ក្រុមអវកាសយានិកអន្តរជាតិ រុស្ស៊ី អាមេរិក ជប៉ុនផ្តើមការងារខ្លួន
ផ្តើមនេះក្រោយពីព្រឹកមិញវេលាម៉ោង ៨ និង៥២នាទី ម៉ោងម៉ូស្គូ យានអវកាសរុស្ស៊ី ធុនSoyuz ដែលបានផ្ទុកក្រុមអវកាសយានិកចេញពីផែនដីទៅ កាលពី២ថ្ងៃមុន បានទៅតភ្ជាប់យ៉ាងជោគជ័យ ជាមួយនឹងស្ថានីយអវកាសអន្តរជាតិ SSI ហើយគេក៏បានឆ្លងចូលទៅទីនោះ ដើម្បីបន្តបេសកកម្ម ក្នុងមន្ទីរពិសោធន៍អន្តរជាតិនោះដែលហោះជាប្រចាំ នៅអវកាស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៣
ក្រុមអវកាសយានិកអន្តរជាតិលើកនេះផ្សំឡើងពីជាតិរុស្ស៊ី លោក Yuri Malenchenko តំណាងឲ្យទីភ្នាក់ងារអវកាសរុស្ស៊ី RosCosmos ជាតិអាមេរិក លោកស្រី Sunita Williams តំណាងឲ្យទីភ្នាក់ងារអវកាសអាមេរិក NASA និង ជាតិជប៉ុន លោក Akihiko Hoshide តំណាងឲ្យទីភ្នាក់ងារអវកាសជប៉ុន JAXA។ បេសកកម្មរបស់ក្រុមអវកាសយានិកនេះ ជាលើកទី ៣៣ បើគិតតាំងពី ស្ថានីយអវកាសអន្តរជាតិ SSI មានចាប់ផ្តើមបង្កើតឡើង តាំងពី១៤ឆ្នាំមុនមក ហើយបានចប់សព្វគ្រប់ គឺកាលពី ២ឆ្នាំមុន ដោយមានការចូលរួមនៃ ១៦ប្រទេស ក្នុងនោះមាន រុស្ស៊ី ស.រ.អា. កាណាដា ជប៉ុន និង បណ្តាប្រទេសនៃទីភ្នាក់ងារអវកាសអឺរ៉ុប ។ ស្ថានីយនេះ បច្ចុប្បន្ន ហោះតាមតារាវិថីជុំវិញផែនដី នៅកំពស់ ៣៨៥គម។
ក្នុងរយៈពេល ១២៤ថ្ងៃ ដែលនឹងពន្យារទៅបេសកកម្មរបស់គេ ក្នុងស្ថានីយ SSI អវកាសយានិក ៣ប្រទេសខាងលើត្រូវបំពេញការពិសោធន៍វិទ្យាសាស្ត្រ ចំនួនជិត ៤០ ឧទាហរណ៍ អ្នកអវកាស អាមេរិកាំងធ្វើការពិសោធ២លើ ផ្នែកវេជ្ជសាស្ត្រ មួយឈ្មោះ Sprint ដើម្បីបំភ្លឺ តើការហាត់ប្រាណណាដែលល្អសម្រាប់សរីរាង្គកាយពេលស្ថិត នៅក្នុងស្ថានីយអវកាស និងមួយទៀត ឈ្មោះ ICV ឆ្ពោះទៅស្រាវជ្រាវ ប្រព័ន្ធសរសៃបេះដូងរបស់អ្នកអវកាស។
ចំណែកអ្នកអវកាសជប៉ុន គឺធ្វើការពិសោធន៍លើត្រីទឹកសាបម្យ៉ាង ដើម្បីសង្កេតមើល តើ ជាលិកាឆ្អឹងវារងការប្រែប្រួលយ៉ាងណា ពេលស្ថិតនៅ យ៉ាងយូរក្នុងអវកាស គឺក្នុងស្ថានភាពដែលគ្មានទំនាញរបស់ផែនដី។ តាមសំដីលោក Akihiko Hoshide ការពិសោធន៍នេះមានន័យសំខាន់សម្រាប់ការចិញ្ចឹមត្រី នៅលើផែនដី។
អ្នកអវកាសរុស្ស៊ីវិញបានយកតាមខ្លួនសម្រាប់ធ្វើការពិសោធន៍ នៅអវកាស គឺ ពីងពាងលោត និង មើមអ៊ាស៊ីម។
ក្នុង រយៈពេល ៤ខែ ដែលគេនឹងស្នាក់នៅ ធ្វើការក្នុង ស្ថានីយSSI ក្រុមអវកាសយានិកអន្តរជាតិក៏ត្រូវទទួលនាវាផ្ទុកស្បៀងចំនួន ៣ ពីផែនដី ទៅ ពីក្នុងនោះ ២ គឺរបស់រុស្ស៊ី ១ របស់អាមេរិក និងនាវា ១ទៀតរបស់ជប៉ុន គឺផ្ទុកទៅដោយ មីក្រូសាតេលីតចំនួន៥ សម្រាប់បង្ហោះចេញពីស្ថានីយSSI ដោយប្រើឧបករណ៍ជា ដៃបង្ហោះ របស់ជប៉ុនផ្ទាល់។
ជាការកត់សម្គាល់ ឥឡូវស្នាក់នៅធ្វើការ ក្នុងស្ថានីយ SSI ក៏មានអវកាសយានិក មួយក្រុមផ្សេង ក្នុងនោះមាន ជាតិរុស្ស៊ី ២នាក់ និងជាតិអាមេរិកម្នាក់ ដែលត្រូវបញ្ចប់បេសកកម្មខ្លួន ក្នុង២ខែកន្លះទៀត ហើយនឹងត្រឡប់មកផែនដីវិញ គឺនៅចុងខែកញ្ញាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ