភូមា។ សម្រាប់លោកប្រធានាធិបតីអាមេរិកបារ៉ាក់អូបាម៉ា៖”បញ្ចេញសំឡេងនិយាយជំនួសអ្នកដែលគ្មានលទ្ធភាពនិយាយចេញស្ដី ពុំមែនជាការជ្រៀតជ្រែកចូលបញ្ហាផ្ទៃក្នុងរបស់ប្រទេសជិតខាងឡើយ ហើយវាក៏ពុំមែនផងដែរជាការរំលោភលើសិទ្ធិនៃប្រទេសអធិបតេយ្យ”។
លោកអូបាម៉ាបន្តថ្លែងបញ្ជាក់ថា “នៅខណៈដែលចលនាប្រជាធិបតេយ្យសន្តិភាពបានត្រូវគេជាន់ឈ្លីលុបចោលដូចនៅប្រទេសភូមា អ្នកដែលស្រឡាញ់និងការពារលទ្ធិប្រជាធិបតេយ្យក្នុងលោក ពុំត្រូវនៅស្ងៀមស្ងាត់ឈរឱបដៃនៅព្រងើយកន្តើយបានឡើយ”។
ទីក្រុងវ៉ាស៊ីនតោនដែលធ្វើការគាំទ្រឥណ្ឌាបែបនេះ ពិតជាមានបំណងចង់យកទម្ងន់សេដ្ឋកិច្ចនិងទម្ងន់ក្នុងវិស័យការទូតឥណ្ឌាមកទប់ទល់នឹងឥទ្ធិពលរបស់ប្រទេសចិនដែលមានកាន់តែខ្លាំងឡើងៗ។
ការថ្លែងសរសើរប្រទេសឥណ្ឌាដោយសហរដ្ឋអាមេរិកនៅពេលនេះ ធ្លាក់ចំពេលដែលកំណើនសេដ្ឋកិច្ចឥណ្ឌាមានសន្ទុះយ៉ាងខ្លាំងក្លា ក្នុងខណៈដែលប្រទេសលោកខាងលិចនិងពិភពលោកទាំងមូលកំពុងជួបនឹងវិបត្តិសេដ្ឋកិច្ចនិងវិបត្តិហិរញ្ញវត្ថុដ៏ធ្ងន់ធ្ងរ។
គួរកត់សម្គាល់ថា នាឱកាសទស្សនកិច្ចរបស់លោកអូបាម៉ានៅប្រទេសឥណ្ឌានេះ សហរដ្ឋអាមេរិកសម្រេចបានជាមួយឥណ្ឌានូវកិច្ចព្រមព្រៀងពាណិជ្ជកម្មដែលមានចំនួនទឹកប្រាក់ប្រមាណ១០ពាន់លានដុល្លារដែលអាចជួយឲ្យអាមេរិកបង្កើតបានការងារប្រមាណ៥០ ០០០កន្លែងឲ្យប្រជាជនរបស់ខ្លួន។
លោកអូបាម៉ាពុំភ្លេចគូសបញ្ជាក់ឡើយថា “ដៃគូពាណិជ្ជកម្មនិងដៃគូយុទ្ធសាស្ត្រអាមេរិក-ឥណ្ឌាគឺជាដៃគូដ៏សែនសំខាន់មួយនៅសតវត្សរ៍ទី២១នេះ។ ហើយប្រទេសទាំងពីរដែលជាមហាប្រទេសកាន់លទ្ធិប្រជាធិបតេយ្យដ៏ធំជាងគេក្នុងលោកត្រូវតែជួយជំរុញនិងរក្សាឲ្យមាននៅលើពិភពលោកទាំងមូលនូវ សុខសន្តិភាព ស្ថិរភាព និងវឌ្ឍនភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ