តុលាការថៃចេញដីកាចាប់ខ្លួនលោកថាក់ស៊ីន ពីបទភេរវនិយម
តុលាការឧក្រិដ្ឋថៃបានចេញដីកានៅថ្ងៃអង្គារទី ២៥ ឧសភា នេះ តាមចាប់ខ្លួនលោកថាក់ស៊ីន ពីបទបានប្រព្រឹត្តអំពើភេរវកម្ម។ ជាភេរវជន ព្រោះអតីតនាយករដ្ឋមន្ត្រី ដែលកំពុងនិរទេសខ្លួននៅបរទេសរូបនេះ ជាក្បាលម៉ាស៊ីននៃអំពើបាតុកម្ម និងការបះបោរហិង្សារបស់ពួកអាវក្រហម។ មានសញ្ជាតិ ម៉ុងតេនេហ្ក្រូ លោកថាក់ស៊ីន ជាជនជាប់ទោសពី បទប្រព្រឹត្តអំពើពុករលួយ និងលួចបន្លំ ដែលអាជ្ញាធរថៃ តាមរកចាប់ខ្លួន ស្រាប់ទៅហើយ តាំងពីឆ្នាំ ២០០៨មក។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អៀង សុខម៉ិញ
យោងតាមការស៊ើបអង្កេតពិសេស លោក ថាក់ស៊ីន ជាអ្នកឧបត្តម្ភផ្នែកហិរញ្ញវត្ថុ និងជាម៉ាស៊ីនដឹកនាំបាតុកម្មរបស់ពួកអាវក្រហម រហូតធ្វើឲ្យប្រទេសថៃធ្លាក់ចូលក្នុងវិបត្តិហិង្សាដ៏ជ្រៅ ជាប់ក្នុងទំព័រប្រវត្តិសាស្ត្រថ្មីរបស់ថៃ។ លោក ថាក់ស៊ីន គឺជាអ្នកទទួលខុសត្រូវចំពោះជីវិតមនុស្សជាច្រើននាក់ដែលបានស្លាប់ក្នុងពេលធ្វើបាតុកម្មរយៈពេលជិត៦អាទិត្យ នៅទីក្រុងបាងកក។ ហេតុដូច្នេះហើយបានជាតុលាការសម្រេចចេញដីកាចាប់ខ្លួន លោក ថាក់ស៊ីន ពីបទភេរវនិយម នៅថ្ងៃអង្គារទី ២៥ ឧសភា ២០១០ នេះ។
ជាអតីតនាយករដ្ឋមន្ត្រី លោក ថាក់ស៊ីន បានគេចខ្លួន ពីប្រទេសតាំងពីខែ តុលា ឆ្នាំ ២០០៨ ថ្ងៃដែលតុលាការបានសម្រេចកាត់ទោសដាក់ពន្ធនាគារលោកចំនួនពីរឆ្នាំ ពីបទប្រព្រឹត្តពុករលួយ។ ហើយគឺតាំងពីនោះហើយដែលអាជ្ញាធរថៃ តាមចាប់ខ្លួន តែមិនបានសម្រេច។ លោក ថាក់ស៊ីន បានធ្វើដំណើរ និងស្នាក់នៅបរទេស ពីក្រុងមួយទៅក្រុងមួយ ៖ ឌូបៃ ឡុងដ៏ ភ្នំពេញ ... ប៉ុន្តែគ្មានប្រទេសណាមួយ សុខចិត្តបញ្ជូនខ្លួនលោក ថាក់ស៊ីន មកឲ្យអាជ្ញាធរក្រុងបាងកកតាមសំណើសោះ។ មិនតែប៉ុណ្ណោះ លោក ថាក់ស៊ីន មានសញ្ជាតិ ម៉ុងតេនេហ្ក្រូផង នីការ៉ាហ្ក័រផង អ៊ូហ្ក្សង់ដាផង។
នៅដើមឆ្នាំ ២០១០នេះ តុលាការថៃបានកាត់ទោសលោកជាថ្មី ដោយតម្រូវឲ្យលោកថាក់ស៊ីន បង់ពិន័យជាប្រាក់ចំនួន ១ពាន់លានអឺរ៉ូ ពីបទបានធ្វើឲ្យប្រលូកប្រឡាក់ប្រយោជន៍សាធារណៈ កាត់តំណែងជានាយករដ្ឋមន្ត្រីផង និងជាប្រធានក្រុមហ៊ុនឯកជនផង។
ប៉ុន្តែជាថ្មីម្តងទៀត រដ្ឋាភិបាលថៃហាក់គ្មានអំណាច នឹងអាចធ្វើអ្វីលោក ថាក់ស៊ីន បានឡើយ។ ហើយនៅសប្តាហ៍មុន ក្នុងពេលដែលក្រុងបាងកកកំពុងពុះកញ្ជ្រោលនឹងអំពើហិង្សា និងការបង្ក្រាបរបស់កងកម្លាំងរដ្ឋាភិបាល គេបែរជាឃើញលោក ថាក់ស៊ីន ដើរកំសាន្តក្នុងហាងប្រណិតៗក្នុងទីក្រុងប៉ារីសយ៉ាងសង្ហាទៅវិញ ?! សម្រាប់រដ្ឋាភិបាលលោក អាភិស៊ីត នេះគឺជាការញុះញង់ដ៏សុទ្ធសាធមួយ ដែលមិនអាចទ្រាំបានឡើយ។ ហេតុដូច្នេះហើយបានជាកើតគំនិត ភ្ជាប់លោកថាក់ស៊ីន នឹងទោស “ភេរវនិយម”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ