ថាក់ស៊ីន៖រដ្ឋាភិបាលមិនបានកែប្រែរដ្ឋធម្មនុញ្ញថ្មីដើម្បីឲ្យខ្ញុំអាចត្រលប់ចូលស្រុកវិញទេ
លោកថាក់ស៊ីន ស៊ីណាវ៉ាត អតីតនាយករដ្ឋមន្រ្តីថៃបានបដិសេធថា លោកមិនមែនជាអ្នកជំរុញរដ្ឋាភិបាលថៃបច្ចុប្បន្នឲ្យសើរើ សរសេររដ្ឋធម្មនុញ្ញថ្មីទេ។ នៅក្នុងបទសម្ភាសន៍ផ្តាច់មុខជាមួយកាសែតបាងកកប៉ុស្តិ៍ ចេញផ្សាយនៅថ្ងៃចន្ទនេះ លោកថាក់ស៊ីនបាននិយាយថា លោកអាចត្រលប់ចូលស្រុកវិញដោយមិនចាំបាច់មានការសរសេររដ្ឋធម្មនុញ្ញថ្មី។ អតីតនាយករដ្ឋមន្រ្តីថៃដែលកំពុងនិរទេសខ្លួននៅបរទេស បាននិយាយបដិសេធយ៉ាងដូច្នេះ បន្ទាប់ពីគណបក្ស និងក្រុមប្រឆាំងថៃ បានបរិហារថា គឺលោកថាក់ស៊ីនជាអ្នកជំរុញប្អូនស្រីឲ្យធ្វើកំណែទម្រង់រដ្ឋធម្មនុញ្ញ ដើម្បីអនុញ្ញាតឲ្យលោកត្រលប់ចូលស្រុកវិញ ដោយសុវត្ថិភាព និងមិនត្រូវទទួលទោសពៃរ៍អ្វីទាំងអស់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
“សម្រាប់ខ្ញុំ ការត្រលប់ចូលស្រុកវិញ មិនមែនជារឿងសំខាន់ និងគួរឲ្យខ្វល់ខ្វាយទេ។ ពេលនេះខ្ញុំរស់នៅបានយ៉ាងសុខសប្បាយ នៅបរទេស”។ នេះជាសំដីអះអាងរបស់លោកថាក់ស៊ីន តាំងពីទីក្រុងឌូបៃ ជាទីដែលលោកកំពុងរស់នៅភៀសខ្លួន ដើម្បីគេចចេញពីទោសជាប់គុកពីរឆ្នាំ ដែលតុលាការថៃបានដាក់ទៅលើលោក ក្នុងបទចោទប្រកាន់បន្លំលួចពន្ធរដ្ឋក្នុងពេលលោកកាន់អំណាច។
លោកថាក់ស៊ីននៅបាននិយាយបន្ថែមថា លោកមានមធ្យោបាយគ្រប់គ្រាន់ដើម្បីអាចត្រលប់ចូលស្រុកវិញ ដោយមិនចាំបាច់សុំរដ្ឋាភិបាលឲ្យសរសេររដ្ឋធម្មនុញ្ញថ្មី។
គួររំលឹកថា កាលពីខែកុម្ភៈមុននេះ លោកស្រី នាយករដ្ឋមន្រ្តីយីងឡាក់ ស៊ីណាវ៉ាតដែលជាប្អូនស្រីលោកថាក់ស៊ីន បានធ្វើឲ្យសភាយល់ព្រមបង្កើតក្រុមការងារមួយដើម្បីធ្វើកំណែទម្រង់សាជាថ្មីលើរដ្ឋធម្មនុញ្ញ។ រដ្ឋធម្មនុញ្ញដែលបានកែប្រែម្តងហើយ កាលពីឆ្នាំ ២០០៧ ពោល គឺនៅមួយឆ្នាំក្រោយរដ្ឋប្រហារយោធាទម្លាក់លោកថាក់ស៊ីន។
ក្នុងសង្គមថៃ ចាប់តាំងពីរដ្ឋប្រហារឆ្នាំ ២០០៦ ប្រជាជនថៃបានបែកបាក់ជាពីរក្រុម។ ដោយមួយក្រុមជាប្រជាជនស្រែចម្ការ គាំទ្រលោកថាក់ស៊ីន។ ចំណែកមួយក្រុមទៀតជាក្រុមបញ្ញវន្តនៅទីក្រុង មន្រ្តីយោធាជាន់ខ្ពស់ដែលរណបព្រះរាជវង្សថៃ។ ពួកគេ ស្អប់ និងចាត់ទុកលោកថាក់ស៊ីនជាគ្រោះថ្នាក់សម្រាប់របបរាជានិយម។ សម្រាប់ពួកក្រុមទីពីរ កំណែទម្រង់រដ្ឋធម្មនុញ្ញថ្មីនឹងប៉ះពាល់ដល់ស្ថាប័នរាជានិយម ព្រោះវាអាចនឹងធ្វើឲ្យគេផ្លាស់ប្តូរច្បាប់ដែលចែងពីបទឧក្រិដ្ឋជេរប្រមាថព្រះមហាក្សត្រ។
លោកថាក់ស៊ីនវិញបាននិយាយការពារ និងបញ្ជាក់ជំហររបស់គណបក្សកាន់អំណាច ថា បើទោះមានការសរសេររដ្ឋធម្មនុញ្ញថ្មី មាត្រាទី ១១២ដែលចែងពីបទឧក្រិដ្ឋជេរប្រមាថព្រះមហាក្សត្រនឹងត្រូវគេរក្សាទុកដដែល មិនប៉ះពាល់ទេ។ ប៉ុន្តែ យ៉ាងណាក៏ដោយ លោកថាក់ស៊ីនបញ្ជាក់ថា រដ្ឋាភិបាលសរសេររដ្ឋធម្មនុញ្ញថ្មី មិនមែនដើម្បីប្រយោជន៍ផ្ទាល់ខ្លួនគាត់ដើម្បីបានចូលស្រុកទេ ប៉ុន្តែ ដើម្បីប្រយោជន៍ប្រជាជនថៃ ព្រោះថា គោលគំនិតសំខាន់នៃការធ្វើកំណែទម្រង់នេះគឺធ្វើយ៉ាងណាចងភ្ជាប់អំណាចរបស់ថ្នាក់ដឹកនាំជាមួយប្រជាជន និងការបង្កើតប្រព័ន្ធត្រួតពិនិត្យល្អិតល្អន់មួយដើម្បីតាមដានការងារគ្រប់ស្ថាប័នដែលស្ថិតនៅក្រោមអំណាចរបស់រដ្ឋធម្មនុញ្ញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ