ប្រមុខអាវក្រហមថៃម្នាក់ជាប់ទោស៧ឆ្នាំពីបទរិះគន់របបរាជានិយម
៧ឆ្នាំកន្លះក្នុងពន្ធនាគារ ! នេះជាទោសដែលតុលាការថៃសម្រេចផ្តន្ទា លោក ស៊ុរ៉ាឆៃ ដនវ៉ាតាណានុសន តំណាងសកម្មជននៃចលនាអាវក្រហម ពីបទបានជេរប្រមាថរបបរាជានិយម។ ប៉ុន្តែសាលក្រមថ្ងៃនេះ ត្រូវបានគេបរិហារថាមានលក្ខណៈនយោបាយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
អាយុ៧១ឆ្នាំ អតីតសមាជិកគណបក្សកុម្មុយនិស្ត -អតីតមេដឹកនាំចលនា Red Siam សាខាជ្រុលនិយមមួយរបស់ចលនាអាវក្រហមថៃ លោក ស៊ុរ៉ាឆៃ ដនវ៉ាតាណានុសន ឬ ស៊ុរ៉ាឆៃ សែ ដន ត្រូវបានប៉ូលិសចាប់ខ្លួនមួយឆ្នាំមកហើយពីបទបានធ្វើសុន្ទរកថា រិះគន់របបរាជានិយម ក្នុងអំឡុងឆ្នាំ២០០៨-២០១០។
ថ្ងៃនេះតុលាការឧក្រិដ្ឋកម្មថៃ ចេញសាលក្រម ដាក់ទោសឱ្យជាប់ពន្ធនាគារចំនួន១៥ឆ្នាំ ប៉ុន្តែត្រូវសម្រាលមកត្រឹម ៧ឆ្នាំកន្លះវិញ ព្រោះលោក ស៊ុរ៉ាឆៃ បានសារភាពទោសមួយចំនួន។ សំរាប់តុលាការ តំណាងចលនាអាវក្រហមរូបនេះ បានប្រព្រឹត្តកំហុសជេរប្រមាថ និងរិះគន់របបរាជានិយមដល់ទៅប្រាំដង។ តែពីរករណីត្រូវលើកលែង តាមរយៈការទទួលស្គាល់កំហុស។ ដូច្នេះនៅសល់បីករណី ដែលតុលាការបានសម្រេចផ្តន្ទាទោស ដាច់ដោយឡែកពីគ្នា មួយករណីៗ ពីរឆ្នាំកន្លះ។
ប៉ុន្តែមេធាវីរបស់លោក ស៊ុរ៉ាឆៃ នឹងមិននៅស្ងៀមត្រឹមនេះទេ លោកនឹងធ្វើបណ្តឹងឧទ្ធរណ៍ ព្រោះទាំងរូបលោកផ្ទាល់ ក៏ដូចជាបញ្ញាជនជាច្រើន អង្គការនានា រួមទាំងគណៈកម្មការស្វែងការពិតដើម្បីផ្សះផ្សាជាតិ សុទ្ធតែយល់ថា សំណុំរឿងក្តីនេះ មានលាយលំ និងច្របូកច្របល់ទៅដោយបញ្ហានយោបាយ និងសម្គាល់ឃើញថា ជនជាប់ចោទភាគច្រើន ជាសកម្មជនអាវក្រហម ឬជាមនុស្សស្និទ្ធនឹងលោកថាក់ស៊ីន អតីតនាយករដ្ឋមន្ត្រីថៃ។
សូមបញ្ជាក់ថា នៅប្រទេសថៃច្បាប់ការពាររាជវង្ស និងរបបរាជានិយម ជាច្បាប់ដែលតឹងតែងជាគេបំផុតនៅលើពិភពលោក។ ព្រះមហាក្សត្រ ភូមិបុល ជន្មាយុ៨៤វស្សា ត្រូវបានបណ្តាជនថៃគោរពស្ទើរស្មើនឹងព្រះ។ រាជវង្សគ្មានតួនាទីនយោបាយមែន ប៉ុន្តែតុលាការតែងដាក់ទោស យ៉ាងធ្ងន់ធ្ងរបំផុតដល់រាល់ជនណាដែលហ៊ានប្រមាថព្រះចេស្តាស្តេច ឬរិះគន់របបរាជានិយម។ ការផ្តន្ទាទោសមានស្ទើរតែរាល់ខែ ៖ កាលពីខែធ្នូ ២ឆ្នាំកន្លះសំរាប់ជនជាតិអាមេរិក ដើមកំណើតថៃ -ស្ត្រីសមាជិកអាវក្រហមម្នាក់បានទទួលទោសជាប់ពន្ធនាគារ១៥ឆ្នាំពីបទនិយាយប៉ះពាល់ដល់កិត្តិនាមព្រះមហាក្សត្រ។ ខែវិច្ឆិកា ២០១១- តាអំពុង បានទទួលទោស២០ឆ្នាំ ពីបទបានប្រើសារតាមទូរស័ព្ទទៅនាយករដ្ឋមន្ត្រីប្រមាថព្រះរាជិនី ដែលកាលណោះបានបង្កបង្កើតឱ្យមានចលនាបាតុកម្ម លើកដំបូងប្រឆាំងនឹងច្បាប់ការពារព្រះមហាក្សត្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ