អនាគតនាយករដ្ឋមន្ត្រីប៉ាគីស្ថានNawaz Sharif ចង់ស្តារទំនាក់ទំនងជាមួយអាមេរិកនិងឥណ្ឌា
នៅប៉ាគីស្ថាន ពីរថ្ងៃបន្ទាប់ពីបានជាប់ឆ្នោតជានាយករដ្ឋមន្ត្រីមក លោកNawaz Sharif បានសន្យាថា នឹងពង្រឹងទំនាក់ទំនងជាមួយសហរដ្ឋអាមេរិកនិងឥណ្ឌាបន្ថែមទៀត។ ពាក្យសន្យានេះបង្ហាញច្បាស់ថា អនាគតនាយករដ្ឋមន្ត្រីប៉ាគីស្ថានបន្ទន់ឥរិយាបថបន្តិចទៅវិញជាមួយអាមេរិក ព្រោះថា ក្នុងការឃោសនាបោះឆ្នោតកន្លងមក លោក Sharif ធ្លាប់បានបង្ហាញនូវគោលគំនិតប្រឆាំងអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៤
ទើបតែបានជាប់ឆ្នោតជានាយករដ្ឋមន្ត្រីប៉ាគីស្ថានមិនទាន់បានស្រួលបួលផង លោក Nawaz Sharif បានប្រាប់អ្នកសារព័ត៌មានបរទេស នៅថ្ងៃចន្ទម្សិលមិញនេះថា លោកសន្យានឹងពង្រឹងទំនាក់ទំនងប៉ាគីស្ថានជាមួយសហរដ្ឋអាមេរិកនិងឥណ្ឌា អោយបានកាន់តែរឹងមាំថែមទៀត។ លោកបានប្រាប់ថា ប៉ាគីស្ថានផ្តល់ការគាំទ្រខ្លាំងក្លាដល់អាមេរិកនៅពេលដែលកងទ័ពអាមេរិកនឹងត្រូវដកចេញអស់ពីប្រទេសអាហ្វហ្កានិស្ថាន នៅឆ្នាំ២០១៤ ខាងមុខនេះ។
នៅពេលដែលជិតបានកាន់តំណែងជានាយករដ្ឋមន្ត្រីប៉ាគីស្ថាន លោកNawaz Sharif ហាក់បន្ទន់ឥរិយាបថបន្តិចទៅវិញជាមួយអាមេរិកដែលជាប្រទេសផ្តល់មូលនិធិដល់ប៉ាគីស្ថាន។
គួររំលឹកថា ក្នុងការឃោសនាបោះឆ្នោតកន្លងមក លោក Sharif ធ្លាប់បានបង្ហាញនូវគោលគំនិតប្រឆាំងជាមួយអាមេរិក។ លោកជំទាស់នឹងទង្វើរបស់អាមេរិកដែលបានប្រើយន្តហោះ Drone ដែលជាយន្តហោះគ្មានមនុស្សបើកនោះ ដើម្បីប្រតិបត្តិការកំចាត់ក្រុមភេរវករអាល់កៃដា និងពួកតាលីបង់ នៅភាគពាយព្យប្រទេសប៉ាគីស្ថាន។
ប្រតិបត្តិការយន្តហោះអាមេរិកកំចាត់ក្រុមឧទ្ទាម មិនត្រឹមតែបានធ្វើអោយជនស៊ីវិលជាច្រើនរូបបាត់បង់ជីវិតប៉ុណ្ណោះទេ វាជាការរំលោភបូរណភាពដែនដីប៉ាគីស្ថាន ដែលធ្វើអោយប្រជាជនប៉ាគីស្ថានខឹងសម្បារ។ លោក Nawaz Sharif នឹងលើកយកបញ្ហានេះទៅពិភាក្សាជាមួយអាមេរិកអោយបានច្បាស់លាស់។
ដោយឡែក សហរដ្ឋអាមេរិកតែងតែសង្ស័យថា ប៉ាគីស្ថានប្រើផ្លូវដើរពីរទន្ទឹមគ្នា គឺក្រៅពីគាំទ្រជាផ្លូវការដល់អាមេរិកក្នុងការកំចាត់ក្រុមភេរវករ ប៉ាគីស្ថានក៏បានគាំទ្រដល់ពួកឧទ្ទាមនៅអាហ្វហ្កានិស្ថានផងដែរ ដើម្បីពង្រឹងឥទ្ធិពលខ្លួននៅទីនោះ។ ទោះយ៉ាងនេះក្តី ប្រសិនបើអាមេរិកចង់សំរេចអោយមានការចរចាសន្តិភាពជាមួយពួកឧទ្ទាមនោះ អាមេរិកនឹងត្រូវការប្រទេសប៉ាគីស្ថានចៀសមិនរួច។
ងាកមកនិយាយពីទំនាក់ទំនងជាមួយឥណ្ឌាដែលធ្លាប់ជាអតីតសត្រូវប៉ាគីស្ថានវិញម្តង អនាគតនាយករដ្ឋមន្ត្រីប៉ាគីស្ថានបានអញ្ជើញនាយករដ្ឋមន្ត្រីឥណ្ឌា លោក Manmohan Singh អោយចូលរួមក្នុងពិធីឡើងកាន់តំណែងរបស់លោក នាពេលឆាប់ៗខាងមុខនេះ។ លោក Manmohan Singh បានឆ្លើយតបទៅវិញថា លោកចង់បិទទំព័របញ្ចប់ជម្លោះរវាងឥណ្ឌានិងប៉ាគីស្ថាន ដែលមានជាង៦០ឆ្នាំមកហើយនោះ។
គួររំលឹកឡើងវិញថា លោក Nawaz Sharif ដែលមានវ័យ៦៣ឆ្នាំហើយនោះ ធ្លាប់ធ្វើជានាយករដ្ឋមន្ត្រីប៉ាគីស្ថានពីរលើករួចមកហើយ គឺពីឆ្នាំ១៩៩០ ដល់ឆ្នាំ១៩៩៣ និងពីឆ្នាំ ១៩៩៧ ដល់ឆ្នាំ ១៩៩៩។ ជោគជ័យបោះឆ្នោតកាលពីថ្ងៃសៅរ៍កន្លងមកនេះ ត្រូវបានបណ្តាបស្ចិមប្រទេសអបអរសាទរនិងលើកឡើងថា ជាជំហានឆ្ពោះទៅកាន់លទ្ធិប្រជាធិបតេយ្យ។
យោងតាមលទ្ធផលបោះឆ្នោតជាបឋម គណបក្សសម្ព័ន្ធអ៊ីស្លាមរបស់លោក Nawaz Sharif បានទទួលអាសនៈសភា ១២៥អាសនៈ ក្នុងចំណោមអាសនៈសរុប២៧២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ