តាអំពុង ជាប់ទោសក្នុងបទជេរប្រមាថរបបរាជានិយមស្លាប់ក្នុងពន្ធនាគារ
តាអំពុង ឬ តា SMS ដែលតុលាការក្រុងបាងកក បានកាត់ទោសឱ្យជាប់ពន្ធនាគារ២០ឆ្នាំ ពីបទបានជេរប្រមាថរបបរាជានិយម កាលពីឆ្នាំទៅ និងដែលបន្ទាប់មកបានក្លាយជាតំណាងនៃការប្រយុទ្ធប្រឆាំងដើម្បីសេរីភាពក្នុងការបញ្ចេញមតិ បានទទួលមរណភាពនៅក្នុងពន្ធនាគារ។ នេះបើតាមការគូសបញ្ជាក់របស់មេធាវី នៅថ្ងៃអង្គារទី ៨ឧសភា២០១២នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
សាកសពតាអំពុង បានបញ្ជូនទៅដល់មន្ទីរពេទ្យរបស់ពន្ធនាគារហើយ ប៉ុន្តែគ្រូពេទ្យ មិនបានដឹង និងមិនបានបញ្ជាក់អំពីមូលហេតុនៃការស្លាប់របស់តាអំពុងទេ។ ក្រុមគ្រូពេទ្យគ្រាន់តែដឹងថា ក្នុងសំណុំឯកសារពេទ្យ តាអំពុងធ្លាប់មានជំងឺមហារីកមាត់ ហើយថ្មីៗនេះតាមានបញ្ហាក្រពះ។
មានអាយុ៦២ឆ្នាំ ឈ្មោះពេញ អំពុង តង់ណុបប៉ាគុល (Ampon Tangnoppakul) ឬហៅ តា SMS បានត្រូវតុលាការថៃកាត់ទោសឱ្យជាប់ពន្ធនាគារ ២០ឆ្នាំ ពីបទបានផ្ញើសារមានលក្ខណៈប្រមាថរបបរាជានិយមតាមទូរស័ព្ទ ទៅកាន់នាយករដ្ឋមន្ត្រី លោក អាភិស៊ីត វេចាជីវ៉ា ចំនួនបួន។ ការចោទប្រកាន់ដែលតាអំពុងបានច្រានចោលទាំងស្រុង ដោយពន្យល់ថា គាត់មិនចេះទាំងប្រើទូរស័ព្ទផង ប៉ុន្តែលោកតាមិនបានធ្វើឧទ្ធរណ៍ទេ សុខចិត្តរង់ចាំការសន្តោសប្រណីពីព្រះមហាក្សត្រ។ ក្រុមគ្រួសារ ធ្លាប់បានតវ៉ា ឱ្យមានដោះលែងតាអំពុង ព្រោះបញ្ហាសុខភាព ប៉ុន្តែមិនបានសម្រេច។
ករណីតាអំពុងនេះ បានបង្កបង្កើតឱ្យមានចលនាតវ៉ា និងបាតុកម្មកណ្តាលក្រុង ជាលើកទីមួយ កាលពីថ្ងៃទី៩ខែធ្នូឆ្នាំ២០១១ ប្រឆាំងនឹងច្បាប់ការពាររាជវង្ស និងរាជានិយម។ ច្បាប់ដែលមានលក្ខណៈតឹងតែងបំផុតជាងគេនៅលើពិភពលោក។ អង្គការការពារសិទ្ធិមនុស្សអន្តរជាតិ ក៏បានធ្លាប់បរិហារ ថា ការកាត់ទោសតាអំពុង បង្ហាញពីភាពអយុត្តិធម៌នៃច្បាប់ការពាររាជវង្ស។
សូមបញ្ជាក់ថា តាំងពីឆ្នាំ២០០៦ ពោលគឺក្រោយរដ្ឋប្រហារយោធាទម្លាក់លោក ថាក់ស៊ីន ស៊ីណាវ៉ាត់ មកការកាត់ក្តី និងអង្កេត ជុំវិញបទប្រមាថព្រះចេស្តាព្រះមហាក្សត្រ និងគ្រួសាររាជវង្ស កើនឡើងយ៉ាងសន្ធឹកសន្ធាប់។ លោកស្រី យីងឡាក់ ស៊ីណាវ៉ាត់ ដែលទើបជាប់ឆ្នោតជានាយករដ្ឋមន្ត្រីថ្មី កាលពីឆ្នាំទៅ បានសម្តែងចេតនាចង់ឱ្យមានការអនុវត្តន៍ច្បាប់ការពារព្រះមហាក្សត្រនេះឱ្យបានសមស្រប ប៉ុន្តែរដ្ឋាភិបាលលោកស្រីមិនបានកែប្រែអ្វីទេ ព្រោះស្ថានភាពនយោបាយមិនអំណោយផល។ នេះបើតាមអ្នកវិភាគ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ