ការបង្ហោះចេញនៃក្រុមអវកាសយានិករុស្ស៊ី-អាមេរិក៣នាក់
ព្រឹកមិញវេលាម៉ោង៧និង១នាទី ម៉ោងម៉ូស្គូ មានបង្ហោះចេញពីផែនដីទៅដោយជោគជ័យគឺ យានអវកាសរុស្ស៊ីធុន Soyouz TMA-04 M ផ្ទុកទៅដោយអ្នកអវកាសរុស្ស៊ីពីរនាក់និងអវកាសយានិកអាមេរិកម្នាក់។ ព្រឹកថ្ងៃព្រហស្បតិ៍ខានស្អែកគេត្រូវឆ្លងទៅធ្វើការក្នុង “ស្ថានីយអវកាសអន្តរជាតិ “ហៅកាត់ថា ISS ដែលតាំងពីឆ្នាំ ២០០០មកហោះនៅកម្ពស់ប្រមាណ៣៤០គ.ម.ព័ទ្ធជុំវិញផែនដីក្នុងលក្ខណៈជា”ទីពិសោធអន្តរជាតិនៅអវកាស”។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤០
អ្នកអវកាសរុស្ស៊ី២នាក់នោះ គឺម្នាក់ឈ្មោះ Guennadi Padalka អាយុ៥៣ឆ្នាំ ធ្លាប់បានធ្វើការនៅអវកាស៣លើកហើយ សរុបទៅចំនួន ៥៨៥ថ្ងៃឯណោះ លើកនេះគាត់បំពេញមុខងារជាប្រធានក្រុម។ ម្នាក់ទៀតឈ្មោះ Serguei Revine អាយុ៤៦ឆ្នាំហោះចេញទៅអវកាសជាលើកទី១។ ចំណែកអ្នកអវកាសអាមេរិកាំង ឈ្មោះ Joseph Acaba អាយុ៤៤ឆ្នាំហោះលើកនេះជាលើកទី២ ដោយលើកមុនក្នុងឆ្នាំ២០០៩ គាត់ហោះតាមយានអវកាសអាមេរិកាំងធុន Shuttle។
គួរនិយាយថាតាំងពីកណ្តាលឆ្នាំទៅមិញមក យានអវកាសអាមេរិកាំងធុន Shuttle បានបញ្ឈប់ទាំងស្រុងតែម្តងការហោះហើររបស់ខ្លួននៅអវកាស ម៉្លោះហើយបានជាតាំងពីពេលនោះមក រាល់បេសកកម្មដឹកអ្នកអវកាសទៅកាន់ស្ថានីយ ISS ជា “ទីពិសោធអន្តរជាតិនៅអវកាស” គឺបំពេញតែដោយយានអវកាសរុស្ស៊ីធុន Soyouz ។ មកទល់ឥឡូវវាបំពេញបេសកកម្មនេះ បានយ៉ាងកក់ក្តៅ ជាង១.៧០០លើកទៅហើយ។ ចំពោះសេវាដឹកអ្នកអវកាសខ្លួនម្នាក់ៗទៅកាន់ស្ថានីយ ISS នោះ រដ្ឋបរទេសមានស.រ.អា ជាដើម បង់មកឲ្យរុស្ស៊ី គឺមិនតិចជាង ៥០លានដុល្លារអាមេរិកឡើយ។
ក្រុមអវកាសយានិករុស្ស៊ី-អាមេរិកលើកនេះ ត្រូវស្នាក់នៅធ្វើការក្នុងទីពិសោធអន្តរជាតិ ISS គឺ រយៈពេល១២៦ថ្ងៃ។ ក្នុងអំឡុងពេលនេះ គេត្រូវបំពេញការពិសោធន៍វិទ្យាសាស្ត្រចំនួន ២០០ ពីក្នុងនោះ ៤០ ជាចំណែករបស់រុស្ស៊ី។ ក្នុងអំឡុងពេលនេះ គេត្រូវចេញទៅបំពេញការងារជាចាំបាច់តែ១លើកប៉ុណ្ណោះ នៅឯភាគខាងក្រៅរបស់ស្ថានីយគឺក្នុងលំហអវកាសផ្ទាល់តែម្តង។ មិនតែប៉ុណ្ណោះ គេត្រូវរើឥវ៉ាន់ ទៅផ្ទុកក្នុងយានដឹកជញ្ជូនរបស់ទីភ្នាក់ងារអវកាសអឺរ៉ុប ហើយបញ្ជូនវាមកផែនដីព្រមទាំងត្រូវទទួលយានអវកាសដឹកជញ្ជូនរបស់ជប៉ុន ធុន HTV និងទទួលយានអវកាសដឹកជញ្ជូន២គ្រឿងធុន Dragon របស់ក្រុមហ៊ុនOrbital Sciences។
មុននឹងហោះចេញទៅគេបានព្រលយឲ្យដឹងថា គេក៏នឹងឆ្លៀតមើលការប្រកួតបាល់ទាត់រើសជើងឯកទ្វីបអឺរ៉ុប ឆ្នាំ២០១២ដែលនឹងប្រព្រឹត្តទៅនៅប៉ូឡូញ និងអ៊ុយក្រែនពីថ្ងៃ ៨មិថុនាដល់ថ្ងៃទី១កក្កដា និងការប្រកួតល្បែងកីឡាអូឡាំពិករដូវក្តៅ នៅទីក្រុងLondres ពីថ្ងៃ ទី២៧កក្កដា ដល់ថ្ងៃ១២សីហាខាងមុខ។
ជាការកត់សម្គាល់ មកទល់ឥឡូវបន្តស្ថិតនៅធ្វើការក្នុងស្ថានីយ ISS គឺក្រុមអវកាសយានិកមួយផ្សេងមានគ្នា៣នាក់ដែរ ផ្សំឡើងពីជាតិរុស្ស៊ី ជាតិអាមេរិក ជាតិហូឡង់ ដែលបានហោះចេញពីផែនដីទៅតាំងពីថ្ងៃ ២១ធ្នូឆ្នាំមុនម៉្លេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ