អាមេរិកសម្រុកពង្រឹងមិត្តភាពជាមួយប្រទេស ដែលជាសត្រូវរបស់ចិន
នៅថ្ងៃចន្ទទី៣០មេសា លោកYoshihiko Noda នាយករដ្ឋមន្រ្តីជប៉ុនបានចូលជួបពិភាក្សាជាមួយលោកប្រធានាធិបតី អូបាម៉ា នៅសេតវិមានក្នុងទីក្រុងវ៉ាស៊ីនតោន។ ក្នុងដំណើរទស្សនកិច្ចរយៈពេលបីថ្ងៃនៅអាមេរិក ថ្នាក់ដឹកនាំជប៉ុនគ្រោងនឹងនិយាយជាមួយលោកអូបាម៉ាពីវិធានការថ្មី ដើម្បីជំរុញសហប្រតិបត្តិការយោធា និងសេដ្ឋកិច្ចរវាងប្រទេសទាំងពីរ។
ចុះផ្សាយនៅថ្ងៃ៖
ស្តាប់ - ០៦:៥៩
ដកបន្លាចេញពីទ្រូង អាមេរិក និងជប៉ុនបានជម្រះមន្ទិលសង្ស័យរវាងគ្នា បន្ទាប់ពី អាមេរិក និងជប៉ុន ព្រមព្រៀងគ្នាក្នុងការដកទ័ពអាមេរិកចំនួន ៩ពាន់នាក់ពីកោះអូគីណាវ៉ា។ វត្តមានទ័ពអាមេរិក នៅកោះអូគីណាវ៉ា ដែលប្រជាជនជប៉ុនតែងតែរិះគន់កន្លងមកបានបង្កជារឿងចម្រូងចម្រាស់ដែលធ្វើឲ្យទំនាក់ទំនងអាមេរិក និងជប៉ុនល្អក់កករ ជាយូរឆ្នាំមកហើយ។
ដំណើរទស្សនកិច្ចបីថ្ងៃ របស់លោកនាយករដ្ឋមន្រ្តីជប៉ុន នៅ អាមេរិក គឺដូចជាបើកទំព័រថ្មី ក្នុងទំនាក់ទំនងជិតស្និទ្ធរវាងប្រទេសទាំងពីរ។ អំណើះតទៅ ប្រទេសទាំងពីរផ្តោតនិយាយតែទៅលើកម្មវិធីខែលមីស៊ីល ដើម្បីទប់ទល់នឹងអាវុធនុយក្លេអ៊ែររបស់កូរ៉េខាងជើង និងសហប្រតិបត្តិការយោធា ដើម្បីធានាសន្តិសុខនៅច្រកផ្លូវទឹកអន្តរជាតិនៅក្នុងមហាសមុទ្រប៉ាស៊ីហ្វិក។
ទាំងអាមេរិក និងជប៉ុនបានយល់ស្របគ្នា និងទទួលស្គាល់ថា តុល្យភាពអំណាចនៅអាស៊ីកំពុងផ្អៀងទៅម្ខាងៗ។ ក្នុងក្រសែភ្នែករបស់ប្រទេសទាំងពីរ ចិនកំពុងពង្រីកឥទ្ធិពល និងវាតទីអំណាចរបស់ខ្លួនកាន់តែខ្លាំង នៅតំបន់អាស៊ី។ ទន្ទឹមនឹងការពង្រីកអំណាចរបស់ចិន អាមេរិក និងជប៉ុននៅព្រួយបារម្ភពីជំហរផ្តាច់ការរបស់កូរ៉េខាងជើងដែលមានអាវុធនុយក្លេអ៊ែរគំរាមដល់សន្តិសុខក្នុងតំបន់។
អាមេរិកនិងជប៉ុនត្រូវការគ្នាទៅវិញ ដើម្បីដោះស្រាយបញ្ហានៅតំបន់អាស៊ីប៉ាស៊ីហ្វិក។ អាមេរិកខ្លាចចិនផ្តាច់មុខក្តោបក្តាប់អាស៊ីតែម្នាក់ឯង។ ចំណែកជប៉ុនវិញ ដែលកំពុងមានវិវាទជាមួយចិន ជុំវិញប្រជុំកោះ ស៊ិនការគូ ចង់បានជំនួយពីអាមេរិក ដើម្បីទប់ទល់ការគំរាមកំហែងពីចិន។
ក្រៅពីជប៉ុន អាមេរិកនៅកំពុងយកចិត្តទុកដាក់លើទំនាក់ទំនងយោធាជាមួយឥណ្ឌា និងហ្វីលីពីន។ នៅថ្ងៃចន្ទនេះដែរ លោកស្រីហ៊ីឡារី គ្លីនតុន ប្រមុខការបរទេស និងលោកLeon Panetta រដ្ឋមន្រ្តីការពារជាតិអាមេរិកត្រូវជួបសមភាគីមកពីប្រទេសហ្វីលីពីន។ ហ្វីលីពីនត្រូវការពឹងពាក់អាមេរិក ព្រោះហ្វីលីពីនកំពុងជាប់ឈ្លោះជាមួយចិន ពីរឿងដែលចិនបញ្ជូនទូកល្បាតទៅចូលចតនៅជិតកោះShoalដែលហ្វីលីពីនចាត់ទុកថា ជាកោះរបស់ខ្លួន។ ដើម្បីបានជំនួយគំាទ្រពីអាមេរិក ហ្វីលីពីនបានយល់ព្រមឲ្យអាមេរិកប្រើវាលយន្តហោះយោធា និងកំពង់ផែរបស់ខ្លួន ហើយហ្វីលីពីន និងអាមេរិក ទើបបានបញ្ចប់សមយុទ្ធរួមគ្នា មួយដែលចិនព្រមានថា ជាការញុះញង់បង្កឲ្យមានសង្រ្គាមនៅតំបន់អាស៊ី។
បន្ទាប់ពីហ្វីលីពីននេះ អាមេរិកនៅកំពុងផ្តើមនយោបាយការទូតជាមួយឥណ្ឌា ដែលអាមេរិកបានចងសម្ព័ន្ធមិត្ត និងខំយកចិត្តរហូតមក ព្រោះតែឥណ្ឌាជាមហាអំណាចនៅអាស៊ី មានអាវុធនុយក្លេអ៊ែរមួយដែរ។ គួរដឹងថា អាមេរិកក្រោមការគ្រប់គ្រងរបស់លោកប៊ូស បានអនុញ្ញាតឲ្យមានសហប្រតិបត្តិកានុយក្លេអ៊ែរជាមួយឥណ្ឌា។
នៅចុងសប្តាហ៍នេះ បន្ទាប់ពីប្រទេសចិន លោកស្រីប្រមុខការទូតអាមេរិក ត្រូវធ្វើដំណើរទៅប្រទេសឥណ្ឌា ដោយសង្ឃឹមថា អាមេរិកនឹងដោះស្រាយបញ្ហាមិនចុះសម្រុងគ្នាកន្លងមក។ រហូតមក ឥណ្ឌាមិនបានស្តាប់តាមអាមេរិក ក្នុងរឿងឈប់ទិញប្រេងពីអ៊ីរ៉ង់ ដែលអាមេរិកដាក់ទណ្ឌកម្មសេដ្ឋកិច្ចដោយសារកម្មវិធីអាវុធនុយក្លេអ៊ែរ។
ទោះជាអាមេរិក មានថ្នាំងថ្នាក់ចិត្តជាមួយឥណ្ឌាពីរឿងនេះ ប៉ុន្តែ អាមេរិកនិងឥណ្ឌានៅត្រូវរ៉ូវគ្នា ចាប់ដៃគ្នា ព្រោះពួកគេមានសត្រូវតែមួយគឺចិន។ ឥណ្ឌាដែលតែមានជម្លោះព្រំដែនមិនទាន់ដោះស្រាយចប់ជាមួយចិន នៅខ្លាចចិនពង្រីកអំណាចក្តោបក្តាប់តំបន់ដែលស្ថិតក្រោមឥទ្ធិពលរបស់ខ្លួន។ ដូច្នេះ នៅចំពោះមុខការគំរាមកំហែងរបស់ចិន ឥណ្ឌាត្រូវការអាមេរិកដើម្បីការពារប្រយោជន៍របស់ខ្លួន។ អាមេរិកវិញ ចង់បានការសហការពីឥណ្ឌាដើម្បីពង្រីកឥទ្ធិពលរបស់ខ្លួននៅអាស៊ីប៉ាស៊ីហ្វិកទប់ទល់នឹងចិន។ ជារួម អាមេរិកបានចាប់ផ្តើមសប្តាហ៍នេះដើម្បីរឹតបន្តឹងចំណងការទូតរបស់ខ្លួន ជាមួយប្រទេសដែលជាសត្រូវរបស់ចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ